மெல்லக் கற்போருக்கான மூன்று மதிப்பெண் வினாக்கள்

1) தமிழன்னையை வாழ்த்துவதற்கான காரணங்களாகப் பாவலரேறு சுட்டுவது யாவை?

1. பழமை
2. குமரி நில ஆட்சி
3. தென்னன் தமிழ்
4. திருக்குறளின் புகழ்
5. பதினெண்மேற்கணக்கு
6. பதினெண்கீழ்க்கணக்கு
7. சிலப்பதிகாரம்
8. மணிமேகலை

2) ‘புளியங்கன்று ஆழமாக நடப்பட்டுள்ளது’. இதுபோல் இளம் பயிர் வகை ஐந்தின் பெயர்களைத் தொடர்களில் அமைக்க.

1. நெல்நாற்று நடப்பட்டுள்ளது
2. மாங்கன்று நடப்பட்டுள்ளது
3. தென்னம்பிள்ளை நடப்பட்டுள்ளது
4. வாழைக்குருத்து வளர்ந்துள்ளது
5. சோளப் பைங்கூழ் வளர்ந்துள்ளது.

3) ‘அறிந்தது, அறியாதது, புரிந்தது, புரியாதது, தெரிந்தது, தெரியாதது, பிறந்தது, பிறவாதது’ இவை அனைத்தையும் யாம் அறிவோம். அது பற்றி உமது அறிவுரை எமக்குத் தேவை இல்லை எல்லாம் எமக்குத் தெரியும்.

 இக்கூற்றில் வண்ண எழுத்துக்களில் உள்ள வினைமுற்றுகளைத் தொழிற் பெயர்களாக மாற்றி எழுதுக.

வினைமுற்றுகள் – தொழிற் பெயர்கள்:

1. அறிந்தது – அறிதல்
2. அறியாதது – அறியாமை
3. புரிந்தது – புரிதல்
4. புரியாதது – புரியாமை
5. தெரிந்தது – தெரிதல்
6. தெரியாதது – தெரியாமை
7. பிறந்தது – பிறத்தல்
8. பிறவாதது – பிறவாமை

4) மழை நின்றவுடன் புலப்படும் காட்சியை வர்ணித்து எழுதுக .

குறிப்பு : இலைகளில் சொட்டும் நீர்- உடலில் ஓடும் மெல்லிய குளிர் – தேங்கிய குட்டையில் ‘ சளப் தளப் ‘ என்று குதிக்கும் குழந்தைகள் – ஓடும் நீரில் காகிதக் கப்பல்

இலைகளில் சொட் சொட் என்று நீர் சொட்டுகிறது.  உடலில் மெல்லிய குளிர் ஓடுகிறது. தேங்கிய குட்டையில் ‘ சளப் தளப் ‘ என்று  குழந்தைகள் குதிக்கின்றனர்.   நீரில் காகிதக் கப்பல் விடுகின்றனர்.

5) தோட்டத்தில் மல்லிகைப்பூப் பறித்த பூங்கொடி வரும்வழியில் ஆடுமாடுகளுக்குத் தண்ணீர்த் தொட்டியில் குடிநீர் நிரப்பினாள். வீட்டிற்கு வந்தவள் சுவர்க் கடிகாரத்தில் மணி பார்த்தாள்.

இப்பத்தியில் உள்ள தொகைச் சொற்களின் வகைகளைக் குறிப்பிட்டு விரித்து எழுதுக.

1. மல்லிகைப்பூ-இருபெயரொட்டுப் பண்புத்தொகை
2. பூப்பறித்த- இரண்டாம் வேற்றுமைத்தொகை.
3. ஆடுமாடுகள்- உம்மைத்தொகை.
4. தண்ணீர்த்தொட்டி -இரண்டாம் வேற்றுமை உருபும் பயனும் உடன் தொக்கத் தொகை.
5. குடிநீர்- வினைத்தொகை.
6. சுவர்க் கடிகாரம்- ஏழாம் வேற்றுமை உருபும் பயனும் உடன் தொக்கத் தொகை

6) கண்ணே கண்ணுறங்கு!

காலையில் நீ எழும்பு!

மாமழை பெய்கையிலே 

மாம்பூவே கண்ணுறங்கு!

பாடினேன் தாலாட்டு!

ஆடி ஆடி ஓய்ந்துறங்கு!

-இத்தாலாட்டுப் பாடலில் அமைந்துள்ள தொடர் வகைகளை எழுதுக.

தொடர் வகைகள்

1. கண்ணே கண்ணுறங்கு – விளித்தொடர்
2. காலையில் நீ எழும்பு! – ஐந்தாம் வேற்றுமைத் தொடர்.
3. மாமழை பெய்கையிலே – உரிச்சொற்றொடர்.
4. மாம்பூவே கண்ணுறங்கு! – விளித்தொடர்
5. பாடினேன் தாலாட்டு! – வினைமுற்றுத் தொடர்.
6. ஆடி ஆடி ஓய்ந்துறங்கு! – அடுக்குத்தொடர்

7) வேலொடு நின்றான் இடுவென் றதுபோலும் கோலொடு நின்றான் இரவு – இக்குறளில் பயின்று வரும் அணியை விளக்குக.

அணி: உவமை அணி

விளக்கம்: உவமை, உவமேயம், உவம உருபு ஆகிய மூன்றும் வெளிப்படையாக வந்துள்ளது.

8) “மாளாத காதல் நோயாளன் போல்” என்னும் தொடரில் உள்ள உவமை சுட்டும் செய்தியை விளக்குக.

இறைவன் நீங்காத துன்பத்தைத் தந்தாலும், அவனது அருளையே எதிர்பார்த்து வாழ்கிறேன் 

9) நேற்று இரவு பெய்த மழை எல்லாம் தொட்டியை நிறைத்திருந்தது. வாழைத்தோப்பில் குட்டியுடன் நின்றிருந்த மாடு கத்தியது; தந்தை என்னிடம், “இலட்சுமி கூப்பிடுகிறாள், போய் பார்” என்றார். “இதோ சென்று விட்டேன்” என்றவாற அங்குச் சென்றேன். துள்ளிய குட்டியைத் தடவிக்கொடுத்து, “என்னடா விளையாட வேண்டுமா?” என்று கேட்டு, அவனை அவிழ்த்துவிட்டேன். என் தங்கை அங்கே வந்தாள். அவளிடம், “நீயும் இவனும் விளையாடுங்கள்” என்று கூறினேன். அவிழ்த்துவிடப்பட்ட இலட்சுமி தொட்டியிலிருந்த நீரைக் குடித்தாள். இப்பத்தியிலுள்ள வழுவமைதிகளைப் பட்டியலிட்டு எழுதுக.

1. நிறைத்திருந்தது
2. இலட்சுமி கூப்பிடுகிறாள்
3. இதோ சென்று விட்டேன்
4. என்னடா விளையாட வேண்டுமா?
5. நீயும் இவனும் விளையாடுங்கள்
6. இலட்சுமி தொட்டியிலிருந்த நீரைக் குடித்தாள்

 10) ஐ.நா. அவையில் ஒருவர் பேசினால் அவரவர் மொழிகளில் புரிந்து கொள்வதற்கு வசதி செய்யப்பட்டிருக்கிறது. மொழிபெயர்ப்பு (translation) என்பது எழுதப்பட்டதை மொழிபெயர்ப்பது; ஆனால் ஒருவர் பேசும்போது மொழிபெயர்ப்பது, விளக்குவது (interpreting) என்றே சொல்லப்படுகிறது. ஐ.நா. அவையில் ஒருவர் பேசுவதை மொழிபெயர்க்கும் மொழிபெயர்ப்பாளர் பார்வையாளர்களுக்குத் தெரியாதபடி வேறு இடத்தில் இருப்பார். ஒருவர் பேசுவதைக் காதணிக் கேட்பியில் (headphone) கேட்டபடி சில நொடிகளில் மொழிபெயர்த்து ஒலிவாங்கி வழியே பேசுவார். அவையில் உள்ள பார்வையாளர்கள் முன் உள்ள காதணிக்கேட்பியை எடுத்துப் பொருத்திக் கொண்டு அவரது மொழியில் புரிந்து கொள்வார். 

 இப்பகுதியில் இருந்து ஐந்து வினாக்களை உருவாக்குக.

1. ஐ.நா. அவையில் ஒருவர் பேசினால் அவரவர் மொழிகளில் புரிந்து கொள்வதற்கு வசதி செய்யப்பட்டிருக்கிறதா?
2. மொழிபெயர்ப்பது என்பது யாது?
3. விளக்குவது என்பது யாது?
4.  ஐ.நா. அவையில் ஒருவர் பேசுவதை மொழிபெயர்க்கும் மொழிபெயர்ப்பாளர் எங்கு அமர்ந்திருப்பர்?
5. ஐ.நா. அவையில் காதணிக்கேட்பியின் பயன்பாடு யாது?

11) உங்களுடன் பயிலும் மாணவர் ஒருவர் பள்ளிப் படிப்பைப் பாதியில் நிறுத்தி வேலைக்குச் செல்ல விரும்புகிறார் . அவரிடம் கற்பதன் இன்றியமையாமையை எவ்வகையில் எடுத்துரைப்பீர்கள்?

1. இளமையில் கல்
2. கற்றோர்க்குச் சென்ற இடமெல்லாம் சிறப்பு
3. கற்கை நன்றே கற்கை நன்றே பிச்சை புகினும் கற்கை நன்றே
4. இன்று நீ வேலைக்குச் சென்றால், உனக்குக் கிடைக்கும் தொகை பெரியதாகத் தோன்றும். ஆனால், உன்னுடைய எதிர்காலம் வீணாகும் என்று கூறுவேன்.

12) ‘கடற்கரையில் உப்புக் காய்ச்சுதல் நடைபெறுகிறது. மலைப் பகுதிகளில் மலைப் பயிர்களும் நிலப்பகுதிகளில் உழவுத் தொழிலும் நடைபெறுகின்றன’. – காலப் போக்கில் பல மாற்றங்கள் நிகழ்ந்த போதிலும், பண்டைத் தமிழரின் திணைநிலைத் தொழில்கள் இன்றளவும் தொடர்வதையும் அவற்றின் இன்றைய வளர்ச்சியையும் எழுதுக

குறிஞ்சி-

அன்று-தேன் எடுத்தல், கிழங்கு அகழ்தல்

இன்று-சுற்றுலா

முல்லை-

அன்று-ஆடுமாடு மேய்த்தல்

இன்று-காடுகள் சார்ந்த தொழில்கள்

மருதம்-

அன்று-வேளாண்மை

இன்று- வேளாண்மை

நெய்தல்-

அன்று- மீன்பிடித்தல், உப்பு விளைத்தல்

இன்று- மீன்பிடித்தல், உப்பு விளைத்தல்

பாலை- 

அன்று-வழிப்பறி செய்தல்

இன்று-எண்ணெய் எடுத்தல்

13) வள்ளுவம் , சிறந்த அமைச்சருக்குக் கூறிய இலக்கணங்கள் நமக்கும் பொருந்துவதைக் குறள் வழி விளக்குக.

 

1. கருவி, காலம், செயலின் தன்மை, செய்யும் முறை ஆகியவற்றை அறிதல்
2. மனவலிமை, குடிமக்களைக் காத்தல், ஆட்சிமுறைகளைக் கற்றல், நூல்களைக் கற்றல், விடாமுயற்சி ஆகியவற்றுடன் திகழ்தல்.
3. நுண்ணறிவு, நூலறிவு, உலக நடைமுறைகளை அறிதல் ஆகியவை இன்றும் பொருந்துகின்றன.

14) பலரிடம் உதவி பெற்றுக் கடின உழைப்பால் முன்னேறிய ஒருவர், அவருக்கு உதவிய நல்ல உள்ளங்களையும் சுற்றங்களையும் அருகில் சேர்க்கவில்லை. அவருக்கு உணர்த்தும் நோக்கில் வள்ளுவர் குறிப்பிடும் கருத்துகள் யாவை?

1. சுற்றத்தாருடன் அன்பு, துணை, வலிமை இல்லை என்றால் பகைவரை எதிர்கொள்ள முடியாது.
2. துணிவு, அறிதல், அன்பு, உதவி இல்லாதவர் எளிதில் பகைக்கு ஆட்படுவார்.

15) “தலையைக் கொடுத்தேனும் தலைநகரைக் காப்போம்” இடஞ்சுட்டிப் பொருள் விளக்கம் தருக.

இடம்: ம.பொ.சி. அவர்களின் ‘எனது போராட்டம்’ என்னும் நூலில் இடம் பெற்றுள்ளது. 

விளக்கம்: ம.பொ.சி. அவர்கள் சென்னை பற்றிய தீர்மானத்தை முன்மொழிந்து, “தலையைக் கொடுத்தேனும் தலைநகரைக் காப்போம்” என்று முழங்கினார்

16) பின்வரும் பத்தியைப் படித்து மையக் கருத்தை எழுதுக.

பேரரசனது மெய்ப்புகழை எடுத்துக் கூறுவது மெய்க்கீர்த்தி. பொதுவான இது சோழ மன்னருடைய சாசனங்களின் தொடக்கத்தில் அரசனுடைய இத்தனையாவது ஆட்சியாண்டு என்று கூறுமிடத்துத் தொடக்கத்தில் அமைக்கப்பெறும். சிறப்பாக அவனுடைய போர் வெற்றிகளையும் வரலாற்றையும் முறையாகக் கூறி, அவன் தன் தேவியோடு வீற்றிருந்து நீடு வாழ்க எனக் கூறி, பிறகே சாசனம் எழுந்த நிகழ்ச்சியைக் குறிப்பிடும்.  

சோழ மன்னர் பரம்பரையில் மெய்க்கீர்த்தியோடு சாசனங்களைப் பொறிக்கும் பழக்கம் நெடுநாள் இருந்ததில்லை. முதல் இராசராசனுடைய எட்டாம் ஆண்டில் தான் மெய்க்கீர்த்தி காணப்படுகிறது. இதன்கண் வமிசப் பாரம்பரியம் விதந்து ஓதப்படவில்லை. ஏனைய பகுதிகள் உள்ளன. எனினும், இது மிகவும் சுருக்கமாகவே உள்ளது. இன்னும் பின்வந்த மெய்க்கீர்த்தி கோளின் வமிச பரம்பரை மிகவும் விரித்துக் கூறியுள்ளன.

மையக்கருத்து

பேரரசனது மெய்ப்புகழை எடுத்துக்கூறுவது மெய்க்கீர்த்தி. சோழ மன்னருடைய சாசனங்களில் அரசனுடைய ஆட்சி ஆண்டு, போர் வெற்றிகள், வரலாறு, வாழ்த்து, சாசனம் எழுந்த நிகழ்ச்சி ஆகியவை காணப்படும். முதல் இராஜராஜனுடைய எட்டாம் ஆட்சி ஆண்டில்தான் மெய்க்கீர்த்தி காணப்படுகிறது. 

17) “பகர்வனர் திரிதரு நகர வீதியும்;

 பட்டினும் மயிரினும் பருத்தி நூலினும் 

கட்டு நுண்வினைக் காருகர் இருக்கையும்;

 தூசும் துகிரும் ஆரமும் அகிலும்” 

அ) இவ்வடிகள் இடம்பெற்றுள்ள நூல் எது?

ஆ). பாடலில் அமைந்த மோனையை எடுத்து எழுதுக.

இ) எதுகைச் சொற்களை அடிக்கோடிடுக.

ஈ). காருகர் – பொருள் தருக.

உ). இப்பாடலில் காணப்படும் நறுமணப் பொருள்கள் யாவை?

அ). இவ்வடிகள் இடம்பெற்றுள்ள நூல் எது?

சிலப்பதிகாரம்

ஆ). பாடலில் அமைந்த மோனையை எடுத்து எழுதுக.

பகர்வனர் 

பட்டினும் 

பருத்தி

தூசும்

துகிரும்

இ) எதுகைச் சொற்களை அடிக்கோடிடுக.

பகர்வனர் 

நகர வீதியும்

பட்டினும் 

கட்டு

ஈ). காருகர் – பொருள் தருக.

காருகர் – நெய்பவர்

உ). இப்பாடலில் காணப்படும் நறுமணப் பொருள்கள் யாவை?

சந்தனம், அகில்.

18) ஆசிரியப்பாவின் பொது இலக்கணத்தை எழுதுக.

1. அளவடிகளைப் பெற்று வரும்
2. இயற்சீர் பயின்று வரும். பிற சீரும் வரும். 
3. ஆசிரியத் தளைகள் பயின்று வரும். பிற தளைகளும் கலந்து வரும்.
4. மூன்றடி முதல் பல அடிகள் வரை வரும்.
5. அகவலோசை பெற்று வரும்.
6. ஈற்றடியின் ஈற்றுச்சீர் ஏகாரத்தில் முடிவது சிறப்பு.

19) சங்க இலக்கியங்கள் காட்டும் அறங்கள் இன்றைக்கும் தேவையானவையே என்பதற்குச் சில எடுத்துக்காட்டுகள் தருக.

1. அறம் செய்வதில் வணிக நோக்கம் கூடாது
2. செங்கோல் போன்று ஆட்சி மேற்கொள்ளவேண்டும். 
3. நீர்நிலை பெருக்கி, நிலவளம் கண்டு, உணவுப்பெருக்கம் காண்பதும் அதனை அனைவருக்கும் கிடைக்கச் செய்வதும் அரசனின் கடமை ஆகும்
4. குற்றத்தின் அடிப்படையில் ஆராய்ந்து தண்டனை வழங்க வேண்டும்

போன்ற அறங்கள் இன்றைக்கும் தேவையானவையே.

20) ‘சுற்றுச்சூழலைப் பேணுவதே இன்றைய அறம்’ என்ற தலைப்பில், பெற்றோர் ஆசிரியர் கூட்டத்தில் பேசுவதற்கான உரைக்குறிப்பு ஒன்றை உருவாக்குக. (குறிப்பு : சுற்றுச்சூழல் மாசுபடுவதைத் தடுக்க சட்டங்கள் இயற்றப்பட்டு இருந்தாலும் ஒவ்வொருவரின் உள்ளத்திலும் ஏற்படும் மாற்றமே, சுற்றுச்சூழலைப் பாதுகாக்கும்)

சுற்றுச்சூழலைப் பேணுவதில் நாம் போதிய அக்கறை காட்டாமல் இருந்து வருகிறோம். சுற்றுச்சூழலைப் பாதுகாப்பதற்கு அரசு பல்வேறு சட்டங்களை இயற்றி நடைமுறைப்படுத்தி வந்தாலும், பொதுமக்களின் ஒத்துழைப்பு இன்மையால் சுற்றுச்சூழல் விதிகள் காற்றில் பறக்க விடப்படுகின்றன. இது மிகவும் கவலைக்குரியதாகும். அறநெறியில் நின்று வாழ்க்கை நடத்தியவர்கள் நம் முன்னோர். அவர்கள் இயற்கையோடு இயைந்த வாழ்க்கையை வாழ்ந்தனர். பூமியைத் தெய்வமாகவும் விலங்குகளை உற்ற தோழனாகவும் பாவித்தார்கள். காடுகளையும் காட்டு விலங்குகளையும் பாதுகாத்தார்கள். அவர்களது வாழ்க்கை நெறிகளைப் பின்பற்றி நாமும் இயற்கையோடு இயைந்த வாழ்வை வாழ வேண்டும். 

21) எவையெல்லாம் அறியேன் என்று கருணையன் கூறுகிறார்?

1. உயிர் பிழைக்கும் வழி அறியேன்.
2. உடலின் தன்மையை அறியேன்.
3. உணவுத் தேடும் வழி அறியேன்.
4. காட்டில் செல்லும் வழி அறியேன்.

22) கவிஞர் தாம் கூற விரும்பும் கருத்திற்கு ஏற்றவாறு தற்குறிப்பேற்ற அணி அமைவதை எடுத்துக்காட்டுக.

"ஆரெயில் நெடுங்கொடி ‘வாரல்’ என்பனபோல் மறித்துக் கைகாட்ட"

கோவலன் மதுரையில் கொலை செய்யப்படுவான் எனக் கருதி கொடிகள் கையசைத்து ‘இம்மதுரைக்குள் வரவேண்டா’ என்று தெரிவிப்பது போலக் காற்றில் அசைவதாகத் தம் குறிப்பைக் கொடியின் மீது ஏற்றிக் கூறுகிறார். எனவே, இது தற்குறிப்பேற்ற அணி ஆகும்.

23) ஜெயகாந்தன் தம் கதைமாந்தர்களின் சிறந்த கூறுகளைக் குறிப்பிடத் தவறுவதில்லை என்று அசோகமித்திரன் கூறுகிறார். இக்கூற்றை மெய்ப்பிக்கும் செயல் ஒன்றைத் ‘தர்க்கத்திற்கு அப்பால்’ கதைமாந்தர் வாயிலாக விளக்குக.

1. அவரின் வாழ்க்கை நிர்ணயிக்கப்பட்டது. அதைக் கொண்டாட விரும்பினார்.
2. பார்வையற்ற பிச்சைக்காரனின் அலுமினிய பாத்திரத்தில் இரண்டணாவை இட்டு மகிழ்ந்தார். டிக்கெட் விலை ஓரணா கூடியிருந்தது. இரண்டணா தர்மம் செய்து ஐந்து நிமிடத்திற்குள் ஒரு அணாவுக்கு யாசிக்கும் நிலை வந்ததை எண்ணினார்.
3. பிச்சைக்காரனின் அலுமினியப் பாத்திரத்தில் தான் இட்ட இரண்டணா தன்னுடையது என்றும், தனக்குச் சொந்தமில்லை என்றும், ஓரணா போட்டுவிட்டு இரண்டணா எடுத்துக் கொண்டால் என்ன என்றும் தனக்குள் தர்க்கம் புரிந்தார். 

3 மதிப்பெண் வினாக்கள், இயல் 8

 இயல் 8

3 மதிப்பெண் வினாக்கள்

1). சங்க இலக்கியங்கள் காட்டும் அறங்கள் இன்றைக்கும் தேவையானவையே என்பதற்குச் சில எடுத்துக்காட்டுகள் தருக.

இன்றைக்கும் தேவையான அறங்கள்

1. பலரும் புகழ் பெறுதல் வேண்டியே அறம் செய்கின்றனர். "இப்பிறப்பில் அறம் செய்தால் அதன் பயனை மறுபிறப்பில் பெறலாம் என்ற வணிக நோக்கம் கூடாது" என்ற அறம், இன்றைய புகழ் விரும்பிகளுக்குத் தேவையான அறமாகும்.
2. "ஆட்சியாளர், செங்கோல் போன்று நேரிய ஆட்சி மேற்கொள்ளவேண்டும். நீர்நிலை பெருக்கி, நிலவளம் கண்டு, உணவுப்பெருக்கம் காண்பதும் அதனை அனைவருக்கும் கிடைக்கச் செய்வதும் அரசனின் கடமை ஆகும்" என்ற அறம், இன்றைய ஆட்சியாளர்களுக்கு மிகவும் தேவையானதாகும்.
3.  "குற்றத்தின் அடிப்படையில் ஆராய்ந்து தண்டனை வழங்க வேண்டும்.  'அறங்கூறு அவையம்' துலாக்கோல் போல நடுநிலை மிக்கது" என்ற அறம், இன்றைய நீதிமான்களுக்கு மிகவும் அவசியமானதாகும்.
4.  "போரின் கொடுமையிலிருந்து பார்ப்பனர், பெண்டிர், நோயாளிகள், புதல்வர்களை பெறாதவர் ஆகியோருக்குத் தீங்கு வராமல் போர் புரிய வேண்டும். தம்மைவிட வலிமையில் குறைந்தவருடன் போர் செய்வது கூடாது" என்ற அறம், இன்றைய உலக நாடுகளுக்குப் பொருந்துவதாகும்.
5.  "தன்னுடைய மகிழ்ச்சியை மறந்து மற்றவர் மகிழ்ச்சியை நாடுவதுதான் உண்மையான மகிழ்ச்சி. செல்வத்துப் பயனே ஈதல் துய்ப்போம் எனில் தப்புந பலவே.  இரப்போர்க்கு ஈயாது வாழ்வதைவிட உயிரை விட்டுவிடுதல் மேலானது" என்ற அறம், இன்று அனைவரும் கடைப்பிடிக்க வேண்டிய அறம் ஆகும்.

2). ஆசிரியப்பாவின் பொது இலக்கணத்தை எழுதுக.

ஆசிரியப்பாவின் பொது இலக்கணம்

1. அளவடிகளைப் பெற்று வரும்
2. இயற்சீர் பயின்று வரும். பிற சீரும் வரும். ஆனால், நிரை நடுவாகிய வஞ்சியுரிச்சீர்கள் வாரா.
3. ஆசிரியத் தளைகள் பயின்று வரும். பிற தளைகளும் கலந்து வரும்.
4. குறைந்தது மூன்று அடிகளாகவும், புலவரின் மனக்கருத்திற்கேற்பப் பல அடிகளைப் பெற்றும் வரும்.
5. அகவலோசை பெற்று வரும்.
6. ஈற்றடியின் ஈற்றுச்சீர் ஏகாரத்தில் முடிவது சிறப்பு.

3). வாளித் தண்ணீர், சாயக்குவளை, கந்தைத் துணி, கட்டைத் தூரிகை - இச்சொற்களைத் தொடர்புபடுத்தி ஒரு பத்தி அமைக்க.

காலக்கழுதை

எங்கள் வீட்டுச் சாளரத்தின் கதவுகள் தேக்கு மரக்கட்டையால் ஆனவை.  கதவுகளில் தெருப்புழுதி வந்து ஒட்டியதாலும், கரையான் மண்வீடு கட்டியதாலும், முன்பு ஒருமுறை தண்ணீரால் கழுவிச் சுத்தம் செய்து சாயம் அடித்தேன்.  காலஓட்டத்தில் கதவுகளில் மீண்டும் தூசிபடிந்து கரையான் அரித்துக் காணப்படுகிறது. மீண்டும் கையில் வாளித் தண்ணீர் எடுத்துக்கொண்டேன். கந்தைத்துணியைத் தண்ணீரில் நனைத்துச் சுத்தம் செய்தேன். சாயக்குவளையில் கட்டைத்தூரிகையை நனைத்து, கதவுகளுக்குச் சாயம் அடித்தேன்.  எத்தனை முறை புழுதி வந்து படிந்தாலும், கரையான் அரித்தாலும், மீண்டும் மீண்டும் கதவைச் சுத்தம் செய்யும் எனது பணியைத் தொடர்ந்து செய்வேன்.

4). 'சுற்றுச்சூழலைப் பேணுவதே இன்றைய அறம்' என்ற தலைப்பில், பெற்றோர் ஆசிரியர் கூட்டத்தில் பேசுவதற்கான உரைக்குறிப்பு ஒன்றை உருவாக்குக.  (குறிப்பு : சுற்றுச்சூழல் மாசுபடுவதைத் தடுக்க சட்டங்கள் இயற்றப்பட்டு இருந்தாலும் ஒவ்வொருவரின் உள்ளத்திலும் ஏற்படும் மாற்றமே, சுற்றுச்சூழலைப் பாதுகாக்கும்)

உரைக்குறிப்பு

சுற்றுச்சூழலை பேணுவதே இன்றைய அறம்

பெற்றோர் ஆசிரியர் கூட்டத்திற்கு வருகை தந்திருக்கும் உங்கள் அனைவருக்கும் எனது பணிவான வணக்கத்தை தெரிவித்துக் கொள்கிறேன்.  நான் இப்போது 'சுற்றுச்சூழலைப் பேணுவதே இன்றைய அறம்' என்ற தலைப்பில் பேச இருக்கிறேன்.

நம்மைச் சுற்றியுள்ள உயிருள்ள, உயிரற்ற காரணிகளே சுற்றுச்சூழல் ஆகும். நாம் வாழும் பூமியை  மாசுபடுத்தாமல் வைத்திருக்க வேண்டியது நமது கடமை.  அறிவியல் வளர்ச்சியின் பக்கவிளைவுகளாகப் பல்வேறு தொழிற்சாலைகளும் வாகனங்களும் நமது சுற்றுச்சூழலை மிகவும் மாசுபடுத்தி வருகின்றன.  வளிமண்டலத்தில் கார்பனின் அளவு அதிகரித்து 'வெப்பமயமாதல்' நிகழ்வு ஏற்படுகிறது.  இதனால் பனிமலைகள் உருகுவதும், பருவகாலங்கள் மாறுவதும் அடிக்கடி நிகழ்கின்றன.  இதன் காரணமாக எழுகின்ற இயற்கைப் பேரழிவுகள், பெரிய அளவிலான உயிர்ச் சேதத்தையும் பொருட் சேதத்தையும் ஏற்படுத்துகின்றன.

தொழிற்சாலைக் கழிவுகள், வேதிப்பொருட்கள், அணுக்கழிவுகள் நிலத்தையும் நீரையும் மாசுபடுத்துகின்றன.  இவை மனிதர்களுக்கும் விலங்குகளுக்கும் பல்வேறு விதமான நோய்களை ஏற்படுத்துகின்றன. பயிர்களின் விளைச்சலைக் குறைக்கின்றன.  

சுற்றுச்சூழலைப் பேணுவதில் நாம் போதிய அக்கறை காட்டாமல் இருந்து வருகிறோம்.  சுற்றுச்சூழலைப் பாதுகாப்பதற்கு அரசு பல்வேறு சட்டங்களை இயற்றி நடைமுறைப்படுத்தி வந்தாலும், பொதுமக்களின் ஒத்துழைப்பு இன்மையால் சுற்றுச்சூழல் விதிகள் காற்றில் பறக்க விடப்படுகின்றன.  இது மிகவும் கவலைக்குரியதாகும்.  அறநெறியில் நின்று வாழ்க்கை நடத்தியவர்கள் நம் முன்னோர்.  அவர்கள் இயற்கையோடு இயைந்த வாழ்க்கையை வாழ்ந்தனர்.  பூமியைத் தெய்வமாகவும் விலங்குகளை உற்ற தோழனாகவும் பாவித்தார்கள்.  காடுகளையும் காட்டு விலங்குகளையும் பாதுகாத்தார்கள். அவர்களது வாழ்க்கை நெறிகளைப் பின்பற்றி நாமும் இயற்கையோடு இயைந்த வாழ்வை வாழ வேண்டும்.  நாம் அனைவரும் 'சுற்றுச்சூழலைப் பாதுகாப்போம்' என்ற உறுதிமொழியை ஏற்று சுயக்கட்டுப்பாட்டுடன் சுற்றுச்சூழலை மாசுபடுத்தாமல் இருந்தால் போதும்.  பூமியின் இழந்த அழகை மீட்க முடியும்.  பசுமையான உலகம் படைக்க ஒன்றிணைவோம், வாரீர்!

  இதுவரை நான் பேச வாய்ப்பளித்த அன்பு உள்ளங்களுக்கு, என் நன்றியை உரித்தாக்குகிறேன். நன்றி, வணக்கம்!

- மலர் மகேந்திரன்

3 மதிப்பெண் வினாக்கள், இயல் 9

 இயல் 9

3 மதிப்பெண் வினாக்கள்

1). ஜெயகாந்தன் தம் கதைமாந்தர்களின் சிறந்த கூறுகளைக் குறிப்பிடத் தவறுவதில்லை என்று அசோகமித்திரன் கூறுகிறார். இக்கூற்றை மெய்ப்பிக்கும் செயல் ஒன்றைத் 'தர்க்கத்திற்கு அப்பால்' கதைமாந்தர் வாயிலாக விளக்குக.

தர்க்கத்திற்கு அப்பால்...

வழக்கம்போல் தோல்வியை எண்ணி சென்றவர், அன்று தோற்றுப்போனார். அவரின் வாழ்க்கை நிர்ணயிக்கப்பட்டது. அதைக் கொண்டாட விரும்பினார். தன்னிடம் ஒரு ரூபாய் நாணயம் மட்டுமே இருந்தது. ஊர் திரும்ப முக்கால் ரூபாய் ஒதுக்கினார். இரண்டு அணாவில் காபி அருந்தினார். ஊர் திரும்பவதற்கு வைத்திருந்ந பன்னிரண்டணா போக கையில் இருக்கும் இரண்டு அணாவை 'ஒரு ராஜாவைப் போல' செலவு செய்ய நினைத்தார். 

பார்வையற்ற பிச்சைக்காரனின் அலுமினிய பாத்திரத்தில் அந்த இரண்டணாவை இட்டு மகிழ்ந்தார். உண்மையிலேயே அந்த நாலணாவில், அந்த நல்ல நாளைக் கொண்டாடிவிட்ட நிறைவில் டிக்கெட் கவுண்டரில் பன்னிரண்டணா கொடுத்து டிக்கெட் கேட்டார். டிக்கெட் விலை ஓரணா கூடியிருந்தது. இரண்டணா தர்மம் செய்து ஐந்து நிமிடத்திற்குள் ஒரு அணாவுக்கு யாசிக்கும் நிலை வந்ததை எண்ணி வாழ்க்கையின் தர்க்கத்தை உணர்ந்தார். பிச்சைக்காரனின் அலுமினியப் பாத்திரத்தில் தான் இட்ட இரண்டணா தன்னுடையது என்றும், தனக்குச் சொந்தமில்லை என்றும், ஓரணா போட்டுவிட்டு இரண்டணா எடுத்துக் கொண்டால் என்ன என்றும் தனக்குள் தர்க்கம் புரிந்தார். 

ஓரணா போட்டுவிட்டு இரண்டணா எடுத்துக்கொண்டார். "பார்வையற்ற என்னை ஏமாற்றாதே" என்ற பிச்சைக்காரனின் சொல்லில் நெருப்புக்கட்டியைக் கையில் எடுத்தது போல் உணர்ந்தார்; அந்த இரண்டணாவை அலுமினியத் தட்டில் உதறினார்; "தெரியாமல் எடுத்து விட்டேன்" என்று குறுகினார். அவர் போக வேண்டிய ரயில் வந்து போய்விட்டது.  அன்று தவறவிட்ட ரயில் விபத்துக்கு உள்ளானது. அந்த விபத்திலிருந்து அவர் தப்பித்தது, தர்க்கத்திற்கு அப்பாற்பட்டது.

2). "சித்தாளின் மனச்சுமைகள் செங்கற்கள் அறியாது" - இடஞ்சுட்டிப் பொருள் தருக.

சித்தாளின் மனச்சுமைகள் செங்கற்கள் அறியாது 

இடம்: நாகூர் ரூமி எழுதிய 'சித்தாளு' என்ற கவிதையில் இடம் பெற்றுள்ளது.

பொருள்: அடுத்த வேளை உணவுக்காக அலுக்காமல் கல்சுமக்கும் சித்தாளின் மனத்தில் எத்தகைய துயரங்கள் இருந்தாலும், அவற்றைத் தலையில் உள்ள செங்கற்கள் அறியாது.

3). எவையெல்லாம் அறியேன் என்று கருணையன் கூறுகிறார்?

'எவையெல்லாம் அறியேன்' என்று கருணையன் கூறியவை:

1. உயிர் பிழைக்கும் வழி அறியேன்.
2. நினைந்து கண்ட அறிவினுக்குப் பொருந்தியவாறு உறுப்புகள் இயங்குதல் இல்லாத இந்த உடலின் தன்மையை அறியேன்.
3. உடலுக்கு வேண்டிய உணவைத் தேடிக் கொணரும் வழிவகை அறியேன்.
4. காட்டில் செல்வதற்கான வழிகளையும் அறியேன்.

4). கவிஞர் தாம் கூற விரும்பும் கருத்திற்கு ஏற்றவாறு தற்குறிப்பேற்ற அணி அமைவதை எடுத்துக்காட்டுக.

தற்குறிப்பேற்ற அணி

அணி இலக்கணம்: இயல்பாய் நிகழும் நிகழ்ச்சியின் மீது கவிஞன் தன் குறிப்பை ஏற்றிக் கூறுவது தற்குறிப்பேற்ற அணி எனப்படும்.

எடுத்துக்காட்டு:

 'போருழந் தெடுத்த ஆரெயில் நெடுங்கொடி 'வாரல்' என்பனபோல் மறித்துக் கைகாட்ட'

பாடலின் பொருள்: கோட்டை மதில் மேல் இருந்த கொடியானது வரவேண்டாம் என தடுப்பது போல, கை காட்டியது என்பது பொருள்.

அணிப் பொருத்தம்: கோவலனும் கண்ணகியும் மதுரை மாநகருக்குள் சென்றபோது மதிலின் மேலிருந்த கொடிகள் காற்றில் இயற்கையாக அசைந்தன. ஆனால், இளங்கோவடிகள், கோவலன் மதுரையில் கொலை செய்யப்படுவான் எனக் கருதி கொடிகள் கையசைத்து 'இம்மதுரைக்குள் வரவேண்டா' என்று தெரிவிப்பது போலக் காற்றில் அசைவதாகத் தம் குறிப்பைக் கொடியின் மீது ஏற்றிக் கூறுகிறார். இவ்வாறு இயல்பாக நிகழும் நிகழ்ச்சியின் மீது கவிஞன் தன் குறிப்பை ஏற்றிக் கூறுவது தற்குறிப்பேற்ற அணி எனப்படும்.

3 மதிப்பெண் வினாக்கள், இயல் 7

 இயல் 7

3 மதிப்பெண் வினாக்கள்

1). "தலையைக் கொடுத்தேனும் தலைநகரைக் காப்போம்" இடஞ்சுட்டிப் பொருள் விளக்கம் தருக.

தலையைக் கொடுத்தேனும் தலைநகரைக் காப்போம்

இடம்: ம.பொ.சி. அவர்களின் 'எனது  போராட்டம்' என்னும் நூலில் இடம் பெற்றுள்ளது. ஆந்திர மாநிலத்தின் தலைநகராக சென்னை இருக்க வேண்டும் என்று ஆந்திரத் தலைவர்கள் கருதிய போது, அதை எதிர்த்து ம. பொ. சி. அவர்கள் சென்னை மாநகராட்சியின் சிறப்பு கூட்டம் ஒன்றைக் கூட்டி, "தலையைக் கொடுத்தேனும் தலைநகரைக் காப்போம்" என்று முழங்கினார்.

விளக்கம்: சென்னை மாகாணத்தில் இருந்து பிரித்து ஆந்திரம் அமைப்பதற்காக ஏற்படுத்தப்பட்டிருந்த நீதிபதி வாஞ்சு தலைமையிலான ஒருநபர் ஆணையம், ஆந்திரத்தின் தலைநகராகச் சென்னை இருக்க வேண்டும் என்ற இடைக்கால ஏற்பாட்டினைப் பரிந்துரைத்திருப்பதாக அதிகாரப்பூர்வமற்ற கருத்துக்கள் நிலவின. இதை எதிர்த்து ம.பொ.சி. அவர்கள், மாநகராட்சியின் சிறப்புக் கூட்டம் ஒன்றை அப்போதைய மாநகரத் தந்தை செங்கல்வராயன் தலைமையில் கூட்டி, சென்னை பற்றிய தீர்மானத்தை முன்மொழிந்து, "தலையைக் கொடுத்தேனும் தலைநகரைக் காப்போம்" என்று முழங்கினார்.

2). 'முதல் மழை விழுந்ததும் என்னவெல்லாம் நிகழ்வதாகக் கு. ப. ராஜகோபாலன் கவிபாடுகிறார்?

ஏர் புதிதா?

1. முதல் மழை விழுந்ததும் மேல்மண் பதம் ஆகிறது; வெள்ளி முளைக்கிறது; கிழக்கு வெளுக்கிறது. 
2. காளைகளை விரைந்து ஓட்டிக் கழனி செல்கின்றனர். பொழுதேறப் பொன்பரவும் ஏரடியில் நல்ல வேளையில் கொழுவை நாட்டுகின்றனர்.  
3. மாட்டைப் பூட்டிக் காட்டைக் கீறுகின்றனர். அவர்களின் ஏரும் காரும் புதிதன்று; நாளும் நட்சத்திரமும் புதிது; ஊக்கமும் உரமும் புதிது. 
4. மாட்டைத் தூண்டி, கொழுவை அமிழ்த்துகின்றனர். மண் புரளுகிறது; மழை பொழிகிறது; நிலம் சிலிர்க்கிறது; நாற்று நிமிர்கிறது; எல்லைத் தெய்வம் காவல் காக்கிறது.

3).  பின்வரும் பத்தியைப் படித்து மையக் கருத்தை எழுதுக.

பேரரசனது மெய்ப்புகழை எடுத்துக் கூறுவது மெய்க்கீர்த்தி. பொதுவான இது சோழ மன்னருடைய சாசனங்களின் தொடக்கத்தில் அரசனுடைய இத்தனையாவது ஆட்சியாண்டு என்று கூறுமிடத்துத் தொடக்கத்தில் அமைக்கப்பெறும். சிறப்பாக அவனுடைய போர் வெற்றிகளையும் வரலாற்றையும் முறையாகக் கூறி, அவன் தன் தேவியோடு வீற்றிருந்து நீடு வாழ்க எனக் கூறி, பிறகே சாசனம் எழுந்த நிகழ்ச்சியைக் குறிப்பிடும்.  

சோழ மன்னர் பரம்பரையில் மெய்க்கீர்த்தியோடு சாசனங்களைப் பொறிக்கும் பழக்கம் நெடுநாள் இருந்ததில்லை. முதல் இராசராசனுடைய எட்டாம் ஆண்டில் தான் மெய்க்கீர்த்தி காணப்படுகிறது. இதன்கண் வமிசப் பாரம்பரியம் விதந்து ஓதப்படவில்லை. ஏனைய பகுதிகள் உள்ளன.  எனினும், இது மிகவும் சுருக்கமாகவே உள்ளது.  இன்னும் பின்வந்த மெய்க்கீர்த்தி கோளின் வமிச பரம்பரை மிகவும் விரித்துக் கூறியுள்ளன.

மையக்கருத்து

பேரரசனது மெய்ப்புகழை எடுத்துக்கூறுவது மெய்க்கீர்த்தி. சோழ மன்னருடைய சாசனங்களில் அரசனுடைய ஆட்சி ஆண்டு, போர் வெற்றிகள், வரலாறு, வாழ்த்து, சாசனம் எழுந்த நிகழ்ச்சி ஆகியவை காணப்படும்.  முதல் இராஜராஜனுடைய எட்டாம் ஆண்டில் தான் மெய்க்கீர்த்தி காணப்படுகிறது. இதில் சோழ வமிச பாரம்பரியம் விதந்து ஓதப்படவில்லை. பின்னர் வந்த மெய்க்கீர்த்திகள் அவற்றை விரித்துக் கூறுகின்றன.

4). "பகர்வனர் திரிதரு நகர வீதியும்;

 பட்டினும் மயிரினும் பருத்தி நூலினும் 

கட்டு நுண்வினைக் காருகர் இருக்கையும்;

 தூசும் துகிரும் ஆரமும் அகிலும்" 

அ) இவ்வடிகள் இடம்பெற்றுள்ள நூல் எது?

ஆ). பாடலில் அமைந்த மோனையை எடுத்து எழுதுக.

இ) எதுகைச் சொற்களை அடிக்கோடிடுக.

ஈ). காருகர் - பொருள் தருக.

உ). இப்பாடலில் காணப்படும் நறுமணப் பொருள்கள் யாவை?

அ). இவ்வடிகள் இடம்பெற்றுள்ள நூல் எது?

சிலப்பதிகாரம்

ஆ). பாடலில் அமைந்த மோனையை எடுத்து எழுதுக.

பகர்வனர் 

பட்டினும் 

பருத்தி

தூசும்

துகிரும்

ஆர்வமும்

அகிலும்

இ) எதுகைச் சொற்களை அடிக்கோடிடுக.

பகர்வனர் 

நகர வீதியும்

பட்டினும் 

கட்டு

ஈ). காருகர் - பொருள் தருக.

காருகர் - நெய்பவர்

உ). இப்பாடலில் காணப்படும் நறுமணப் பொருள்கள் யாவை?

சந்தனம், அகில்.

5). அவந்தி நாட்டு மன்னன், மருத நாட்டு மன்னனுடன் போர் புரிந்து நாட்டைக் கைப்பற்ற நினைக்கிறான். அப்போர் நிகழ்வைப் புறப்பொருள் வெண்பாமாலை கூறும் இலக்கணத்தின் வழி விளக்குக.

1. அவந்தி நாட்டு மன்னன், மருத நாட்டு மன்னனுடன் போர் புரிந்து நாட்டைக் கைப்பற்ற நினைக்கிறான் - இது வஞ்சித் திணை ஆகும்.
2. வஞ்சித் திணை: மண்ணாசை காரணமாகப் பகைவர் நாட்டைக் கைப்பற்றக் கருதி, வஞ்சிப் பூவைச் சூடி போருக்குச் செல்வது வஞ்சித் திணை ஆகும்.
3. திணை விளக்கம்: அவந்தி நாட்டு மன்னன், மருத நாட்டைக் கைப்பற்ற விரும்புகிறான். மண்ணாசை காரணமாக வஞ்சிப் பூவைச் சூடி போருக்குச் செல்வதால், இது வஞ்சித்திணை ஆயிற்று.

3 மதிப்பெண் வினாக்கள், இயல் 6

 இயல் 6

3 மதிப்பெண் வினாக்கள்

1). படங்கள் வெளிப்படுத்தும் நிகழ்த்துகலை குறித்து இரண்டு வினாக்களையும் அவற்றுக்கான விடைகளையும் எழுதுக.

அ). தேவராட்டம் - குறிப்பு வரைக.

தேவராட்டம்

தேவராட்டம், வானத்துத் தேவர்கள் ஆடிய ஆட்டம் எனப் பொருள் கொள்ளப்படுகிறது. இது ஆண்கள் மட்டுமே ஆடும் ஆட்டம். 'உருமி' எனப் பொதுவாக அழைக்கப்படும் 'தேவதுந்துபி' தேவராட்டத்திற்கான இசைக்கருவி ஆகும். இந்தக் கலை, வேட்டி கட்டியும் தலையிலும் இடையிலும் சிறிய துணி கட்டியும் காலில் சலங்கை அணிந்தும் எளிய ஒப்பனையுடன் நிகழ்த்தப்படுகிறது. இவ்வாட்டத்தில் பெரும்பான்மையாக எட்டு முதல் பதின்மூன்று கலைஞர்கள் கலந்துகொள்ள வேண்டும் என்பது பொதுமரபாக உள்ளது.  தேவராட்டம் குறிப்பாகச் சடங்கு சார்பாக ஆடப்படுகிறது.

ஆ). கரகாட்டம் குறித்து எழுதுக.

கரகாட்டம்

பன்னெடுங்காலமாக மக்களால் விரும்பப்படும் மரபார்ந்த கலைகளில் ஒன்று கரகாட்டம். 'கரகம்' என்பது பித்தளைச் செம்பையோ, சிறிய குடத்தையோ தலையில் வைத்துத் தாளத்திற்கு ஏற்ப ஆடுவது, கரகாட்டம்.

கரகச் செம்பின் அடிப்பாகத்தை உட்புறமாகத் தட்டி, ஆடுபவரின் தலையில் நன்கு படியும்படி செய்கின்றனர். தலையில் செம்பு நிற்கும் அளவு எடையை ஏற்றுவதற்குச் செம்பில் மணலையோ பச்சரிசியையோ நிரப்புகின்றனர். கண்ணாடியாலும் பூக்களாலும் அழகுபடுத்திய கரகச் கூட்டின் நடுவில் கிளி பொம்மையை பொருத்திய மூங்கில் குச்சியைச் செருகி வைத்து ஆடுகின்றனர். நையாண்டி மேள இசையும் நாகசுரம், தவில், பம்பை போன்ற இசைக்கருவிகளும் இசைக்கப்படுகின்றன.  ஆணும் பெண்ணும் சேர்ந்து நிகழ்த்தும் கரகாட்டத்தில் சில நேரங்களில் ஆண், பெண் வேடமிட்டு ஆடுவதுண்டு. கரகாட்டம் நிகழ்த்துதலில் இத்தனை பேர்தான் நிகழ்த்த வேண்டும் என்ற வரையறை இல்லை.

2). நவீன கவிதையில் வெளிப்படும் நுண்மை உள்ளம், பூத்தொடுக்கும் நாட்டுப்புறப் பாடலில் வெளிப்படுகிறது. ஒப்பிட்டு எழுதுக.

Pdf வடிவில் பெற இங்கே தொடவும்

3). வைத்தியநாதபுரி முருகன் குழந்தையாக அணிந்திருக்கும் அணிகலன்களுடன் செங்கீரை ஆடிய நயத்தை விளக்குக.

முத்துக்குமாரசாமி பிள்ளைத்தமிழ்

1. திருவடியில் அணிந்த சிறு செம்பொன் கிண்கிணிகளோடு சிலம்புகளும் சேர்ந்து ஆடின. 
2. இடையில் அரைஞாண் மணியோடு ஒளி வீசுகின்ற அரைவடங்கள் ஆடின. 
3. பசும்பொன் என ஒளிரும் தொந்தியுடன் சிறு வயிறு சரிந்து ஆடியது.  
4. பட்டம் கட்டிய நெற்றியில் விளங்குகின்ற பொட்டுடன் வட்டவடிவமான சுட்டி பதிந்தாடியது. 
5. கம்பிகளால் உருவான குண்டலங்களும் காதின் குலைகளும் அசைந்தாடின. 
6. உச்சிக் கொண்டையும் அதைச்சுற்றிக் கட்டப்பட்டுள்ள ஒளிமிக்க முத்துக்களோடு ஆடியது. 
7. தொன்மையான வைத்தியநாதபுரியில் எழுந்தருளியுள்ள முருகனின் அழகிய பவளம் போன்ற திருமேனியும் ஆடியது.

4). 'கடற்கரையில் உப்புக் காய்ச்சுதல் நடைபெறுகிறது. மலைப் பகுதிகளில் மலைப் பயிர்களும் நிலப்பகுதிகளில் உழவுத் தொழிலும் நடைபெறுகின்றன'. - காலப் போக்கில் பல மாற்றங்கள் நிகழ்ந்த போதிலும், பண்டைத் தமிழரின் திணைநிலைத் தொழில்கள் இன்றளவும் தொடர்வதையும் அவற்றின் இன்றைய வளர்ச்சியையும் எழுதுக.

திணைத்தொழில்கள்- அன்றும் இன்றும்

1. குறிஞ்சி நிலத்தில், அன்று வேட்டையாடுதல், கிழங்கு அகழ்தல், தேன் எடுத்தல் போன்றவை நடைபெற்றன. இன்று குறிஞ்சி நிலம், வனத்துறையின் கட்டுப்பாட்டில் இருப்பதால், மலைவாழ் இன மக்கள் தேன் எடுத்தல், மூலிகைகள் சேகரித்தல், கைவினைப் பொருள்கள் தயாரித்தல் போன்ற தொழில்களில் ஈடுபட்டு வருகின்றனர்.  
2. முல்லை நிலத்தில் அன்று முதல் இன்று வரை கால்நடைகளை மேய்க்கும் தொழில் நடைபெற்று வருகிறது.  சிற்றூர்களில் மிகுதியான கால்நடைகள் வளர்க்கப்பட்டு வருகின்றன. பெரும் பண்ணைகளும் உருவாகியுள்ளன. தயிர், நெய் போன்றவற்றை உற்பத்தி செய்யும் பணியை இன்று பெருந்தொழிற்சாலைகள் செய்கின்றன.
3. மருதநிலத்தில் அன்று இயற்கை வேளாண்மையும், இன்று நவீனத் தொழில்நுட்பங்களுடன் கூடிய வேளாண்மையும் நடைபெற்று வருகிறது.
4. நெய்தல் நிலத்தில் அன்று முதல் இன்று வரை மீன்பிடித்தலும் உப்பு தயாரித்தலும் நடைபெற்று வருகிறது.  எனினும், இன்று இயந்திரப் படகுகளில் ஆழ்கடலுக்குச் சென்று நவீன வலைகளைப் பயன்படுத்தி மீன் பிடிக்கிறார்கள்.  மீன்களைப் பதப்படுத்துகிறார்கள். வெளிநாடுகளுக்கு ஏற்றுமதி செய்கிறார்கள்.
5. பாலை நிலத்தில் அன்று வழிப்பறி நடைபெற்றது. வழிப்பறி, இன்று சில இடங்களில் பரவலாக நடைபெறுகிறது.

5). வள்ளுவம் , சிறந்த அமைச்சருக்குக் கூறிய இலக்கணங்கள் நமக்கும் பொருந்துவதைக் குறள் வழி விளக்குக.

அமைச்சு 

1. ஒரு செயலைச் செய்வதற்குத் தேவையான கருவி, அதற்கு ஏற்ற காலம், செயலின் தன்மை, செய்யும் முறை ஆகியவற்றை அறிந்து செய்பவரே அமைச்சர் ஆவார். 
2. மனவலிமை, குடிகளைக் காத்தல், ஆட்சிமுறைகளைக் கற்றல், நூல்களைக் கற்றல், விடாமுயற்சி ஆகிய ஐந்தும் சிறப்பாக அமைந்தவரே அமைச்சர் ஆவார்.
3. இயற்கையான நுண்ணறிவும் நூலறிவும் பெற்றிருப்பவரே அமைச்சர் ஆவார்.
4. ஒரு செயலைச் செய்வதற்குரிய முறைகளை அறிந்திருப்பினும் உலகியல் நடைமுறைகளை அறிந்து செய்பவரே அமைச்சர் ஆவார். 

நாமும் ஒரு செயலைச் செய்வதற்கு முன், அச்செயலைச் செய்வதற்கான கருவி, அதற்கு ஏற்ற காலம், அச்செயலின் தன்மை, அச்செயலைச் செய்யும் முறை ஆகியவற்றை அறிந்து செய்ய வேண்டும்.  நமக்கும் மனவலிமை, குடிமக்களைக் காத்தல், ஆட்சி முறைகளைக் கற்றல், நூல்களைக் கற்றல், விடாமுயற்சி ஆகிய இயல்புகள்  தேவை. நாமும் ஒரு செயலைச் செய்யும் போது, உலகியல் நடைமுறைகளை அறிந்து செய்ய வேண்டும். இயற்கையான நுண்ணறிவுடன் நூலறிவையும் வளர்த்துக் கொண்டால் வாழ்வில் சிறக்கலாம். இவ்வாறாக வள்ளுவம், சிறந்த அமைச்சருக்குக் கூறிய இலக்கணங்கள் நமக்கும் பொருந்துவதை அறியலாம்.

6). பலரிடம் உதவி பெற்றுக் கடின உழைப்பால் முன்னேறிய ஒருவர், அவருக்கு உதவிய நல்ல உள்ளங்களையும் சுற்றங்களையும் அருகில் சேர்க்கவில்லை. அவருக்கு உணர்த்தும் நோக்கில் வள்ளுவர் குறிப்பிடும் கருத்துகள் யாவை?

தமக்கு உதவிய நல்ல உள்ளங்களையும் சுற்றங்களையும் அருகில் சேர்க்காதவருக்கு வள்ளுவர் கூறும் அறிவுரை:

1. சுற்றத்தாருடன் ஒருவர், அன்பு இல்லாமலும், பொருந்திய துணை இல்லாமலும், வலிமை இல்லாமலும், இருந்தால் அவர் எப்படிப் பகைவரின் வலிமையை எதிர்கொள்வார்?
2. மனத்தில் துணிவு இல்லாதவராய், அறிய வேண்டியவற்றை அறியாதவராய், பொருந்தும் அன்பு இல்லாதவராய், பிறர்க்குக் கொடுத்து உதவாதவராய் இருந்தால் எளிதில் பகைக்கு ஆட்பட நேரிடும்.

3 மதிப்பெண் வினாக்கள், இயல் 5

 இயல் 5

3 மதிப்பெண் வினாக்கள்

1). ஐ.நா. அவையில் ஒருவர் பேசினால் அவரவர் மொழிகளில் புரிந்து கொள்வதற்கு வசதி செய்யப்பட்டிருக்கிறது. மொழிபெயர்ப்பு (translation) என்பது எழுதப்பட்டதை மொழிபெயர்ப்பது; ஆனால் ஒருவர் பேசும்போது மொழிபெயர்ப்பது, விளக்குவது (interpreting) என்றே சொல்லப்படுகிறது. ஐ.நா. அவையில் ஒருவர் பேசுவதை மொழிபெயர்க்கும் மொழிபெயர்ப்பாளர் பார்வையாளர்களுக்குத் தெரியாதபடி வேறு இடத்தில் இருப்பார். ஒருவர் பேசுவதைக் காதணிக் கேட்பியில் (headphone) கேட்டபடி சில நொடிகளில் மொழிபெயர்த்து ஒலிவாங்கி வழியே பேசுவார்.  அவையில் உள்ள பார்வையாளர்கள் முன் உள்ள காதணிக்கேட்பியை எடுத்துப் பொருத்திக் கொண்டு அவரது மொழியில் புரிந்து கொள்வார். 

 இப்பகுதியில் இருந்து ஐந்து வினாக்களை உருவாக்குக.

1. ஐ.நா. அவையில் ஒருவர் பேசினால் அவரவர் மொழிகளில் புரிந்து கொள்வதற்கு வசதி செய்யப்பட்டிருக்கிறதா?
2. மொழிபெயர்ப்பது என்பது யாது?
3. விளக்குவது என்பது யாது?
4.  ஐ.நா. அவையில் ஒருவர் பேசுவதை மொழிபெயர்க்கும் மொழிபெயர்ப்பாளர் எங்கு அமர்ந்திருப்பர்?
5. ஐ.நா. அவையில் காதணிக்கேட்பியின் பயன்பாடு யாது?

2). மன்னன், இடைக்காடனார் என்ற புலவனுக்குச் சிறப்புச் செய்தது ஏன்? விளக்கம் தருக.

இடைக்காடன் பிணக்குத் தீர்த்த படலம்

பாண்டிய நாட்டை ஆண்ட குசேல பாண்டியன் என்னும் மன்னன் தமிழ்ப்புலமையில் சிறந்து விளங்கினான். கபிலரின் நண்பரான இடைக்காடனார் என்னும் புலவர், தாம் இயற்றிய கவிதையினை மன்னன்முன்பு பாட, அதைப் பொருட்படுத்தாமல் மன்னன் புலவரை அவமதித்தான். மனம் வருந்திய இடைக்காடனார், இறைவனிடம் முறையிட்டார். மன்னனின் பிழையை உணர்த்துவதற்காக இறைவன் கடம்ப வனக் கோவிலைவிட்டு நீங்கி, வடதிரு ஆலவாயில் சென்று தங்கினார்.  இதை அறிந்த மன்னன் தன் பிழையைப் பொறுத்தருளுமாறு இறைவனை வேண்டி, இடைக்காடனாருக்குச் சிறப்புச் செய்தார். இறைவனும் கோவிலுக்குத் திரும்பினார்.

3). முயற்சி திருவினையாக்கும் முயற்சி இன்மை

இன்மை புகுத்தி விடும் - இக்குறட்பாவில் அமைந்துள்ள பொருள்கோளின் வகையைச் சுட்டி விளக்குக.

முயற்சி திருவினை யாக்கும் முயற்சியின்மை 

இன்மை புகுத்தி விடும் - இக்குறட்பாவில் 'ஆற்றுநீர்ப் பொருள்கோள்' அமைந்துள்ளது.  

இலக்கணம்: பாடலின் தொடக்கம் முதல் முடிவு வரை ஆற்றின் போக்கைப் போல நேராகவே பொருள் கொள்ளுமாறு அமைவது 'ஆற்றுநீர்ப் பொருள்கோள்' ஆகும்.

விளக்கம்: "முயற்சி செல்வத்தைத் தரும். முயற்சி இல்லாமை வறுமையை உண்டாக்கும்" என்பது இக்குறட்பாவில் பொருளாகும். ஆற்று நீரின் போக்கைப் போல இக்குறட்பாவில் தொடக்கம் முதல் இறுதிவரை நேராக வைத்துப் பொருள் கொள்ளுமாறு அமைந்துள்ளதால், இது ஆற்றுநீர்ப் பொருள்கோள் ஆகும்.

4). உங்களுடன் பயிலும் மாணவர் ஒருவர் பள்ளிப் படிப்பைப் பாதியில் நிறுத்தி வேலைக்குச் செல்ல விரும்புகிறார் . அவரிடம் கற்பதன் இன்றியமையாமையை எவ்வகையில் எடுத்துரைப்பீர்கள்?

கல்வி கற்பதன் இன்றியமையாமை

இளமைப் பருவமே கல்வி கற்க ஏற்ற பருவம். அதனால்தான், 'இளமையில் கல்' என்றார்கள்.

'கற்றோர்க்குச் சென்ற இடமெல்லாம் சிறப்பு' என்பதை உணர்ந்து படிப்பைப் பாதியில் விடும் எண்ணத்தைக் கைவிடு.

கல்வி ஒருவனை மட்டும் மேம்படுத்தாது, அவனைச் சார்ந்த சமுதாயத்தையும் மேம்படுத்தும் என்பதை நினைவில் கொள்.

'கற்கை நன்றே கற்கை நன்றே பிச்சை புகினும் கற்கை நன்றே' என்று கல்வி கற்பதன் அவசியத்தை  வலியுறுத்துகிறது, வெற்றிவேற்கை.

இன்று நீ வேலைக்குச் சென்றால், உனக்குக் கிடைக்கும் தொகை பெரியதாகத் தோன்றும்.  ஆனால், உன்னுடைய எதிர்காலம் வீணாகும். இந்த இளம் வயதில் நீ கற்கும் கல்வி 'பசுமரத்தாணி போல' உன் மனத்தில் பதிந்திருக்கும்.  அது, உன் எதிர்கால வாழ்வைச் செம்மைப்படுத்தும்.

அருளினைப் பெருக்கி, அறிவைச் சீராக்கி, மயக்கம் அகற்றி, அறிவுக்குத் தெளிவு தந்து உயிருக்கு அரிய துணையாய் இன்பம் சேர்ப்பது கல்வியாகும். எனவே, அதைப் போற்றிக் கற்க வேண்டும்.

3 மதிப்பெண் வினாக்கள், இயல் 4

 இயல் 4

3 மதிப்பெண் வினாக்கள்

1). இன்றைய அறிவியல் கண்டுபிடிப்புகள் மனிதனை மேம்படுத்துகின்றனவா என்பது குறித்த சிந்தனைகளை முன்வைத்து எழுதுக.

 

மனிதனை மேம்படுத்தும் அறிவியல் கண்டுபிடிப்புகள்

சுற்றுப்புறத்தை உற்றுநோக்கிப் பகுத்தாராயும் மனிதன், பல அறிவியல் கண்டுபிடிப்புகளை நிகழ்த்தி வருகிறான். தகவல் தொழில்நுட்ப வளர்ச்சியின் பயனாக, அலுவலகப் பணிகளை வீட்டிலிருந்தே செய்ய முடிகிறது.  விண்ணிற்கு செயற்கைக்கோள்களை ஏவி, பூமியின் காலநிலை மாற்றங்களை முன்கூட்டியே அறிந்து, திட்டமிட்டுச் செயல்பட முடிகிறது.  ஆழ்கடல் ஆராய்ச்சியிலும், விண்வெளித் தொழில்நுட்பத்திலும், அணுக்கரு உலைகளிலும் இயந்திர மனிதனின் பங்கு அளவிடற்கரியது.

செயற்கை நுண்ணறிவுடன் கூடிய இயந்திர மனிதன் ஆசிரியராக, வங்கி உதவியாளராக, போக்குவரத்துக் காவலராக, கால்நடைப் பராமரிப்பாளராக,  நுட்பமான அறுவைச் சிகிச்சைகளை மேற்கொள்ளும் மருத்துவராகப் பணியாற்றி மனித வாழ்வை வளப்படுத்துகிறான்.  மின் வணிகம், காணொலி வழி மருத்துவ ஆலோசனை, அரசுத்துறைகளின் மின்னணு முறையிலான சேவைகள் முதலியவை மக்களுக்குப் பெரிதும் பயன்தருகின்றன.

நவீன அறிவியலின் தாக்கத்தால் புதிது புதிதான நோய்களுக்கான காரணங்களைக் கண்டறிந்து முறையான சிகிச்சைகளை அளிக்க முடிகிறது. இன்றைய அறிவியல் கண்டுபிடிப்புகள், கடினமான பணிகளை எளிதாக்குகின்றன; கால விரயத்தைத் தடுக்கின்றன; மனிதனின் கவலைகளைப் போக்கி, மகிழ்ச்சியான, நிறைவான வாழ்விற்கு அடித்தளம் அமைக்கின்றன.

2). மனிதர்களின் மூளையைப் போன்றது, செயற்கை நுண்ணறிவு கொண்ட கணினியில் மென்பொருள். மனிதனைப் போலவே பேச, எழுத, சிந்திக்க இத்தொழில்நுட்பம் மேம்படுத்தப்படுகிறது. இதனால் மனித குலத்துக்கு ஏற்படுகின்ற நன்மைகளைப் பற்றி அறிவியல் இதழ் ஒன்றுக்கு எதிர்காலத் தொழில்நுட்பம் என்ற தலைப்பில் எழுதுக.

எதிர்காலத் தொழில்நுட்பம்

செயற்கை நுண்ணறிவு கொண்ட ரோபோக்கள் மனிதர்களால் செய்ய இயலாத, அலுப்புத் தட்ட கூடிய, கடினமான செயல்களைச் செய்யும். மனித முயற்சிக்கு உயிராபத்தை விளைவிக்கக் கூடிய செயல்களையும் செய்யும்.  குழந்தைகளைப் பாதுகாப்பது, பராமரிப்பது முதல் வயதானவர்களுக்கு உற்ற தோழனாய் இருப்பது வரை அனைத்தையும் செயற்கை நுண்ணறிவு கொண்ட ரோபோக்களே செய்யும்.

விடுதிகளில், வங்கிகளில், அலுவலகங்களில் தற்போது மனிதர் அளிக்கும் சேவைகளை ரோபோக்கள் அளிக்கும். மேலும், நம்முடன் உரையாடுவது, ஆலோசனை வழங்குவது, பயண ஏற்பாடு செய்து தருவது, தண்ணீர் கொண்டு வந்து தருவது, உடன் வந்திருக்கும் குழந்தைகளுக்கு வேடிக்கை காட்டுவது எனப் பலவற்றை செய்யும்.

எதிர்காலத்தில் நாம் அனைவரும் செயற்கை நுண்ணறிவு கொண்ட ஊர்திகளில் பயணம் செய்வோம்.  அதனால் விபத்துக்கள் குறையும்; எரிபொருள் மிச்சப்படும்; பயண நேரம் குறையும்.  செயற்கை நுண்ணறிவு கொண்ட மென்பொருட்கள் நமக்கு கதைகள்,கவிதைகள் கூறும். நம்முடைய மனநிலை அறிந்து, இனிய பாடல்களைப் பாடி நம்மை மகிழ்விக்கும்.  நோய்களை முன்கூட்டியே கண்டறிந்து, தேர்ந்த மருத்துவரைப் போல சிகிச்சை அளிக்கும்.  

3). "மாளாத காதல் நோயாளன் போல்" என்னும் தொடரில் உள்ள உவமை சுட்டும் செய்தியை விளக்குக.

மாளாத காதல் நோயாளன் போல்

உவமை: உடலில் ஏற்பட்ட புண்ணை மருத்துவர் கத்தியால் அறுத்துச் சுட்டலும், அது நன்மைக்கே என்று உணர்ந்த நோயாளி, மருத்துவரை நேசிப்பது போல.

உவமை உணர்த்தும் செய்தி: வித்துவக்கோட்டில் எழுந்தருளியிருக்கும் அன்னை போன்ற இறைவன், தமது விளையாட்டால் நீங்காத துன்பத்தைத் தந்தாலும், அடியவனாகிய நான், அவனது அருளையே எப்போதும் எதிர்பார்த்து வாழ்கிறேன் என்று குலசேகர ஆழ்வார் வேண்டுகிறார்.

4). நேற்று இரவு பெய்த மழை எல்லாம் தொட்டியை நிறைத்திருந்தது. வாழைத்தோப்பில் குட்டியுடன் நின்றிருந்த மாடு கத்தியது; தந்தை என்னிடம், "இலட்சுமி கூப்பிடுகிறாள், போய் பார்" என்றார். "இதோ சென்று விட்டேன்" என்றவாற அங்குச் சென்றேன்.  துள்ளிய குட்டியைத் தடவிக்கொடுத்து, "என்னடா விளையாட வேண்டுமா?" என்று கேட்டு, அவனை அவிழ்த்துவிட்டேன்.  என் தங்கை அங்கே வந்தாள்.  அவளிடம், "நீயும் இவனும் விளையாடுங்கள்" என்று கூறினேன். அவிழ்த்துவிடப்பட்ட இலட்சுமி தொட்டியிலிருந்த நீரைக் குடித்தாள். இப்பத்தியிலுள்ள வழுவமைதிகளைப் பட்டியலிட்டு எழுதுக.

வழுவமைதிகள்

1. நிறைத்திருந்தது- 'நிறைத்தது' என்று 'இறந்த காலத்தில்' வந்திருக்க வேண்டும். 'நிறைத்திருந்தது' என்று இறந்தகாலத் தொடர்ச் சொல்லாக வந்துள்ளது. எனவே, இது 'கால வழுவமைதி' ஆகும்
2. வாழைத்தோப்பு- வாழைத்தோட்டம் என்பதே மரபு. 'வாழைத்தோப்பு' என்ற சொல்லில், மரபு மீறப்பட்டுள்ளது. எனவே, இது 'மரபு வழுவமைதி' ஆகும்.
3. குட்டியுடன் நின்றிருந்த மாடு-'குட்டி' என்பதற்குப் பதிலாக 'கன்று' என்று வந்திருக்க வேண்டும். கன்றைக்  'குட்டி' என்று கூறியமை மரபை மீறியதாகும். எனவே, இது 'மரபு வழுவமைதி' ஆகும்.
4. இலட்சுமி கூப்பிடுகிறாள்- 'இலட்சுமி கூப்பிடுகிறது' என்று வந்திருக்க வேண்டும். அஃறிணையை உயர்திணையாகக் கூறியமையால், இது 'திணை வழுவமைதி' ஆகும்.
5. இதோ சென்றுவிட்டேன்- 'இதோ செல்கிறேன்' என்று வந்திருக்க வேண்டும். நிகழ்கால வினைமுற்றுக்குப் பதில், இறந்தகால வினைமுற்று வந்துள்ளதால், இது 'கால வழுவமைதி' ஆகும்.
6. துள்ளிய குட்டியை- 'துள்ளிய கன்றை' என்று வந்திருக்க வேண்டும். கன்றைக் 'குட்டி' என்று கூறியமை மரபை மீறியதாகும். எனவே, இது 'மரபு வழுவமைதி' ஆகும்.
7. என்னடா விளையாட வேண்டுமா?- அஃறிணையை (கன்றை) உயர்திணையாகக் (தோழனாக) கூறியமையால், இது 'திணை வழுவமைதி' ஆகும்.
8. அவனை அவிழ்த்து விட்டேன்- 'அதை அவிழ்த்து விட்டேன்' என்று வந்திருக்க வேண்டும். அஃறிணையை உயர்திணையாகக் கூறியமையால், இது 'திணை வழுவமைதி' ஆகும்.
9. நீயும் இவனும் விளையாடுங்கள்- 'நீ இதனுடன் விளையாடு' என்று வந்திருக்க வேண்டும். அஃறிணை முன்னிலைப் பெயர், உயர்திணை முன்னிலைப் பெயராக வந்துள்ளது. எனவே, இது 'திணை வழுவமைதி' ஆகும்.
10. இலட்சுமி நீரைக் குடித்தாள்- 'இலட்சுமி நீரைக் குடித்தது' என்று வந்திருக்க வேண்டும்.  அஃறிணை வினைமுற்று, உயர்திணை வினைமுற்றாக வந்துள்ளதால், இது 'திணை வழுவமைதி' ஆகும்.

3 மதிப்பெண் வினாக்கள், இயல் 3

 இயல் 3

3 மதிப்பெண் வினாக்கள்

1). முல்லை நிலத்தில் இருந்தும் மருத நிலத்தில் இருந்தும் கிடைக்கும் உணவுப் பொருட்கள் யாவை?

முல்லை நில உணவுப் பொருட்கள்:

வரகு, தினை, சாமை, முதிரை, மூங்கில் அரிசி, நெய், பால், வெள்ளாட்டு இறைச்சி முதலியன.

மருத நில உணவுப்பொருட்கள்:

செந்நெல், வெண்ணெல், அவல், பழைய சோறு, பெட்டைக் கோழிப் பொரியல், நண்டுக்குழம்பு, பலாப்பழம், இளநீர், வாழைப்பழம், பீர்க்கங்காய், வள்ளிக்கிழங்கு, நுங்கு முதலியன.

2). புதிதாக வருவோர் இரவில் தங்குவதற்கு வீட்டின் முன்புறம் திண்ணையும் அதில் தலை வைக்கத் திண்டும் அமைத்தனர்.

 திருவிழாக்காலங்களில் ஊருக்கு வரும்போது புதியவர்களையும் அழைத்து அன்போடு விருந்தளிப்பதைச் சில இடங்களில் காணமுடிகிறது. 

இப்படியாகக் காலமாற்றம் தமிழர் விருந்தோம்பலில் ஏற்படுத்திய மாற்றங்கள் குறித்த கருத்துக்களை எழுதுக.

காலமாற்றம், தமிழர் விருந்தோம்பலில் ஏற்படுத்திய மாற்றங்கள்:

புதியதாக வருவோரை விருந்தினராக ஏற்பதைத் தவிர்த்து, ஓரளவு தெரிந்தவர், உற்றார் உறவினர், நண்பர்களை மட்டும் விருந்தினராக ஏற்கின்றனர்.  திருடர் பயம் அதிகம் என்பதால், வீட்டிற்குச் சுற்றுச்சுவரும், கண்காணிப்பு ஒளிப்படக் கருவியும் அமைக்கின்றனர்.  புதிதாக வருவோர் இரவில் தங்குவதற்கு, சத்திரங்களும் கோவில்களும் இடமளிக்கின்றன.

தெருவோரப் பிச்சைக்காரர்களுக்கு நல்ல உள்ளம் படைத்த சிலர், உணவும் உடையும் அளிக்கின்றனர்.  கோவிலுக்குச் செல்லும் பக்தர்கள், அங்குள்ள பிச்சைக்காரர்களுக்குத் தானம் அளிக்கின்றனர்.  

இல்லங்களில் நடைபெற்ற விருந்தோம்பல் இன்று ஆதரவற்றோர் இல்லங்களுக்கு இடம்பெயர்ந்துள்ளது. பிறந்தநாள் விழா, தீபாவளி, பொங்கல் நாள் விழா போன்றவற்றை முன்னிட்டு ஒருசிலர், ஆதரவற்றோர் இல்லங்களுக்குச் சென்று உணவு, புத்தாடை, பட்டாசு முதலியவற்றை வழங்கி, மகிழ்ச்சி அடைகின்றனர்.  திருமண விழாக்கள் மற்றும் உணவகங்களில் மீதம் ஆகிப்போன உணவுகளை ஆதரவற்றவர்களுக்கு அளித்து மனநிறைவு அடைகின்றனர்.

வீட்டில் நடைபெற்ற விழாக்கள், திருமண மண்டபங்களுக்கு இடம்பெயர்ந்துள்ளன. பண்பாட்டு மாற்றமாக இன்று சில இடங்களில் விருந்தினர்களை வரவேற்பது முதல் வழி அனுப்பும் வரை திருமண ஏற்பாட்டாளர்களே செய்கின்றனர்.

3). கூத்தனைக் கூத்தன் ஆற்றுப்படுத்துதலைக் கூத்தராற்றுப்படை எவ்வாறு காட்டுகிறது?

கூத்தராற்றுப்படை

நன்னனைப் புகழ்ந்து பாடிப் பரிசில் பெற்ற கூத்தர், பரிசில் பெறப்போகும் கூத்தரைக் கானவர்களின் வளம் நிறைந்த புதுவருவாயை உடைய சிற்றூர்களில் தங்கி உணவு பெறுவதற்கு வழிப்படுத்துகிறார்.

"பகலில் இளைப்பாறிச் செல்லுங்கள்; இரவில் சேர்ந்து தங்குங்கள்; எரியும் நெருப்பைப் போல ஒளிரும் பூங்கொத்துக்களைச் சுற்றத்தோடு அணிந்து கொள்ளுங்கள்; சிவந்த பூக்களைக் கொண்ட அசோக மரங்களை உடைய பொருத்தமான பாதையில் செல்லுங்கள்; அசையும் மூங்கில்கள் ஓசை எழுப்பும் கடினப்பாதையில் சென்று மலைச்சரிவில் உள்ள சிற்றுரை அடையுங்கள். அங்குள்ளவர்களிடம், 'பகையைப் பொறாமல் போர் செய்யும் வலிய முயற்சியும் மானமும் வெற்றியும் உடைய நன்னனின் கூத்தர்கள் என்று சொல்லுங்கள்.

அதன் பிறகு நீங்கள் உங்கள் வீட்டிற்குள் போவது போலவே அவர்களுடைய வீட்டிற்குள் உரிமையுடன் நுழையுங்கள். உறவினர் போலவே அவர்கள் உங்களுடன் பழகுவர்.  நீண்ட வழியைக் கடந்து வந்த உங்களின் துன்பம் தீர இனிய சொற்களைக் கூறுவர். அங்கே, நெய்யில் வெந்த மாமிசத்தின் பொரியலையும் தினைச் சோற்றையும் உணவாகப் பெறுவீர்கள்".

4). 'கண்ணே கண்ணுறங்கு!

காலையில் நீ எழும்பு!

மாமழை பெய்கையிலே 

மாம்பூவே கண்ணுறங்கு!

பாடினேன் தாலாட்டு!

ஆடி ஆடி ஓய்ந்துறங்கு!

-இத்தாலாட்டுப் பாடலில் அமைந்துள்ள தொடர் வகைகளை எழுதுக.

தொடர் வகைகள்

1. கண்ணே கண்ணுறங்கு - விளித்தொடர்
2. காலையில் நீ எழும்பு! - ஐந்தாம் வேற்றுமைத் தொகாநிலைத் தொடர்.
3. மாமழை பெய்கையிலே - உரிச்சொற்றொடர்.
4. மாம்பூவே கண்ணுறங்கு! - விளித்தொடர்
5. பாடினேன் தாலாட்டு! - வினைமுற்றுத் தொடர்.
6. ஆடி ஆடி ஓய்ந்துறங்கு! - அடுக்குத்தொடர்.

5). வேலொடு நின்றான் இடுவென் றதுபோலும் கோலொடு நின்றான் இரவு - இக்குறளில் பயின்று வரும் அணியை விளக்குக.

வேலொடு நின்றான் இடுவென் றதுபோலும் 

கோலொடு நின்றான் இரவு.  இக்குறளில் 'உவமை அணி' பயின்று வந்துள்ளது.

அணியிலக்கணம்: ஒன்றை மற்றொன்றுடன் ஒப்புமைப்படுத்தும் போது, 'உவமை' ஒரு தொடராகவும், 'பொருள்' ஒரு தொடராகவும் அமைந்து இடையில் 'உவம உருபு' இடம் பெறுவது உவமை அணியாகும்.

விளக்கம்:

உவமை: வேலொடு நின்றான் இடுவென் றது

பொருள்: கோலொடு நின்றான் இரவு

உவம உருபு: போலும்

 

செங்கோலைக் கையில் ஏந்தி அரசன்,  குடிமக்களிடம் பொருள் கேட்பது, 'கள்வன்' வேலினைக் கையிலேந்தி வழிப்பறி செய்வதைப் போன்றது.

6). கவிதையைத் தொடர்க.

தண்ணீர் நிறைந்த குளம்

தவித்தபடி வெளிநீட்டும் கை

கரையில் கைபேசி படமெடுத்தபடி

கண்ணோட்டம் இல்லாத கைபேசிகள்!

காண்போர் யாவரும் கோமாளிகள்!!

விரைந்து சென்று உதவிடுவோம்!

விலையில்லா உயிரதைக் காத்திடுவோம்!!

3 மதிப்பெண் வினாக்கள், இயல் 2

 இயல் 2

3 மதிப்பெண் வினாக்கள்

1). உயிராக நான், பல பெயர்களில் நான், நான்கு திசையிலும் நான், முந்நீர் நாவாய் ஓட்டியாக நான்... முதலிய தலைப்புகளில் 'காற்று' தன்னைப் பற்றிப் பேசுகிறது.  இவ்வாறு 'நீர்' தன்னைப் பற்றிப் பேசினால்... உங்களுடைய கற்பனையில் தலைப்புகளை எழுதுக.

நீர் - தன் வரலாறு கூறுதல்

குறிப்புச் சட்டகம்

1. அமிழ்தாக நான்
2. ஆற்றலாக நான்
3. இலக்கியத்தில் நான்
4. உருமாறும் நான் 
5. சடங்குகளில் நான் 
6. பல பெயர்களில் நான்

2). சோலைக் காற்றும் மின்விசிறிக் காற்றும் பேசிக்கொள்வது போல் ஓர் உரையாடல் எழுதுக.

(சோலைக்காற்றும் மின்விசிறிக்காற்றும் பேசிக் கொள்கின்றன)

சோலைக் காற்று: மலைவீழ் அருவியும், குளிர்பூஞ்சோலையும், ஓங்குயர் மரங்களுமே எனது பிறப்பிடமும் இருப்பிடமும் ஆகும்.

மின்விசிறிக் காற்று: மின்னோட்டத் தூண்டுதலில் பிறந்து, அறைகளின் சுவர்களுக்கு இடையே முடங்குகிறேன்.

சோலைக் காற்று: குளிரிளந்தென்றலாய் நறுமண மலர்களைப் பருகி வரும் என்னில், உலவி மகிழ மாலையில் கூடுவர், மனிதர்.

மின்விசிறிக் காற்று: வெதுவெதுப்பான இதந்தரும் என்னில், வேண்டும் போதெல்லாம் வியர்வை துடைத்துக் களைப்பைப் போக்குவர், மனிதர்.

சோலைக் காற்று: கவிஞர்கள் என் அருமை உணர்ந்து கவிதை வடிப்பர்.  கற்பனையில் என்னைத் தூது விடுப்பர்.

மின்விசிறிக் காற்று: மின்சாரம் இன்றி நான் இல்லை.  எனினும்,  நான் இன்றி அலுவலகமே இல்லை என்னும் அளவில் பெரிதும் பயன்படுகிறேன். நமக்கு இருக்கும் ஒரே எதிரி 'மாசு' மட்டுமே.  மாசினைக் குறைப்பது மனிதர்களின் கடமை. மனிதர்கள் நமக்காக இல்லாவிட்டாலும், தமக்காகவாது மாசினைக் குறைப்பார்கள் என்ற நம்பிக்கையுடன் விடைபெறுகிறேன். நன்றி, நண்பா!

3). மழை நின்றவுடன் புலப்படும் காட்சியை வர்ணித்து எழுதுக .

குறிப்பு : இலைகளில் சொட்டும் நீர்- உடலில் ஓடும் மெல்லிய குளிர் - தேங்கிய குட்டையில் ' சளப் தளப் ' என்று குதிக்கும் குழந்தைகள் - ஓடும் நீரில் காகிதக் கப்பல் .

மழை நின்றவுடன் புலப்படும் காட்சி

மழை நின்றது. தூவானம் மெல்ல மெல்ல வெளிறியது. வெண்மேகம் ஓய்வெடுக்க மலைச்சரிவைத் தேடியது.  இலைகளிலிருந்து நீர் 'சொட் சொட்' என்று சொட்டியது. ஒடுங்கியிருந்த கானக்குயில் பாடியது. கோல மாமயில் ஆடியது. சில்லென்று பரவிய காற்றால், உடலெங்கும் மெல்லிய குளிர் ஓடியது.  

தேங்கிய குட்டையில் 'சளப் சளப்' என்று குழந்தைகள் குதிக்கின்றனர்; ஒருவர் மேல் ஒருவர் சேற்றை வாரி இறைக்கின்றனர்; காகிதக் கப்பல்களை ஓடவிடுகின்றனர்.  

ஒதுங்கியிருந்த கோழிகள் தலைகாட்டுகின்றன; நழுவிச் செல்லும் மண்புழுக்களைக் கொத்தித் தின்கின்றன.

4). தோட்டத்தில் மல்லிகைப்பூப் பறித்த பூங்கொடி வரும்வழியில் ஆடுமாடுகளுக்குத் தண்ணீர்த் தொட்டியில் குடிநீர் நிரப்பினாள். வீட்டிற்கு வந்தவள் சுவர்க் கடிகாரத்தில் மணி பார்த்தாள்.
இப்பத்தியில் உள்ள தொகைச் சொற்களின் வகைகளைக் குறிப்பிட்டு விரித்து எழுதுக.

தொகைச்சொற்கள்:

மல்லிகைப்பூ-இருபெயரொட்டுப் பண்புத்தொகை.

இதில் 'மல்லிகை' என்பது சிறப்புப் பெயர்.  'பூ' என்பது பொதுப் பெயர்.  இவ்வாறு முதலில் சிறப்புப் பெயரும், அதனைத்தொடர்ந்து பொதுப் பெயரும் இணைந்து வருவது 'இருபெயரொட்டுப் பண்புத்தொகை' ஆகும்.

பூப்பறித்த- இரண்டாம் வேற்றுமைத்தொகை.

'பூப்பறித்த' என்பது 'பூவைப் பறித்த' என விரிந்து வரும். இதில் 'இரண்டாம் வேற்றுமை உருபு' மறைந்து வந்துள்ளது. எனவே, இது 'இரண்டாம் வேற்றுமைத் தொகை' ஆகும்.

ஆடுமாடுகள்- உம்மைத்தொகை.

'ஆடுமாடுகள்' என்பது 'ஆடுகளும் மாடுகளும்' என விரிந்து வரும். இதில் 'உம்' என்ற உருபு மறைந்து வந்துள்ளதால், இது 'உம்மைத்தொகை' ஆகும்.

தண்ணீர்த்தொட்டி -இரண்டாம் வேற்றுமை உருபும் பயனும் உடன் தொக்கத் தொகை.

 'தண்ணீர்த் தொட்டி' என்பது 'தண்ணீரை உடைய தொட்டி' என விரிந்து பொருள் தரும்.  இதில் 'ஐ' என்ற வேற்றுமை உருபும் 'உடைய' என்ற உருபின் பயனும் மறைந்து வந்துள்ளதால், இது 'இரண்டாம் வேற்றுமை உருபும் பயனும் உடன்தொக்கத் தொகை' ஆகும்.

குடிநீர் நிரப்பினாள்- இரண்டாம் வேற்றுமைத்தொகை.

'குடிநீர் நிரப்பினாள்' என்பது 'குடிநீரை நிரப்பினாள்' என விரிந்து பொருள்தரும்.  இதில் 'ஐ' என்ற இரண்டாம் வேற்றுமை உருபு மறைந்து வந்துள்ளதால், இது 'இரண்டாம் வேற்றுமை தொகை' ஆகும்.

குடிநீர்- வினைத்தொகை.

'குடிநீர்' என்பது குடித்த நீர், குடிக்கின்ற நீர், குடிக்கும் நீர் என்று விரியும். இவ்வாறு, பெயரெச்சமும் முக்காலமும் (கரந்து) மறைந்து வருவது 'வினைத்தொகை' ஆகும்.

சுவர்க் கடிகாரம்- ஏழாம் வேற்றுமை உருபும் பயனும் உடன் தொக்கத் தொகை.

'சுவர்க்கடிகாரம்' என்பது 'சுவரின் கண் உள்ள கடிகாரம்' என விரிந்து பொருள் தரும். இதிலுள்ள 'கண்' என்ற ஏழாம் வேற்றுமை உருபும், 'உள்ள' என்ற உருபின் பயனும் மறைந்து வந்துள்ளதால், இது 'ஏழாம் வேற்றுமை உருபும் பயனும் உடன் தொக்கத் தொகை' ஆகும்.

மணி பார்த்தாள்- இரண்டாம் வேற்றுமைத் தொகை.

'மணி பார்த்தாள்' என்பது 'மணியைப் பார்த்தாள்' என விரியும். இதில் 'ஐ' என்ற இரண்டாம் வேற்றுமை உருபு மறைந்து வந்துள்ளதால், இது 'இரண்டாம் வேற்றுமைத்தொகை' ஆகும்.

3 மதிப்பெண் வினாக்கள், இயல் 1

 இயல் 1

3 மதிப்பெண் வினாக்கள்

1). தமிழன்னையை வாழ்த்துவதற்கான காரணங்களாகப் பாவலரேறு யாவை?

தமிழன்னையை வாழ்த்துவதற்கான காரணங்கள்:

1. அன்னை மொழியாகவும், அழகாய் அமைந்த செந்தமிழாகவும் விளங்குபவள்.
2. பழமைக்கும் பழமையாய்த் தோன்றி, நறுங்கனியாய்ச் சுவை தருபவள்.
3. கடல் கொண்ட குமரிக் கண்டத்தில் நிலைத்து அரசாண்ட மண்ணுலகப் பேரரசாய் வீற்றிருந்தவள்.
4. பாண்டிய மன்னனின் மகளாகப் பிறந்தவள்.
5. திருக்குறளின் பெருமைக்கு உரியவள்.
6. பத்துப்பாட்டாய், எட்டுத்தொகையாய், பதினெண்கீழ்க்கணக்காய், சிலப்பதிகாரமாய், மணிமேகலையாய்த் திகழ்பவள்.

இவையே பாவலரேறு, தமிழன்னையை வாழ்த்துவதற்கான காரணங்கள் ஆகும்.

2). 'புளியங்கன்று ஆழமாக நடப்பட்டுள்ளது'. இதுபோல் இளம் பயிர் வகை ஐந்தின் பெயர்களைத் தொடர்களில் அமைக்க.

இளம்பயிர் வகை அமைந்த தொடர்கள்:

1. பெண்கள் நெல்நாற்றுகளை நடுகிறார்கள்.
2. மாங்கன்று நட்டு வளர்த்தால், பின்னாளில் சுவைமிகு கனிதரும்.
3. வாழைக்குருத்து தளிர்விட்டு வளர்கிறது.
4. தென்னம்பிள்ளையை நடுவதற்கு மூன்றடிக்குழி தோண்டவேண்டும்.
5. சோளப்பைங்கூழ் பசுமையாய் இருக்கிறது.

3). தமிழழகனார் தமிழையும் கடலையும் இரட்டுற மொழியும் பாங்கினை விளக்குக.

கோப்பினைப் பதிவிறக்கம் செய்ய இங்கே தொடவும்

4). 'அறிந்தது, அறியாதது, புரிந்தது, புரியாதது, தெரிந்தது, தெரியாதது, பிறந்தது, பிறவாதது' இவை அனைத்தையும் யாம் அறிவோம். அது பற்றி உமது அறிவுரை எமக்குத் தேவை இல்லை எல்லாம் எமக்குத் தெரியும்.

 இக்கூற்றில் வண்ண எழுத்துக்களில் உள்ள வினைமுற்றுகளைத் தொழிற் பெயர்களாக மாற்றி எழுதுக.

வினைமுற்றுகள் - தொழிற் பெயர்கள்:

1. அறிந்தது - அறிதல்
2. அறியாதது - அறியாமை
3. புரிந்தது - புரிதல்
4. புரியாதது - புரியாமை
5. தெரிந்தது - தெரிதல்
6. தெரியாதது - தெரியாமை
7. பிறந்தது - பிறத்தல்
8. பிறவாதது - பிறவாமை