கட்டுரை-அரசுப் பொருட்காட்சிக்கு சென்று வந்த நிகழ்வு

 உங்கள் பகுதியில் நடைபெற்ற அரசுப் பொருட்காட்சிக்குச் சென்று வந்த நிகழ்வை கட்டுரையாக்குக.

அரசுப்பொருட்காட்சி

முன்னுரை

     கண்ணால் காண்பவை மனத்தில் ஆழமாகப் பதிந்து, நெடுங்காலம் நிலைத்திருக்கும்.   அதனால்தான், பள்ளிகளில் சில இடங்களைக் குறிப்பிட்டு சுற்றுலாவாக அழைத்துச் செல்கின்றனர்.  அந்த வகையில் பொருட்காட்சிகள் கூட மக்கள் அறிவை வளர்க்க பெருந்துணை புரிகின்றன.  நான் அண்மையில் என் நண்பர்களுடன் மதுரையில் உள்ள தமுக்கம் மைதானத்தில் நடைபெற்ற அரசுப் பொருட்காட்சிக்குச்  சென்று வந்தேன். அது குறித்துச் சில செய்திகளைக் கூறுகிறேன், கேளுங்கள்.

தமுக்கம் மைதானம்

     தமுக்கம் மைதானம் மதுரையின் வரலாற்றுச் சிறப்பு மிக்க மைதானமாக பதினான்காம் நூற்றாண்டில் மன்னர் விஸ்வநாத நாயக்கரால் கட்டப்பட்டு, மதுரை நாயக்கர் வம்சத்தால் பராமரிக்கப்பட்டு வந்தது.  அக்காலத்தில் குதிரைப் பந்தயம், யானைப் பந்தயம், மாட்டு சண்டைகள் போன்ற விளையாட்டுகளும் சிலம்பு சண்டை, கத்திச் சண்டை போன்ற கலைகளும் இங்கு நடத்தப்பட்டன.

அரசுப் பொருட்காட்சி

      சித்திரைத் திருவிழாவை முன்னிட்டு ஆண்டுதோறும் மதுரைத் தமுக்கம் மைதானத்தில் அரசு சார்பில் பொருட்காட்சி நடைபெறும்.  மாலை வேளையில் பல வண்ண விளக்குகளால் மைதானமே ஜொலிக்கும். பல்வேறு அரசுத் துறைகளின் சார்பில் அரசின் சாதனைகளை விளக்கும் வகையில் அரங்குகள் அமைக்கப்பட்டு இருக்கும்.

பல்துறை அரங்குகள்

     அரசு ஏற்பாடு செய்திருந்த பொருட்காட்சி ஆதலால், உள்ளே நுழைந்ததும் அரசு சார்புடைய காவல்துறை, சுற்றுலாத் துறை, பொதுப்பணித் துறை, அற நிலையத் துறை, வனத் துறை, தீயணைப்புத் துறை, விளம்பரத் துறை, போக்குவரத்துத் துறை, மின்துறை, அறிவியல் துறை எனப் பல்வேறு துறைசார்ந்த அரங்குகள் அமைக்கப்பட்டிருந்தன.  விவசாயம், கைத்தறி, மீன் வளர்ப்பு முதலான துறை சார்ந்த அரங்குகளும் இருந்தன.  அவற்றில் நமக்குத் தேவையான விளக்கமளிக்கப் பொறுப்புடைய பலர் காத்திருந்தது சிறப்பாக இருந்தது.  நான் பல வினாக்களை வினவி, என் ஐயங்களைப் போக்கிக் கொண்டேன்.

பல்வேறு கடைகள்

     சிறுவர்களுக்கான பொம்மைகள் விற்கும் கடைகள், புத்தகக் கடைகள், ஆயத்த ஆடைகள் விற்கும் கடைகள், வீட்டுப் பயன்பாட்டுப் பொருட்கள் விற்கும் கடைகள், கைவினைப் பொருட்கள் விற்கும் கடைகள் எனப் பல்வேறு கடைகள் அங்கே காணப்பட்டன.

கேளிக்கை அரங்குகள்

       பல்வேறு கலை நிகழ்ச்சிகள், சாகச நிகழ்ச்சிகள் போன்றவை நடத்தப்பட்டன.  மீன் கண்காட்சிக் கூடம் கண்களைக் கவர்வதாக இருந்தது.  பல்வேறு வகையான இராட்டினங்களில் குழந்தைகள், சிறியவர், பெரியவர் என அனைவரும் சுற்றி மகிழ்ந்தனர்.

உணவு அரங்குகள்

     குடும்பம் குடும்பமாக வந்திருந்த சிலர், அங்கு அமைக்கப்பட்டிருந்த பல்வேறு உணவு அரங்கங்களில் கூடிநின்று, பல்வேறு வகையான தின்பண்டங்களை வாங்கி உண்டு மகிழ்ந்தனர்.  அங்குக் குடிப்பதற்குப் பல்வேறு வகையான சாறுகள் வழங்கப்பட்டன.  பனிக்கூழ் வகைகள் எல்லோரையும் கவர்ந்தன.  'ஆவின்' பால் நிறுவனம் அமைத்திருந்த அரங்கில் எண்ணற்ற மக்கள் அவரவர் விருப்பத்திற்கு ஏற்ப சுவையுடைய பண்டங்களை வாங்கிச் சுவைத்தனர்.

முடிவுரை

     பொருட்காட்சி என்பது வெறும் பொருள்களை மட்டும் காண உதவவில்லை.  அது பல்வேறு துறை அறிவையும் பெற உதவுவதாக அமைந்துள்ளது.  எனவே, அடுத்த முறை நண்பர்களை எல்லாம் அழைத்துக் கொண்டு செல்ல வேண்டும் என்ற முடிவுடன் வீடு திரும்பினேன்.

 பள்ளி வளாகத்தில் நடைபெற்ற 'மரம் நடும் விழாவுக்கு' வந்திருந்த சிறப்பு விருந்தினருக்கும் பெற்றோருக்கும் பள்ளியின் பசுமை பாதுகாப்புப்படை சார்பாக நன்றியுரை எழுதுக.

நன்றியுரை

இடம்:சங்கரலிங்கபுரம்

நாள் : 24.09.2020

     எங்களது பள்ளியில் நடைபெற்ற மரம் நடு விழாவிற்கு வருகை தந்து சிறப்புச் சேர்த்த சான்றோர் பெருமக்களே!

     மரம் நடுவதன் அவசியம் குறித்து சிறப்பு விருந்தினராக வருகை புரிந்திருந்த வனப்பாதுகாப்பு அலுவலர் அவர்கள் கூறிய அறிவுரைகள், எங்களது நெஞ்சில் பசுமரத்தாணி போல பதிந்தது.  பசுமைப்படை திட்ட அலுவலரும், பள்ளித் தலைமை ஆசிரியரும் வழங்கிய அறிவுரைகளும் வழிகாட்டுதல்களும் எங்களுக்கு மிகுந்த ஊக்கத்தை அளித்தது.

     நம் பள்ளியின் பசுமை படை அலுவலர், "மரம் இயற்கை நமக்கு தந்த வரம்.  உண்ணக் கனியும் ஒதுங்க நிழலும் தந்தது;  உடலுக்கு மருந்தும், உணர்வுக்கு விருந்தும் தந்தது; அடையக் குடிலும், அடைக்கக் கதவும் தந்தது; அழகு வேலியும், ஆடத் தூலியும் தந்தது; தடவத் தைலமும் தாளிக்க எண்ணையும் தந்தது; எழுதக் காகிதமும் எரிக்க விறகும் தந்தது.  மரம்தான் மரம்தான் எல்லாம் மரம்தான்!  மறந்தான் மறந்தான், மனிதன் மறந்தான். 

மனிதா, மனிதனாக வேண்டுமா? மரத்திடம் வா.  ஒவ்வொரு மரமும் போதி மரம்!!" என்று பேசினார்.  அவரது கருத்து எங்களுக்கு  உற்சாகத்தை அளித்தது.

     மரங்களின் வகைகள், அவற்றின் பயன்கள், எந்தெந்த மண்ணில் எந்தெந்த மரங்கள் வளரும், மரங்களின் பொருளாதார பயன்கள், பருவநிலை மாற்றம், எதிர்காலச் சவால்கள் குறித்த தகவல்களை இந்த விழா மூலமாக நாங்கள் அறிந்து கொண்டோம்.

       இந்த விழாவிற்கு வருகை தந்து சிறப்பு சேர்த்த சிறப்பு விருந்தினர்களுக்கும், பெற்றோர்களுக்கும் பசுமைப் பாதுகாப்பு படை சார்பாக நன்றியைத் தெரிவித்துக் கொள்கிறோம்.  இந்த விழா சிறப்புடன் நடைபெறக் காரணமாக இருந்த அனைவருக்கும் நன்றியைத் தெரிவித்துக் கொள்கிறோம்.

நன்றி, வணக்கம்!

 உங்கள் பள்ளியில் நடைபெறும் நாட்டு நலப்பணித் திட்ட முகாம் தொடக்க விழாவில் மாணவர்களுக்கு வாழ்த்துரை வழங்க உரை ஒன்றை உருவாக்கித் தருக.

வாழ்த்துரை

இடம்: சங்கரலிங்கபுரம்

நாள் : 24.09.2020

    இப்போது, இங்கு நடைபெறும் நாட்டு நலப்பணித்திட்ட முகாமிற்கு வருகை தந்திருக்கும், கல்விக் காவலர், கல்வித்தேரின் அச்சாணி, உயர்திரு.மாவட்டக் கல்வி அலுவலர் அவர்களே!  மாணவர் நலனே முதன்மையானது எனக் கருதி, அயராது பாடுபடும் பள்ளித் தலைமை ஆசிரியர் அவர்களே! சீரிய பணிக்காகத் தன்னை அர்ப்பணித்துக் கொண்டுள்ள நாட்டு நலப்பணி திட்ட அலுவலர் அவர்களே!  நாட்டு நலப்பணி திட்டத்தில் பங்கேற்று சேவை செய்ய இருக்கும் அன்பு மாணவச் செல்வங்களே!  உங்கள் அனைவருக்கும் என் முதற்கண் வணக்கத்தைத் தெரிவித்துக் கொள்கிறேன்.

     "மக்களுக்கு செய்யும் சேவையே இறைவனுக்குச் செய்யும் சேவை" என்று விவேகானந்தர் கூறுவார்.  வள்ளலார், அன்னை தெரசா, மகாத்மா காந்தி எனச் சான்றோர் பலர் மக்கள் பணிக்காகத் தங்களை அர்ப்பணித்துள்ளனர்.   அந்த வரிசையில் உங்களை, நீங்கள் மக்கள் பணிக்காக அர்ப்பணித்துள்ளமை போற்றுதலுக்குரியது.

     'எனக்காக அல்ல; உனக்காக' என்ற உன்னதமான நோக்கத்தை அடிப்படையாகக் கொண்ட நாட்டு நலப்பணித்திட்ட முகாமில் ஈடுபடுத்திக் கொண்டுள்ள உங்களுக்கு, என்னுடைய வாழ்த்துக்களைத் தெரிவித்துக் கொள்கிறேன்.  மாணவப் பருவத்திலேயே இது போன்ற சேவை அமைப்புகளில் தங்களை ஈடுபடுத்திக்கொண்டு நல்ல பழக்கங்களை வளர்த்துக் கொள்வது, எதிர்கால வாழ்வைச் செம்மைப்படுத்த உதவும்.  நீங்கள் செய்யும் சேவையினால் தன்னம்பிக்கை வளரும்; மனவலிமை மேம்படும்;  மகிழ்ச்சியும் மனநிறைவும் கிட்டும்.  

     உயர்ந்த சிந்தனைகளான சுதந்திரம், சமத்துவம், சகோதரத்துவம் பற்றி அதிகமாகச் சிந்திப்பீர்கள்.  கடமை, கண்ணியம், கட்டுப்பாட்டோடு திகழ்வீர்கள்.  பிரச்சினைகளைத் தீர்க்கும் பேராற்றலைப் பெறுவீர்கள்.  பத்து நாட்கள் நடைபெறும் இந்த முகாமில் ஒவ்வொரு நாளும் புதிய அனுபவத்தைப் பெறுவீர்கள்.  புதிய, வளமான உலகம் உங்களைப் போன்ற சமூக சேவையாளர்கள் கைகளில்தான் உள்ளது.  உங்களது நாட்டு நலப்பணித் திட்ட முகாம் சிறப்புற நடைபெற எனது வாழ்த்துக்களைத் தெரிவித்துக் கொள்கிறேன்.  

நன்றி!

கடிதம்-மின்வாரிய அலுவலருக்கு

 உங்கள் தெருவில் மின் விளக்குகள் பழுதடைந்துள்ளன. அதனால் இரவில் சாலையில் நடந்து செல்வதற்கு ஏற்படும் இடையூறுகளை எழுதி, ஆவன செய்யும்படி மின்வாரிய அலுவலருக்குக் கடிதம் எழுதுக.

அனுப்புநர்

     அ. தமிழ்,

     6, திருவள்ளுவர் தெரு,

     சங்கரலிங்கபுரம்,

     விருதுநகர் (மாவட்டம்).

பெறுநர்

     மின்வாரிய அலுவலர்,

     மின்வாரிய அலுவலகம்,

     விருதுநகர்.

மதிப்பிற்குரிய அய்யா,

    பொருள்: பழுதடைந்த மின் விளக்குகளை மாற்றித் தர வேண்டுதல் குறித்து...

     வணக்கம்.  நான் மேற்கண்ட முகவரியில் நிரந்தரமாகக் குடியிருந்து வருகிறேன்.  எங்கள் தெருவில் சுமார் 100 வீடுகள் உள்ளன.  200 மீட்டர் நீளமுள்ள எங்கள் தெருவில் 4 மின் கம்பங்கள் உள்ளன.  அதில் இரண்டு மின் கம்பங்களில் உள்ள தெருவிளக்குகள் பழுதடைந்துள்ளன.  

     அந்தப் பகுதி இருட்டாக இருப்பதால் திருடர்கள் நடமாட்டம் இருக்கிறது;  நச்சு பூச்சிகளின் தொல்லையும் இருக்கின்றது.  இதனால், பெண்கள், முதியவர்கள், குழந்தைகள் பெரும் அச்சத்திற்கு ஆளாகின்றனர்.

     இதனைத் தவிர்க்க, பழுதடைந்த மின் விளக்குகளை மாற்றித் தருமாறு வேண்டுகிறேன்.

இப்படிக்கு,

உண்மையுள்ள,

அ. தமிழ்

இடம் : சங்கரலிங்கபுரம்

நாள் : 24.09.2020

உறைமேல் முகவரி:

பெறுநர்

     மின்வாரிய அலுவலர்,

     மின்வாரிய அலுவலகம்,

     விருதுநகர்.

கடிதம்- நாளிதழ் ஆசிரியருக்குக் கடிதம்

 நாளிதழ் ஒன்றின் பொங்கல் மலரில் 'உழவுத் தொழிலுக்கு வந்தனை செய்வோம்' என்ற உங்கள் கட்டுரையை வெளியிட வேண்டி, நாளிதழ் ஆசிரியருக்குக் கடிதம் எழுதுக.

அனுப்புநர்

     அ. தமிழ்

     6, திருவள்ளுவர் தெரு,

     சங்கரலிங்கபுரம்,

     விருதுநகர் (மாவட்டம்).

பெறுநர்

     ஆசிரியர்,

     தினமணி,

     சென்னை.

மதிப்பிற்குரிய ஐயா,

     பொருள்: கட்டுரை வெளியிட வேண்டுதல்...

     வணக்கம்.  விருதுநகர் மாவட்டம், சங்கரலிங்கபுரம் அரசு மேல்நிலைப்பள்ளியில் பத்தாம் வகுப்பு படித்து வருகிறேன்.  தங்கள் நாளிதழின் பொங்கல் மலருக்காக 'உழவுத் தொழிலுக்கு வந்தனை செய்வோம்' என்ற தலைப்பில் இரண்டு பக்க கட்டுரை எழுதி, இத்துடன் இணைத்துள்ளேன்.  வரும் பொங்கல் அன்று வெளிவரும் பொங்கல் மலரில், எனது கட்டுரையை வெளியிட வேண்டுகிறேன். நன்றி!

இப்படிக்கு,

உண்மையுள்ள,

அ. தமிழ்

இடம்: சங்கரலிங்கபுரம்

நாள் : 10.01.2021

இணைப்பு:

    (1). 'உழவு தொழிலுக்கு வந்தனை செய்வோம்' என்ற தலைப்பிலான கட்டுரை

உறைமேல் முகவரி

பெறுநர்

     ஆசிரியர்,

     தினமணி,

     சென்னை

     

கட்டுரை- மதிப்புரை வழங்குதல்

பள்ளி ஆண்டுவிழா மலருக்காக நீங்கள் நூலகத்தில் படித்த கதை/ கட்டுரை/ சிறுகதை/ கவிதை நூலுக்கான மதிப்புரை எழுதுக.

மதிப்புரை

நூலின் தலைப்பு: மணிமேகலை

நூலின் மையப் பொருள் : மணிமேகலை மேற்கொண்ட துறவு

மொழிநடை : நாவல்

வெளிப்படுத்தும் கருத்து : 

     நாம் போன பிறவியில் செய்த பாவத்தின் பயனாகத்தான் இந்த உடம்பு வாய்த்திருக்கிறது.  இந்த உடம்பை வைத்துக்கொண்டு நல்லது செய்வதும் கெட்டது செய்வதும் முழுக்க முழுக்க நம்முடைய கையில் தான் இருக்கிறது.  இந்த உடம்பு அழகானது என்று நினைத்தால் அந்த கருத்தைத் தயவு செய்து மாற்றிக் கொள்ளுங்கள்.  இந்த அழகு நிலை இல்லாதது.  இளமை போய் முதுமை வந்து விட்டால் அத்தனை அழகும் மறைந்து போகும்.  இந்த நிலை இல்லாத உடம்பைப் பராமரிக்கத் தான் எத்தனை அலங்காரங்கள்? அழகு சாதனங்கள், நறுமணப் பூச்சுகள்.  இதை எல்லாம் நீக்கி விட்டால் இந்த உடம்பு எத்தனை கேவலமான நாற்றம் கொண்டது என்று புரியும்.  புற்றுக்குள் பாம்பு புகுந்தது போல கோபம், வருத்தம், கவலை, துன்பம் எல்லாம் உள்ளே பூட்டி வைக்கிறோம்.

நூலின் நயம் : 

தீவதிலகையின் கூற்று:

     இந்த உலகத்தையே பெரும் துன்பத்தில் ஆழ்த்தக் கூடிய ஒரு மிகப்பெரிய நோய் பசி.  அந்தப் பசியைப் போக்கும் அற்புத மருந்து அந்த அமுதசுரபி.  நீ அதை ஏற்றுக்கொண்டு, இல்லாதவர்களுக்கு உணவு கொடுத்து மகிழச் செய்ய வேண்டும்.  உன் மூலம் இந்த பூமி மொத்தமும் நலம் பெறவேண்டும்.

அறவண அடிகளின் கூற்று:

     இங்கிருந்து சூரிய மண்டலம் தொலைவில் உள்ளது என்பதை நாம் உணர முடியும். ஆனால், அதைக் கண்ணால் பார்த்து அறிவது சாத்தியமில்லை.  அதுபோலத்தான், நல்ல அறநெறிகளை நாம் நேரில் பார்த்தால் தான் நம்புவோம் என்று பிடிவாதம் பிடிக்கக் கூடாது.  மற்றவர்கள் உணர்த்துவதை உள்ளத்தால் புரிந்துகொள்ள வேண்டும்.

ஆதிரையின் கணவன் சாதுவன் கூற்று:

     கள் நம்முடைய அறிவை மயக்குகிறது.  மாமிசம், மற்ற உயிர்களைக் கொன்று பிழைக்கச் சொல்கிறது.  பல பெண்களின் பின்னே அலைவதும் மிருகக் குணம் தான்.

நூலின் கட்டமைப்பு : 

     மணிமேகலைக் காப்பியத்தை, இவள் பெயர் மணிமேகலைமுதல் குற்றம்தவிர்த்த வாழ்க்கை ஈறாக 66 தலைப்புகளில் நாவல் வடிவில் விளக்குகிறது.

சிறப்புக் கூறு : 

     மூல நூலான மணிமேகலையை விட, நாவல் வடிவிலமைந்த இந்த நூல் எளிய நடையில் கதை சொல்கிறது.  ஒரே மூச்சில் படித்து முடித்துவிட வேண்டும் என்ற ஆவலைத் தூண்டுகிறது.

     நாடகக் காட்சிகளை நம் கண்முன்னே கொண்டுவந்து நிறுத்தி,  மணிமேகலை வாழ்ந்த உலகிற்கு நம்மை அழைத்துச் செல்கிறது. 

     புத்தர் அறிவித்த நன்னெறிகள், நூல் முழுவதும் தொடர்கின்றன.  இக்கால சமுதாயம் சீர்பெற மிகவும் அவசியமான நூலாகும்.

     மிகுந்த சுவையோடு எழுதப்பட்டிருக்கும் இந்நூல் அனைவரையும் கவரும் என்பதில் ஐயமில்லை.

நூலின் ஆசிரியர்: என். சொக்கன்

மணிமேகலையில் கரையை விரும்புவோர் இங்கே தொடவும்

- மலர் மகேந்திரன்

கடிதம் - புகார்க் கடிதம்

உணவு விடுதி ஒன்றில் வழங்கப்பட்ட உணவு தரமற்றதாகவும், விலை கூடுதலாகவும் இருந்தது குறித்து உரிய சான்றுகளுடன் உணவு பாதுகாப்பு ஆணையருக்குக் கடிதம் எழுதுக.

புகார்க் கடிதம்

அனுப்புநர்

       அ. கபிலர்

       6, ஔவையார் தெரு,

       சங்கரலிங்கபுரம்,

       விருதுநகர் (மாவட்டம்).

பெறுநர்

       உயர்திரு. உணவுப் பாதுகாப்பு ஆணையர்,

       உணவுப்பாதுகாப்பு ஆணையர் அலுவலகம்,

       சென்னை.

மதிப்பிற்குரிய ஐயா,

  பொருள்: தரமற்ற உணவு வழங்கிய உணவு விடுதியாளர் மீது நடவடிக்கை எடுக்க வேண்டுதல்...

  வணக்கம்.  நான் நேற்று (22.09.2020) விருதுநகர் - மதுரை நான்குவழிச் சாலையில் அமைந்துள்ள முல்லை உணவு விடுதிக்குச் சென்றிருந்தேன்.  கோழி பிரியாணி ஒன்று வாங்கினேன்.  சாப்பிடும்போது குழம்பில் மிகுதியான வேதிப்பொருட்களும் நிறமிகளும் கலந்து இருப்பதையும், கோழிக்கால் துண்டில் புழு இருப்பதையும் கண்டு அதிர்ச்சி அடைந்தேன்.

  உணவு விடுதி உரிமையாளரிடம், இதுகுறித்து முறையிட்டபோது "உன்னால் முடிந்ததைப் பார்" என்று மிரட்டினார்.  விலைப்பட்டியலில் கோழிப் பிரியாணி விலை ரூபாய் 120 என்று எழுதப்பட்டிருந்தது. ஆனால், என்னிடம் 180 ரூபாய் கேட்டார்.

       தரமற்ற உணவு வழங்கியும், விலை கூடுதலாக வசூலித்தும் வரும் முல்லை உணவு விடுதி உரிமையாளர் மீது உரிய நடவடிக்கை எடுக்க வேண்டுகிறேன்.  புழுவுடன் கூடிய கோழிக்கால் துண்டின் புகைப்படத்தையும், 180 ரூபாய்க்கான உணவு கட்டணச் சீட்டின் ஒளிப்பட நகலையும் இத்துடன் இணைத்துள்ளேன்.

நன்றி!

இப்படிக்கு,

உண்மையுள்ள,

அ. கபிலர்.

இடம் : சங்கரலிங்கபுரம்.                                                    

நாள்  : 23.09.2020 

இணைப்பு:

       (1). புழுவுடன் கூடிய கோழிக்கால் துண்டின் புகைப்படம்

       (2). உணவுக் கட்டணச் சீட்டின் ஒளிப்பட நகல்

உறைமேல் முகவரி:

பெறுநர்

       உயர்திரு. உணவுப் பாதுகாப்பு ஆணையர்,

       உணவு பாதுகாப்பு ஆணையர் அலுவலகம்,

       சென்னை.