பத்தாம் வகுப்பு இயல் 5
பலவுள் தெரிக
1.‘மாபாரதம் தமிழ்ப் படுத்தும் மதுராபுரிச் சங்கம் வைத்தும்’ என்னும் சின்னமனூர்ச் செப்பேட்டுக் குறிப்பு உணர்த்தும் செய்தி
சங்க காலத்தில் மொழிபெயர்ப்பு இருந்தது
2.அருந்துணை என்பதைப் பிரித்தால்______
அருமை+துணை
3.“இங்கு நகரப் பேருந்து நிற்குமா?” என்று வழிப்போக்கர் கேட்டது_____ வினா. “அதோ அங்கே நிற்கும்” என்று மற்றொருவர் கூறியது______ விடை.
அறியா வினா, சுட்டுவிடை
4.“அருளைப் பெருக்கி அறிவைத் திருத்தி மருளை அகற்றி மதிக்கும் தெருளை” என்று இவ்வடிகளில் குறிப்பிடப்படுவது எது?
கல்வி
5.இடைக்காடனாரின் பாடலை இகழ்ந்தவர்_____ இடைக்காடனாரிடம் அன்பு வைத்தவர்_______.
மன்னன், இறைவன்
சிறு வினா
1.“கழிந்த பெரும் கேள்வியினால் எனக் கேட்டு முழுது உணர்ந்த கபிலன் தன் பால் பொழிந்த பெரும் காதல்மிகு கேண்மையினான் இடைக்காட்டு புலவன் தென்சொல்”-இவ்வடிகளில் கழிந்த பெரும் கேள்வியினான் யார்? காதல் மிகு கேண்மையினான் யார்?
- கழிந்த பெரும் கேள்வியினான்-மன்னன் குலேச பாண்டியன்
- காதல் மிகு கேண்மையினான்-புலவர் இடைக்காடனார்
2.செய்குத் தம்பிப் பாவலரின் கல்வி பற்றிய கருத்தினை முழக்கத் தொடர்களாக்குக.
- அருளைப் பெருக்கு
- அறிவைத் திருத்து
- மருளை அகற்று
- கல்வியைப் போற்று
3.அமர்ந்தான்- பகுபத உறுப்பிலக்கணம் தருக.
அமர்+(ந்)த்+த்+ஆன்
- அமர்-பகுதி
- த்-சந்தி
- ந் ஆனது விகாரம்
- த் -இறந்தகால இடைநிலை
- ஆன்-ஆண்பால் வினைமுற்று விகுதி
4.இந்த அறை இருட்டாக இருக்கிறது. மின்விளக்கின் சொடுக்கி எந்தப் பக்கம் இருக்கிறது? இதோ… இருக்கிறதே! சொடுக்கியைப் போட்டாலும் வெளிச்சம் வரவில்லையே! மின்சாரம் இருக்கிறதா, இல்லையா? மேற்கண்ட உரையாடலில் உள்ள வினாக்களின் வகைகளை எடுத்து எழுதுக.
- மின்விளக்கின் சொடுக்கி எந்தப் பக்கம் இருக்கிறது? -அறியா வினா
- மின்சாரம் இருக்கிறதா, இல்லையா? -ஐய வினா
சிறுவினா
1.மன்னன் இடைக்காடனார் என்ற புலவனுக்குச் சிறப்புப் செய்தது ஏன்? விளக்கம் தருக.
- பாண்டிய நாட்டை ஆட்சிபுரிந்த குலேச பாண்டியன் என்னும் மன்னன் தமிழ்ப் புலமையில் சிறந்து விளங்கினான்.
- கபிலரின் நண்பரான இடைக்காடனார் எனும் புலவர், தாம் இயற்றிய கவிதையினை மன்னன் முன்பு பாட, அதைப் பொருட்படுத்தாமல் மன்னன் புலவரை அவமதித்தான்.
- மனம் வருந்திய இடைக்காடனார் இறைவனிடம் முறையிட்டார். மன்னனின் பிழையை உணர்த்துவதற்காக இறைவன் கடம்பவனக் கோயிலை விட்டு நீங்கி, வடதிரு ஆலவாயில் சென்று தங்கினார்.
- இதை அறிந்த மன்னன் தன் பிழையைப் பொறுத்தருளுமாறு இறைவனை வேண்டி, இடைக்காடனாருக்குச் சிறப்புச் செய்தான்.
- இறைவனும் கோவிலுக்குத் திரும்பினார்.
2.உங்களுடன் பயிலும் மாணவர் ஒருவர் பள்ளிப்படிப்பைப் பாதையில் நிறுத்தி வேலைக்குச் செல்ல விரும்புகிறார். அவரிடம் கற்பதன் இன்றியமையாமையை எவ்வகையில் எடுத்துரைப்பீர்கள்?
- கற்றவர் வழி அரசு செல்லும் என்கிறது சங்க இலக்கியம்.
- “கற்கை நன்றே கற்கை நன்றே பிச்சை புகினும் கற்கை நன்றே” என்கிறது வெற்றி வேற்கை.
- அருளினைப் பெருக்கி, அறிவைச் சீராக்கி, மயக்கம் அகற்றி, அறிவுக்குத் தெளிவு தந்து, உயிருக்கு அரிய துணையாய் இன்பம் சேர்ப்பது கல்வியே ஆகும்.
- எனவே அதைப் போற்றிக் கற்க வேண்டும் என்று எடுத்துரைப்பேன்.
3.ஐக்கிய நாடுகள் அவையில் மொழிபெயர்ப்பு
ஐ.நா. அவையில் ஒருவர் பேசினால் அவரவர் மொழிகளில் புரிந்து கொள்வதற்கு வசதி செய்யப்பட்டிருக்கிறது. மொழிபெயர்ப்பு என்பது எழுதப்பட்டதை மொழிபெயர்ப்பது; ஆனால் ஒருவர் பேசும்போதே மொழிபெயர்ப்பது விளக்குவது என்றே சொல்லப்படுகிறது. ஐ.நா. அவையில் ஒருவர் பேசுவதை மொழிபெயர்க்கும் மொழிபெயர்ப்பாளர் பார்வையாளர்களுக்குத் தெரியாதபடி வேறு இடத்தில் இருப்பார். ஒருவர் பேசுவதை காதணிக்கேட்பியில் கேட்டபடி சில நொடிகளில் மொழிபெயர்த்து ஒலி வாங்கி வழியே பேசுவார். அவையில் உள்ள பார்வையாளர் தம்முன் உள்ள காதணிக் கேட்பியை எடுத்துப் பொருத்திக்கொண்டு அவரது மொழியில் புரிந்து கொள்வார். இப்பகுதியில் இருந்து ஐந்து வினாக்களை உருவாக்குக.
- மொழிபெயர்ப்பு என்பது யாது?
- விளக்குவது என்பது யாது?
- மொழிபெயர்ப்பாளரின் பணி யாது?
- ஐ.நா. அவையில் ஒருவர் பேசினால் அவரவர் மொழிகளில் புரிந்து கொள்ள வசதி செய்யப்பட்டு இருக்கிறதா?
- ஐ.நா. அவையில் மொழிபெயர்ப்பாளர் எங்கு அமர்ந்திருப்பார்?
4.முயற்சி திருவினை ஆக்கும் முயற்றின்மை இன்மை புகுத்தி விடும். இக்குறட்பாவில் அமைந்துள்ள பொருள்கோளின் வகையைச் சுட்டி விளக்குக.
- முயற்சி திருவினை ஆக்கும் முயற்றின்மை இன்மை புகுத்தி விடும். இக்குறட்பாவில் ஆற்றுநீர்ப் பொருள்கோள் அமைந்துள்ளது.
- முயற்சி செய்தால் ஒருவர்க்குச் செல்வம் பெருகும். முயற்சி இல்லாவிட்டால் அவருக்கு வறுமையே வந்து சேரும். பாடலின் தொடக்கம்முதல் முடிவுவரை ஆற்று நீரின் போக்கைப் போல நேராகவே பொருள் கொள்ளுமாறு அமைந்துள்ளதால் இது ‘ஆற்று நீர்ப் பொருள்கோள்’ ஆகும்.
நெடுவினா
1.இறைவன் புலவர் இடைக்காடன் குரலுக்கு செவி சாய்த்த நிகழ்வை நயத்துடன் எழுதுக.
திருவிளையாடற் புராணம்
இடைக்காடனார் மன்னனின் அவையில் கவிதை படித்தல்
‘மன்னன் மிகுந்த கல்வியறிவு மிக்கவன்’ எனக் கற்றோர் கூறக் கேட்ட இடைக்காடனார் என்னும் புலவர் பாண்டியனின் அவைக்குச் சென்று, தான் இயற்றிய கவிதையைப் படித்தார்.
மன்னன் தன் புலமையை மதிக்காமை குறித்து இறைவனிடம் முறையிடல்
“பாண்டிய மன்னன் முன் சொற்சுவை நிரம்பிய கவிதை பாடினேன். அவனோ சிறிதேனும் சுவைத்துத் தலை அசைக்காமல் புலமையை அவமதித்தான். பாண்டியன் என்னை இகழவில்லை சொல்லின் வடிவாக உன் இடப்புறம் வீற்றிருக்கும் பார்வதி தேவியையும் சொல்லின் பொருளாக விளங்கும் உன்னையுமே அவமதித்தான்” என்று சினத்துடன் கூறிச் சென்றார்.
இறைவன் கோவிலை விட்டு நீங்குதல்
இடைக்காடனாருக்கும் கபிலருக்கும் மன மகிழ்ச்சி உண்டாக்க நினைத்த இறைவன் திருக்கோவிலை விட்டு வெளியேறி வைகை ஆற்றின் தென்பக்கத்தில் குடியேறினார்.
கோவிலை விட்டு நீங்கிய காரணம் அறியாது மன்னன் இறைவனை வேண்டுதல்
“இறைவனே, என்னால், என் படைகளால், என் பகைவரால், கள்வரால், காட்டில் உள்ள விலங்குகளால் இத்தமிழ்நாட்டில் தங்களுக்கு இடையூறு ஏற்பட்டதா? மறையவர் நல்லொழுக்கத்தில் குறைந்தனரா? தவமும் தருமமும் சுருங்கியதோ? இல்லறமும் துறவறமும் தத்தம் நெறியில் இருந்து தவறினவோ? எமது தந்தையே யார் அறியேன்” என்று பாண்டிய மன்னன் வேண்டினான்.
இறைவனின் பதில்
இறைவன் மன்னனிடம், “இடைக்காடனார் பாடலை இகழ்ந்த குற்றம் தவிர வேறு குற்றம் உன்னிடம் இல்லை. இடைக்காடனார் மீது கொண்ட அன்பினால் இவ்வாறு இங்கு வந்தோம்” என்றார்.
மன்னன் தன் பிழையைப் பொறுத்து அருளுமாறு இறைவனிடம் வேண்டுதல்
மன்னன், “சிறியவர்களின் குற்றம் பொறுப்பது பெரியவருக்குப் பெருமை அல்லவா?” என்று தன் குற்றத்தைப் பொறுக்க வேண்டிப் போற்றினான்.
மன்னன், புலவருக்கு மரியாதை செய்தல்
புலவர்கள் சூழ அறிவை அணிகலனாகப் பூண்ட இடைக்காடனாரை மங்கலமாக ஒப்பனை செய்து பொன் இருக்கையில் விதிப்படி அமர்த்தினான்.
மன்னன், புலவரிடம் மன்னிப்பை வேண்டுதல்
பாண்டியன், “புண்ணிய வடிவான புலவர்களே, நான் இடைக்காடனாருக்குச் செய்த குற்றத்தைப் பொறுத்துக் கொள்ள வேண்டும்” என்று பணிந்து வேண்டினான்.
2.“கற்கை நன்றே கற்கை நன்றே பிச்சை புகினும் கற்கை நன்றே” என்கிறது வெற்றி வேற்கை. மேரியிடமிருந்து பறிக்கப்பட்ட புத்தகம் அச்சிறுமியின் வாழ்க்கையில் கல்விச் சுடரை ஏற்றிய கதையைப் பற்றிய உங்களின் கருத்துக்களை விவரிக்க.
புதிய நம்பிக்கை
முன்னுரை
வரலாற்றில் மனிதர்கள் வருகிறார்கள். சிலர் வரலாறாகவே மாறி விடுகின்றார்கள். கல்வியறிவற்ற சமூகத்திலிருந்து ஒற்றை ஒளிச் சுடராக வெளிவந்து, அந்த சமூகத்தையே ஒளிவெள்ளத்தில் நிரப்பியவர்களில் ஒருவர்தான் மேரி.
மேரியின் குடும்பம்
கருப்பினச் சிறுமி மேரி. வாழ்க்கையின் ஒரே ஒரு நிமிடத்தை கூட வீணடிக்கக் கூடாது என்று பகல் முழுவதும் பருத்திக் காட்டில் வேலை செய்யும் குடும்பத்தை சார்ந்தவள். அம்மா பாட்ஸியுடன் துவைத்து தேய்த்து துணிகளை அடுக்கி கொண்டு, பென் வில்சன் என்ற வெள்ளைக்கார முதலாளி வீட்டிற்குச் சென்றாள்.
உன்னால் படிக்க முடியாது
அங்கு வெள்ளைக்காரச் சிறுமிகள் விளையாடிக் கொண்டிருப்பதைக் கண்டாள்; உள்ளே சென்றாள்; சுற்றிப் பார்த்தாள்; மேஜை மீது இருந்த புத்தகத்தை எடுத்துப் பார்த்தாள். “புத்தகத்தை என்னிடம் கொடு. நீ இதை எடுக்கக்கூடாது. உன்னால் படிக்க முடியாது. புத்தகங்கள், படிக்க முடியாதவர்களுக்கு இல்லை” என்ற வெள்ளைக்காரச் சிறுமியின் வார்த்தைகளால் மனம் கலங்கினாள்.
மேரியின் விருப்பம்
“நான் படிக்க வேண்டும். நான் படிக்கக் கற்றுக் கொள்ளப் போகிறேன். நான் எழுதப் படிக்கப் போகிறேன்” என்று சிந்தித்துக் கொண்டே இருந்தாள். தந்தை சாமிடம் தன் விருப்பத்தை வெளிப்படுத்தினாள். ஆனால், அங்குக் கருப்பினச் சிறுமிகள் படிப்பதற்கென்று பள்ளிக்கூடம் கிடையாது.
பட்டம் பெற்ற மேரி
மிஸ் வில்சன் என்ற வெள்ளைக்காரப் பெண் மேரியைப் படிக்க மேயஸ்வில்லிக்கு அழைத்தாள். அடங்காத ஆர்வத்துடன் தினமும் பத்து மைல் தூரம் நடந்து சென்று படித்தாள். அக்கம்பக்கத்தினருக்கு கணக்குச் சொல்லிக் கொடுத்தாள். சில ஆண்டுகள் முடிவில் பட்டம் பெற்றாள். அதில், ‘இப்பட்டம் பெறுபவருக்கு எழுதப் படிக்கத் தெரியும்’ என்று இருந்தது.
மேரியின் உயர்கல்விப் பயணம்
‘அடுத்து என்ன செய்யப் போகிறாய்?’ என்ற மிஸ் வில்சனின் கேள்விக்கு, ‘கல்லூரியில் படிக்க விரும்புகிறேன்’ என்றாள். மேரி உயர்கல்வி கற்க, ஊரே வழியனுப்பி வைத்தது; மேற்குப் பகுதியில் வசிக்கும் வெள்ளைக்காரப் பெண் ஒருத்தி பணம் அனுப்பினாள்.
முடிவுரை
ஒடுக்கப்பட்ட சமூகம் எழுவதற்குக் காரணமாக அமைந்தது, மேரி பெற்ற கல்வி. பின்னாளில், மேரி கருப்பினக் குழந்தைகள் படிப்பதற்காகக் கட்டிய ‘பெதுன் குக்மேன் தனியார் பள்ளி’ பல்கலைக்கழகமாக வளர்ந்தது; தடைகளை எல்லாம் தகர்த்து முன்னேறி, அமெரிக்க ஜனாதிபதி ரூஸ்வெல்டின் ஆலோசகரானார்.
3.தமிழின் இலக்கிய வளம் - கல்வி மொழி- பிற மொழிகளில் உள்ள இலக்கிய வளங்கள் - அறிவியல் கருத்துக்கள்- பிறதுறைக் கருத்துக்கள்- தமிழுக்குச் செழுமை- மேற்கண்ட குறிப்புகளைக் கொண்டு ‘செம்மொழித் தமிழுக்கு வளம் சேர்க்கும் மொழிபெயர்ப்புக்கலை’ என்ற தலைப்பில் வார இதழ் ஒன்றுக்கு நடுப்பக்கக் கட்டுரை எழுதுக.
செம்மொழித் தமிழுக்கு வளம் சேர்க்கும் மொழிபெயர்ப்புக் கலை
முன்னுரை
ஒரு மொழியில் ஏற்படும் புதுமைகளை வேற்று மொழிக்கு கொண்டு வரும் அரிய கலையே ‘மொழிபெயர்ப்புக்கலை’ ஆகும். மொழிபெயர்ப்பு செய்யப்படும் பொழுது மூலமொழி சார்ந்துள்ள சமுதாயப் பின்னணியை எண்ணிப் பார்ப்பது அவசியமானது.
தமிழின் இலக்கியவளம்
வாழ்வியலுக்கு இலக்கணம் வகுத்து நெறியோடு வாழ்ந்த தமிழரின் சங்க இலக்கியங்கள், பதினெண் கீழ்க்கணக்கு நூல்கள், ஐம்பெருங்காப்பியங்கள், பக்திப் பாடல்கள், சிற்றிலக்கியங்கள், புதுக்கவிதைகள், புதினங்கள் என்பவை தமிழின் இலக்கிய வளத்திற்குச் சான்றுகளாகும்.
கல்வி மொழி
மொழிபெயர்ப்பைக் கல்வியாக ஆக்குவதன் மூலம் அனைத்துலக அறிவையும் நாம் எளிதில் பெற முடியும். வெளிநாட்டவரை எதிர்பார்க்காமல் நாமே நமக்கு வேண்டிய அனைத்தையும் உருவாக்கிக்கொள்ள முடியும்.
பிறமொழிகளில் உள்ள இலக்கிய வளங்கள்
ஷேக்ஸ்பியரின் நாடகங்கள், வால்ட் விட்மனின் புதுக்கவிதைகள், ஜப்பானிய ஹைக்கூக் கவிதைகள் ஆகியவை மொழிபெயர்ப்பால் தமிழுக்குக் கிடைத்த இலக்கிய வளங்கள் ஆகும்.
அறிவியல் கருத்துகள்
தாமஸ் ஆல்வா எடிசன், ஐசக் நியூட்டன், ஆர்க்கிமிடிஸ், கலிலியோ போன்ற அறிஞர்பெருமக்களின் கண்டுபிடிப்புகள் தமிழில் மொழிபெயர்க்கப் பெற்றபின் அறிவியல் வளர்ச்சியில் பெரும் திருப்பம் ஏற்பட்டது.
பிறதுறைக் கருத்துகள்
தொலைக்காட்சி, வானொலி, திரைப்படம், இதழ்கள் போன்ற ஊடகங்கள் மொழிபெயர்ப்பால்தான் வளர்ச்சி பெறுகின்றன. இதனால் புதுவகையான சிந்தனை மொழிக்கூறுகள் பரவுகின்றன.
தமிழுக்குச் செழுமை
மொழிபெயர்ப்பினால் புதிய சொற்கள் உருவாகி மொழிவளம் ஏற்படுகிறது. மேலும், பிற இனத்தவரின் பண்பாடு, நாகரிகம், பழக்கவழக்கம் போன்றவற்றை அறியமுடிகிறது.
முடிவுரை
பிற மொழி இலக்கியங்களை அறிந்துகொள்ளவும், அவை போன்ற புதிய படைப்புகளை உருவாக்கவும் மொழிபெயர்ப்பு உதவுகிறது. மொழி வேலியை அகற்றும் பணியை மொழிபெயர்ப்பு செய்கிறது.
மதிப்புரை எழுதுக.
பள்ளி ஆண்டுவிழா மலருக்காக நீங்கள் நூலகத்தில் படித்த கதை/ கட்டுரை/ சிறுகதை/ கவிதை நூலுக்கான மதிப்புரை எழுதுக.
மதிப்புரை
நூலின் தலைப்பு: மணிமேகலை
நூலின் மையப் பொருள் : மணிமேகலை மேற்கொண்ட துறவு
மொழிநடை : நாவல்
வெளிப்படுத்தும் கருத்து :
நாம் போன பிறவியில் செய்த பாவத்தின் பயனாகத்தான் இந்த உடம்பு வாய்த்திருக்கிறது. இந்த உடம்பை வைத்துக்கொண்டு நல்லது செய்வதும் கெட்டது செய்வதும் முழுக்க முழுக்க நம்முடைய கையில் தான் இருக்கிறது. இந்த உடம்பு அழகானது என்று நினைத்தால் அந்த கருத்தைத் தயவு செய்து மாற்றிக் கொள்ளுங்கள். இந்த அழகு நிலை இல்லாதது. இளமை போய் முதுமை வந்து விட்டால் அத்தனை அழகும் மறைந்து போகும். இந்த நிலை இல்லாத உடம்பைப் பராமரிக்கத் தான் எத்தனை அலங்காரங்கள்? அழகு சாதனங்கள், நறுமணப் பூச்சுகள். இதை எல்லாம் நீக்கி விட்டால் இந்த உடம்பு எத்தனை கேவலமான நாற்றம் கொண்டது என்று புரியும். புற்றுக்குள் பாம்பு புகுந்தது போல கோபம், வருத்தம், கவலை, துன்பம் எல்லாம் உள்ளே பூட்டி வைக்கிறோம்.
நூலின் நயம் :
தீவதிலகையின் கூற்று:
இந்த உலகத்தையே பெரும் துன்பத்தில் ஆழ்த்தக் கூடிய ஒரு மிகப்பெரிய நோய் பசி. அந்தப் பசியைப் போக்கும் அற்புத மருந்து அந்த அமுதசுரபி. நீ அதை ஏற்றுக்கொண்டு, இல்லாதவர்களுக்கு உணவு கொடுத்து மகிழச் செய்ய வேண்டும். உன் மூலம் இந்த பூமி மொத்தமும் நலம் பெறவேண்டும்.
அறவண அடிகளின் கூற்று:
இங்கிருந்து சூரிய மண்டலம் தொலைவில் உள்ளது என்பதை நாம் உணர முடியும். ஆனால், அதைக் கண்ணால் பார்த்து அறிவது சாத்தியமில்லை. அதுபோலத்தான், நல்ல அறநெறிகளை நாம் நேரில் பார்த்தால் தான் நம்புவோம் என்று பிடிவாதம் பிடிக்கக் கூடாது. மற்றவர்கள் உணர்த்துவதை உள்ளத்தால் புரிந்துகொள்ள வேண்டும்.
ஆதிரையின் கணவன் சாதுவன் கூற்று:
கள் நம்முடைய அறிவை மயக்குகிறது. மாமிசம், மற்ற உயிர்களைக் கொன்று பிழைக்கச் சொல்கிறது. பல பெண்களின் பின்னே அலைவதும் மிருகக் குணம் தான்.
நூலின் கட்டமைப்பு :
மணிமேகலைக் காப்பியத்தை, இவள் பெயர் மணிமேகலைமுதல் குற்றம்தவிர்த்த வாழ்க்கை ஈறாக 66 தலைப்புகளில் நாவல் வடிவில் விளக்குகிறது.
சிறப்புக் கூறு :
மூல நூலான மணிமேகலையை விட, நாவல் வடிவிலமைந்த இந்த நூல் எளிய நடையில் கதை சொல்கிறது. ஒரே மூச்சில் படித்து முடித்துவிட வேண்டும் என்ற ஆவலைத் தூண்டுகிறது.
நாடகக் காட்சிகளை நம் கண்முன்னே கொண்டுவந்து நிறுத்தி, மணிமேகலை வாழ்ந்த உலகிற்கு நம்மை அழைத்துச் செல்கிறது.
புத்தர் அறிவித்த நன்னெறிகள், நூல் முழுவதும் தொடர்கின்றன. இக்கால சமுதாயம் சீர்பெற மிகவும் அவசியமான நூலாகும்.
மிகுந்த சுவையோடு எழுதப்பட்டிருக்கும் இந்நூல் அனைவரையும் கவரும் என்பதில் ஐயமில்லை.
நூலின் ஆசிரியர்: என். சொக்கன்
தொழிற்பெயர்களின் பொருளைப் புரிந்துகொண்டு தொடர்களை முழுமை செய்க.
1.நிலத்துக்கு அடியில் கிடைக்கும் புதையல் யாவும் அரசுக்கே சொந்தம். நெகிழிப் பொருட்களை மண்ணுக்கு அடியில் புதைத்தல் நிலத்தடி நீர்வளத்தைக் குன்றச் செய்யும்.
2.காட்டு விலங்குகளைச் சுடுதல் தடை செய்யப்பட்டுள்ளது. செய்த தவறுகளைச் சுட்டல் திருந்த உதவுகிறது.
3.காற்றின் மெல்லிய தொடுதல் பூக்களைத் தலையாட்ட வைக்கிறது. கைகளின் நேர்த்தியான தொடுத்தல் பூக்களை மாலை ஆக்குகிறது
4.பசுமையான காட்சியைக் காணுதல் கண்ணுக்கு நல்லது.
5.பொதுவாழ்வில் நடித்தல் கூடாது. நடிப்பில் அவரை மிஞ்ச ஆள் கிடையாது
புதிர்ப்பாடலைப் படித்து விடையைக் கண்டுபிடிக்க
தார்போன்ற நிறமுண்டு கரியும் இல்லை
பார் முழுதும் பறந்து திரிவேன் மேகமும் இல்லை
சேர்ந்து அமர்ந்து ஒலிப்பேன் பள்ளியும் இல்லை
சோர்ந்து போகாமல் வீடு அமைப்பேன் பொறியாளரும் இல்லை
வீட்டுக்கு வரும் முன்னே, வருவதை கூறுவேன்.
நான் யார்?
விடை: காகம்
அகராதியில் காண்க
- மன்றல்- திருமணம்
- அகராதி- அகரமுதலி
- மருள்- மயக்கம்
- அடிச்சுவடு- காலடியின் அடையாளம்
- தூவல்- பேனா
கலைச்சொல் அறிவோம்
- Emblem -சின்னம்
- Thesis -ஆய்வேடு
- Intellectual -அறிவாளர்
- Symbolism -குறியீட்டியல்
நிற்க அதற்குத் தக
பள்ளியில் நான்
- உடன்பயிலும் மாணவர்களின் திறமைகளைப் பாராட்டுவேன்
- நண்பர்களுக்கு உதவி செய்வேன்
- வகுப்பறையைத் தூய்மையாக வைத்திருப்பேன்
- ஒழுக்கத்தைப் கடைப்பிடிப்பேன்
வீட்டில் நான்
- பெற்றோருக்கு உதவி செய்வேன்.
- செடிகொடிகளுக்குத் தண்ணீர் ஊற்றுவேன்
- வீட்டைத் தூய்மையாக வைத்திருப்பேன்.
- பெற்றோரை மதிப்பேன்.
மொழிபெயர்ப்பு
- Lute music -யாழிசை
- Chamber-அறை
- To look up-எட்டிப்பார்த்தேன்
- Grand-daughter-பேத்தி
- Rote-நெட்டுரு
- Didactic compilation-நீதி நூல் திரட்டு
தொடர்களில் உள்ள எழுவாயைச் செழுமை செய்க
1.கடம்பவனத்தை விட்டு இறைவன் நீங்கினான்
அழகிய குளிர்ந்த கடம்பவனத்தை விட்டு இறைவன் நீங்கினான்.
2.மரத்தை வளர்ப்பது நன்மை பயக்கும்
குளிர்ந்த நிழல்தரும் மரத்தை வளர்ப்பது நன்மை பயக்கும்.
3.வாழ்க்கைப்பயணமே வேறுபட்ட பாடங்களைக் கற்றுத் தருகிறது
மேடுபள்ளம் நிறைந்த வாழ்க்கைப் பயணமே வேறுபட்ட பாடங்களைக் கற்றுத் தருகிறது
5.கல்வியே ஒருவருக்கு உயர்வு தரும்
ஒழுக்கத்துடன் கூடிய கல்வியே ஒருவருக்கு உயர்வு தரும்.
6.குழந்தைகள் தனித்தனியே எழுதித் தர வேண்டும்
சுற்றுலா செல்ல விரும்பும் குழந்தைகள் தனித்தனியே எழுதித் தர வேண்டும்.
அட்டவணையில் விடுபட்டதை எழுதுக
- சொன்ன அம்மா -பெயரெச்சத் தொடர்
- அம்மா, சொல்-விளித்தொடர்
- அரசர் தந்தார் -எழுவாய்த் தொடர்
- எனக்குத் தந்தார்-வேற்றுமைத் தொடர்
- சிரித்த பெண் -பெயரெச்சத் தொடர்
பெண்ணே, சிரி-விளித்தொடர்
ஓடி விளையாடினான்-வினையெச்சத் தொடர்
என்னுடன் வா-வேற்றுமைத் தொடர்
