8 மதிப்பெண் வினா ஒருவன் இருக்கிறான்

 அழகிரிசாமியின் 'ஒருவன் இருக்கிறான்' என்னும் சிறுகதையில் மனிதத்தை வெளிப்படுத்தும் கதைமாந்தர் குறித்து எழுதுக.

ஒருவன் இருக்கிறான்

துணையின்றி வாழும்நிலை இரங்கத்தக்கது. எப்படிப்பட்டவராக இருந்தாலும் பிறரது துணையைச் சார்ந்திருக்க வேண்டியநிலை இருக்கிறது.  துணையே இல்லாதவர் என்று கருதி நாம் அலட்சியம் செய்பவருக்கும் துணை ஒன்று இருப்பதை அறியும்போது நமக்குக் குற்ற உணர்ச்சி தோன்றும் வாய்ப்பு இருக்கிறது. எப்படிப்பட்டவருக்கும் ஒரு துணை இருக்கும். அந்தத் துணைதான் மனிதத்தின் வேருக்கு நீர். அதில் மனிதம் துளிர்க்கும்.

கட்டைத் தொட்டி ஆறுமுகத்தின் மனிதநேயம்

அம்மா அப்பா இல்லாத குப்புசாமி, காஞ்சிபுரத்தில் தாய்மாமன் வீட்டில் தங்கி ஒரு சைக்கிள்கடையில் வேலைசெய்து வாழ்ந்து வந்தான். அந்தக் கடைக்கு எதிரே ஒரு விறகுக் கடையில் வேலைசெய்து வந்தவன்தான் கட்டைத் தொட்டி ஆறுமுகம். ஆறுமுகத்தின் பக்கத்து வீட்டுக்காரன் வீரப்பன் என்பவனும், குப்புசாமியும் நெருங்கிய நண்பர்கள். குப்புசாமி வயிற்றுவலி காரணமாக சென்னைக்கு உறவினர் வீட்டிற்குச் சென்றிருந்தான்.  சென்னைக்குத் தன்னுடைய உறவினர் வீட்டுக்கு வந்த ஆறுமுகம் குப்புசாமியைப் பார்க்க, அவனுடைய உறவினர் வீட்டுக்குச் சென்றான். பார்க்க முடியவில்லை. அந்த வீட்டுக்குப் பக்கத்து வீட்டில் இருந்தவரிடம், தன் குழந்தைகளுக்காக வாங்கிய சாத்துக்குடிப் பழங்களில் இரண்டு சாத்துக்குடிப் பழங்களையும், ஒருரூபாய் நோட்டு ஒன்றையும் கொடுத்து, அதைக் குப்புசாமியிடம் சேர்த்துவிடும்படி வேண்டுதலை முன்வைத்துத் தன்னுடைய மனிதத்தை வெளிப்படுத்தினான்.

ஏழ்மையிலும் இரங்கிய வீரப்பன்

வீடுகட்டுகிற ஒரு மேஸ்திரியிடம் சிப்பந்தியாக வேலைசெய்து வந்தவன் வீரப்பன்.  நோய் காரணமாகக் குப்புசாமி வேலை இழந்து தாய்மாமன்வீட்டில் துன்பப்பட்டுக் கொண்டிருந்தபோது, வீரப்பன்தான் அவ்வப்போது அவனை அழைத்துவந்து சாப்பாடு போடுவான். சிலநாட்கள் வேலை இல்லாமல், வருமானமும் இல்லாமல் துயரப்படுகிற ஏழையாக இருந்தாலும், கடன் வாங்கியாவது தன் நண்பனுக்கு உதவிசெய்து வந்தான்.

கடிதத்தில் கசிந்த மனிதம்

சென்னைக்குச் சிகிச்சைக்கு சென்ற குப்புசாமிக்கு, ஆறுமுகத்திடம் கொடுத்து அனுப்பிய வீரப்பனின் கடிதத்தில் மனிதம் கசிந்திருந்தது. அந்தக் கடிதத்தில்,"என் உயிர்நண்பன் குப்புசாமிக்கு எழுதிக் கொண்டது... நீ இங்கிருந்து போனதிலிருந்து என் உயிர் இங்கே இல்லை. சதா உன் ஞாபகமாகத்தான் இருக்கிறேன். கடவுள் அருளால் நீ உடம்பு சௌக்கியமாகி வரவேண்டும் என்று தினமும் ஒருதடவை கோவிலுக்குப் போய்க் கும்பிடுகிறேன். எனக்கு இப்போது வேலை இல்லை. கொஞ்ச நாட்களாக வருமானம் இல்லாமல் இருக்கிறேன். நேற்று கட்டைத்தொட்டி ஆறுமுகம் பட்டணம் போவதாகச் சொன்னான். உடனே ஓடி ஒருவரிடம் மூன்றுரூபாய் கடன் வாங்கி அவனிடம் கொடுத்து அனுப்பியிருக்கிறேன். நானே வரலாம் என்று பார்த்தேன். வந்தால் இந்த மூன்றுரூபாயும் பஸ்ஸூக்குச் செலவாகிவிடும். உனக்குச் சமயத்தில் உதவியாக இருக்கும் என்று நினைத்து நான் ரூபாயைச் செலவழித்துக் கொண்டு வராமல் ஆறுமுகத்திடம் கொடுத்து அனுப்பியிருக்கிறேன். இன்னோர் இடத்திலும் பணம் கேட்டிருக்கிறேன். கிடைத்தால் நான் சீக்கிரம் உன்னைப் பார்க்க வருவேன். உன்னைப் பார்த்தால்தான் நான் தின்னும் சோறு, சோறாக இருக்கும்" என்று உருக்கமாக எழுதியிருந்தான்.

கதைசொல்லியின் மனத்தில் கசிந்த மனிதம்

மேற்கண்ட கடிதத்தைப் படித்த கதைசொல்லியின் கண்களில் கண்ணீர் கசிந்தது.  அதை வெளிக்காட்டாமல் மனைவியை அழைத்து, "குப்புசாமியைப் பார்க்க ஆஸ்பத்திரிக்குப் போய் வருவோம்" என்றார். அவளும் மகிழ்ச்சி அடைந்தாள்.  "குப்புசாமிக்கும் ஒருவன் இருக்கிறான். குப்புசாமிக்கு மட்டுமா? எனக்குமே ஒருவனாக அவன் இருக்கிறான்" என எண்ணியபடி குப்புசாமிக்குப் பழம் வாங்கப் புறப்பட்டார்.

வீரப்பன், கட்டைத்தொட்டி ஆறுமுகம் போன்ற மனிதர்களின் மனிதத்தால்தான் இந்த உலகம் இன்னும் அழியாமல் நிலைபெற்றிருக்கிறது.  இதைத்தான் வள்ளுவர், "பண்புடையார்ப் பட்டுண்டு உலகம் அதுஇன்றேல் மண்புக்கு மாய்வது மன்" என்று இயம்பியிருக்கிறார் போலும்!

5 மதிப்பெண் வினா தேம்பாவணி வீரமாமுனிவரின் கவிதாஞ்சலி

கருணையனின் தாய் மறைவுக்கு, வீரமாமுனிவர் தம் பூக்கள் போன்ற உவமைகளாலும் உருவக மலர்களாலும் நிகழ்த்திய கவிதாஞ்சலியை விவரிக்க.

தேம்பாவணி

கருணையின் தன் தாயார் எலிசபெத் அம்மையாருடன் கானகத்தில் வாழ்ந்து வந்தார். அச்சூழலில் அவருடைய தாய் இறந்து விட்ட போது கருணையன் அடையும் துன்பத்தில் இயற்கையும் பங்குகொண்டு கலங்கி, ஆறுதல் அளிப்பதை வீரமாமுனிவர் படம் பிடித்துக் காட்டுகிறார்.

கருணையனின் கண்ணீர்!

கருணையின் தன் பூப்போன்ற கைகளைக் குவித்து, "பூமித்தாயே! என் அன்னையின் உடலை அன்போடு காப்பாயாக" என்று வணங்கினான். மலர்ப்படுக்கையில் அன்னையின் உடலை அடக்கம் செய்து, அதன்மீது பூக்களையும் கண்ணீரையும் பொழிந்தான்.

கருணையனின் புலம்பல்

"தாயின் மணி போன்ற வாய்மையை மழைநீராகப் பருகி, அன்னையின் மார்பில் மாலையாக மனமகிழ்ந்து வாழ்ந்தேன்.  மணி போன்ற மழைத்துளியின்றி பயிர் வாடியது போல வாடுகின்றேன்.  கொம்பில் கொய்த மலராக வாடுகின்றேன். நஞ்சுதடவிய எரியும்அம்புதுளைத்த புண்ணின் வேதனையை அனுபவிக்கின்றேன்.  துணையைப் பிரிந்த பறவையைப் போல வாடுகின்றேன். வழுக்கு நிலத்தில் வழிதவறியவன் போல் ஆனேன். 

உயிர் பிழைக்கும் வழி அறியேன்.  உணர்விழந்த உறுப்பின் தன்மை அறியேன்.  உணவு தேடும் வழி அறியேன்.  கானில் செல்லும் வழி அறியேன்.  தாய் காட்டிய வழி அறிவேன். தாயும் என்னைத் தவிக்க விட்டுப் போனாள்" என்று நவமணிமாலை போன்று நல்லறத் தவத்தை அணிந்த கருணையன் புலம்பினான்.

கருணையன் புலம்பலுக்கு இரங்கியவை

தேன்சிந்தும் மரங்களிலும் மணமலர்ச் சுனைகளிலும் உள்ள பறவைகளும் வண்டுகளும் கருணையனின் புலம்பலுக்கு இரங்கி, அழுவன போன்று ஒலித்தன.

பாடப்பகுதியில் இடம் பெற்றுள்ள உவமைகள்:

1. பூப்போன்ற கைகள்
2. மணி போன்ற வாய்மை
3. மணி போன்ற மழைத்துளி
4. மழையின்றிப் பயிர் வாடியது போல
5. கொம்பின் கொய்த மலரைப் போல
6. துணையைப் பிரிந்த பறவையைப் போல
7. வழுக்கு நிலத்தில் வழிதவறியவன் போல
8. நவமணிமாலை போன்று நல்லறத் தவத்தை அணிந்த
9. கானம் கொல் என்று ஒலித்து அழுவது போன்று.

பாடப்பகுதியில் இடம்பெற்றுள்ள உருவகங்கள்:

1. பூமித்தாய்
2. வாய்மையே மழைநீராக.

-மலர் மகேந்திரன்

8 மதிப்பெண் வினா ஜெயகாந்தன் நினைவுச் சிறப்பிதழ்

 ஜெயகாந்தன் நினைவுச் சிறப்பிதழை வார இதழ் ஒன்று வெளியிட இருக்கிறது. அதற்கான ஒரு சுவரொட்டியை வடிவமைத்து அளிக்க.

ஜெயகாந்தன் நினைவுச் சிறப்பிதழைப் பதிவிறக்கம் செய்ய இங்கே தொடுக.

8 மதிப்பெண் வினா, நாடகம் , கொக்கை போல கோழியைப் போல உப்பைப் போல

 குறிப்புகளைக் கொண்டு ஒரு பக்க அளவில் நாடகம் எழுதுக.  

மாணவன் - கொக்கைப் போல, கோழியைப் போல - உப்பைப் போல - இருக்க வேண்டும் கொக்கு காத்திருந்து கிடைக்கும் வாய்ப்பைப் பயன்படுத்திக்கொள்ளும் - குப்பையைக் கிளறினாலும் தனது உணவை மட்டுமே எடுத்துக்கொள்ளும் கோழி - கண்ணுக்குத் தெரியாவிட்டாலும் உப்பின் சுவையை உணர முடியும் - ஆசிரியர் விளக்கம் - மாணவன் மகிழ்ச்சி.

நாடகம்

மாணவன் எப்படி இருக்க வேண்டும்?

கதைக்களம்: தத்துவமேதை சாக்ரடீஸ் அவர்களின் வீடு

கதைமாந்தர்கள்: சாக்ரடீஸ், அவரது மாணவர்

(சாக்ரடீஸிடம், அவருடைய‌ மாணவன் ஒருவன் வந்தான்). 

மாணவன்: ஐயா, மாணவன் எப்படி இருக்க வேண்டும்?

சாக்ரடீஸ்: மாணவன் என்பவன், கொக்கைப்போல இருக்க வேண்டும். கோழியைப் போல இருக்க வேண்டும். உப்பைப் போல இருக்க வேண்டும். உன்னைப்போல இருக்க வேண்டும்.

மாணவன்:  ஒன்றும் புரியவில்லை ஐயா. கொஞ்சம் விளக்கமாகச் சொல்லுங்கள் ஐயா.

சாக்ரடீஸ்: கொக்கு, ஒற்றைக் காலில் நீண்டநேரம் பொறுமையாக நிற்கும். மீன்கள் வந்தவுடன் விரைந்து செயல்பட்டுப் பிடித்துவிடும். அதுபோல, ஒரு மாணவன் சரியான வாய்ப்புக் கிடைக்கும்போது அதைப் பயன்படுத்தி, அரிய செயல்களைச் செய்ய வேண்டும்.

மாணவன்: கோழியைப்போல இருக்க வேண்டும் என்றீர்களே அதற்கு என்ன அர்த்தம்?

சாக்ரடீஸ்: கோழி என்ன செய்யும்? குப்பையைக் கிளறும். ஆனால், அந்தக் குப்பைகளை விட்டுவிட்டு தனக்குத் தேவையான உணவை மட்டும் எடுத்துக்கொள்ளும்.

அதுபோல, மாணவர்கள் தாம் சந்திக்கும் தீமைகளைத்  தூரம் தள்ளி விட்டு, நன்மைகளை மட்டும் எடுத்துக்கொள்ள வேண்டும்.

மாணவன்: அடுத்தது, உப்பைப்போல இருக்க வேண்டும் என்றீர்களே…

சாக்ரடீஸ்: ஆமாம். உப்பை எந்த உணவோடு கலக்கினாலும், அது இருக்கிறது என்று கூற முடியும். ஆனால், கலக்கிய உணவில் உப்பு கண்ணுக்குத் தெரியாது. அதன் சுவையை மட்டுமே உணர முடியும்.

அதுபோல, மாணவர்கள் எந்தத் துறையில் இறங்கினாலும் அதில் சிறப்பான தனித்தன்மையை வெளிப்படுத்தி, தனது மறைவுக்குப் பின்னும் அதை இவர்தான் செய்தார் என்று கூறும்படி விளங்க வேண்டும்.

மாணவன்: எல்லாம் சரி, உன்னைப் போல இருக்க வேண்டும் என்றீர்களே… அதற்கு என்ன அர்த்தம்?

சாக்ரடீஸ்: மாணவன் என்பவன் தனக்குள் எழக்கூடிய சந்தேகங்களை, எந்தவிதத் தயக்கமும் இல்லாமல் ஆசிரியரிடம் கேட்டுத் தெளிவு பெற வேண்டும். அதற்காகத்தான் உன்னைப்போல இருக்க வேண்டும் எனச் சொன்னேன்.(புன்னகை பூக்கிறார்)

(அந்த மாணவன் மகிழ்ச்சியுடன் அவரை வணங்கினான்.)

கிரேக்க தத்துவமேதையான சாக்ரடீஸ் கூறிய 'மாணவன் எப்படி இருக்க வேண்டும்?' என்பதை அறிந்து கொண்டீர்களா? அவருடைய அறிவுரைகளைப் பின்பற்றி நடந்து கொள்ளுங்கள்.

நன்றி: inithu.com

5 மதிப்பெண் வினா காலக்கணிதம் பாநயம் பாராட்டல்

 காலக்கணிதம் கவிதையில் பொதிந்துள்ள நயங்களைப் பாராட்டி எழுதுக.

கவிஞன் யானோர் காலக் கணிதம் 

கருப்படு பொருளை உருப்பட வைப்பேன் 

புவியில் நானோர் புகழுடைத் தெய்வம் 

பொன்னினும் விலைமிகு பொருள் என்செல்வம் 

இவை சரி என்றால் இயம்புவது என் தொழில் 

இவை தவறாயின் எதிர்ப்பது என் வேலை 

ஆக்கல் அளித்தல் அழித்தல் இம்மூன்றும் 

அவனும் யாருமே அறிந்தவை; அறிக!

- கண்ணதாசன்.

பாநயம் பாராட்டல்

காலக்கணிதம்

திரண்ட கருத்து

"நான் ஒரு கவிஞன்.  நானே காலத்தைக் கணிக்கும் வானசாத்திரமும் ஆவேன். மனத்தில் எழும் கருத்துக்களைக் கவிதையாகப் படைப்பேன்.  இந்தப் பூமியில், நானே புகழ்பெற்ற தெய்வமும் ஆவேன்.  என்னுடைய கவிதைகள் பொன்னை விட விலை மிகுந்தவை.  நன்மை தரும் செயல்களைப் பாராட்டியும், தவறான செயல்களை எதிர்த்தும் கவிதை வடிப்பது என்னுடைய வேலை. இறைவன் படைத்தல், காத்தல், அழித்தல் ஆகிய முத்தொழில்களைப் புரிகின்றான்.  நானும் கவிதையைப் படைத்தல், மக்களுக்கு நல்லறிவு புகட்டுதல், மக்களின் மனங்களில் உள்ள தீய சிந்தனைகளை அழித்தல் ஆகிய முத்தொழில்களையும் செய்கின்றேன். அறிவீர்களாக!" என்று கண்ணதாசன் கவிதை பாடுகிறார்.

மையக்கருத்து

காலத்தைக் கணித்தும் முத்தொழில் புரிந்தும் இறைவனுக்குச் சமமான நிலையினைப் பெற்ற கவிஞனைப் புகழ்ந்துரைப்பது இப்பாடலின் மையக்கருத்து ஆகும்.

சொல் நயம்

'கருப்படு பொருளை உருப்பட வைப்பேன்'

என்ற பாடலடியில் சொல்நயம் மிகுந்து வந்துள்ளது.

பொருள் நயம்

"யானோர் காலக் கணிதம், கருப்படு பொருளை உருப்பட வைப்பேன், பொன்னினும் விலைமிகு பொருள் என்செல்வம்" ஆகிய சொற்கள் ஆழமான பொருள் உடையன.  கவிதையின் மையக் கருத்துக்கு அழகு சேர்ப்பன.

சந்த நயம்

'சந்தம் செந்தமிழுக்கே சொந்தம்' என்பார்கள். வல்லோசையும் மெல்லோசையும் சேருமிடத்தில் சந்தநயம் பிறக்கிறது.

"புவியில் நானோர் புகழுடைத் தெய்வம் 

பொன்னினும் விலைமிகு பொருள் என் செல்வம்" என்ற கவிதை வரிகளில் இனிமையான சந்தநயம் பயின்று வந்துள்ளது.

தொடை நயம்

"தொடையற்ற பாட்டு நடையற்றுப் போகும்" என்பார்கள். இப்பாடலில் மோனை, எதுகை, முரண், இயைபு ஆகிய நான்கு தொடை நயங்களும் பயின்று வந்துள்ளன.

மோனை நயம்

முதலெழுத்து ஒன்றி வரத் தொடுப்பது மோனை நயம் ஆகும்.

"படைக்கு அழகு யானை 

பாடலுக்கு அழகு மோனை" என்பதற்கு ஏற்ப இப்பாடலில்,

கவிஞன்

கணிதம்

புவியில்

புகழுடைத்

அளித்தல்

அழித்தல்

என்ற இடங்களில் மோனை நயம் பயின்று வந்துள்ளது.

எதுகை நயம்

முதலெழுத்து அளவொத்து, இரண்டாம் எழுத்து ஒன்றி வரத் தொடுப்பது எதுகை நயம் ஆகும்.

கருப்படு

பொருளை

உருப்படு

இவை சரியென்றால்

இவை தவறாயின்

என்ற இடங்களில் எதுகை நயம் பயின்று வந்துள்ளது.

முரண் நயம்

முரண்பட்ட சொற்களால் அமைவது முரண்நயம் ஆகும்

'ஆக்கல் ×அழித்தல், சரி×தவறு ' என்ற சொற்கள் முரண் சுவையைத் தருகின்றன.

இயைபு நயம்

பாடலின் இறுதி எழுத்தோ, அசையோ, சீரோ இயைந்து வருவது இயைபுநயம் ஆகும்.

கணிதம்

தெய்வம்

செல்வம்

என்ற இடங்களில் இயைபு நயம் பயின்று வந்துள்ளது.

அணிநயம்

'அணி இல்லாத கவிதை

பணி இல்லாத வனிதை' என்பார்கள். இப்பாடலில், கவிஞர் தம்மைக் காலக்கணிதமாகவும் புகழுடைத் தெய்வமாகவும் உருவகப்படுத்தியுள்ளார்.  மேலும், தன்னுடைய கவிதையைச் செல்வமாகவும் உருவகப்படுத்தியுள்ளார். இவ்வாறு, உவமையின் தன்மையைப் பொருள்மேல் ஏற்றிக்கூறுவது உருவகம் ஆகும். எனவே, இப்பாடலில் வந்துள்ள அணி 'உருவக அணி' ஆகும்.

கவிஞர் கண்ணதாசன் தமிழ்ப்பெரும் கவிஞர்களுள் ஒருவர்.  அவரது கவிதைகளில் கவித்துவம் நிரம்பி வழியும் என்பதற்கு இக்கவிதை சான்று.

-மலர் மகேந்திரன்

8 மதிப்பெண் வினா மங்கையராய் பிறப்பதற்கே மகளிர் நாள் விழா அறிக்கை

 நிகழ்வுகளைத் தொகுத்து அறிக்கை எழுதுக.

மகளிர் நாள் விழா

இடம் - பள்ளிக் கலையரங்கம்.    நாள்: 08-03-2021

கலையரங்கத்தில் ஆசிரியர்கள், மாணவர்கள் கூடுதல் - தலைமை ஆசிரியரின் வரவேற்பு - இதழாளர் கலையரசியின் சிறப்புரை - ஆசிரியர்களின் வாழ்த்துரை - மாணவர் தலைவரின் நன்றியுரை.

மகளிர் நாள் விழா - அறிக்கை

இடம் - பள்ளிக் கலையரங்கம்.                                    நாள்: 08-03-2021

கலையரங்கத்தில் ஆசிரியர்கள், மாணவர்கள் கூடுதல்

மார்ச் 8, 2021 ஆம் ஆண்டு, மாலை 4 மணி அளவில் சங்கரலிங்கபுரம் அரசு மேல்நிலைப்பள்ளிக் கலையரங்கத்தில் மகளிர் நாள் விழாக் கொண்டாட்டத்திற்காகப் பள்ளி வளாகமே விழாக்கோலம் பூண்டிருந்தது.  மாணவர்கள் வரிசையாக அணிவகுத்து வந்தனர்.  ஆசிரியர்கள், அவர்களை ஒழுங்கு முறையில் அமர வைத்தனர். தலைமையாசிரியர் மற்றும் சிறப்பு விருந்தினர் கலையரசி ஆகியோர் விழா மேடையில் தோன்றினர்.

தலைமையாசிரியரின் வரவேற்பு

விழா, தமிழ்த்தாய் வாழ்த்துப் பாடலுடன் தொடங்கியது.  தலைமையாசிரியர், மகளிர்தின விழா கொண்டாடப்படுவதன் நோக்கத்தைப் பற்றிக் கூறி, விழாவிற்கு வருகை தந்த அனைவரையும் வரவேற்றுப் பேசினார்.  சிறப்பு விருந்தினர் கலையரசியின் இதழ்ப்பணி குறித்தும், பெண்கள் முன்னேற்றப் பணிகள் குறித்தும் எடுத்துக்கூறி, அவரை அறிமுகப்படுத்தினார்.  மாணவர்களின் கரவொலி முழங்க, இதழாளர் கலையரசிக்குப் பொன்னாடை போர்த்திக் கௌரவித்தார்.

இதழாளர் கலையரசியின் சிறப்புரை

'திக்கெட்டும் ஒலிக்கட்டும் பெண்ணியம்' எனத் தொடங்கி பெண்களின் மென்மைக் குணங்கள், குடும்ப நலன் காக்கும் பெண்ணியம், பெண்களின் மன உறுதி, சாதனை படைத்த பெண்கள், பெண்களுக்கு எதிரான வன்முறைகளும் தீர்வுகளும் ஆகிய தலைப்புகளில் ஆழமான கருத்துகளை விதைத்தார். அவருடைய கனிவான, கருத்துச் செறிவான பேச்சு அனைவரையும் கவர்ந்தது. 

"பெண்ணே நீ உனக்கென

வாழ்வது எப்போது?

உண்மையான மாற்றம் வரும்

அப்போது" 

என்று கூறி, உரையை நிறைவு செய்தார்.

ஆசிரியர்களின் வாழ்த்துரை

பலத்த கரவொலிகளுக்கிடையே தமிழாசிரியர் மாணவர்களுக்கு வாழ்த்துரை வழங்க மேடையில் தோன்றினார்.  'மங்கையராய்ப் பிறப்பதற்கே நல்ல மாதவம் செய்திட வேண்டுமம்மா' என்ற கவிமணியின் பாடலுடன் தொடங்கி மாணவக் கண்மணிகளை வாழ்த்திப் பேசினார்.  அவரைத் தொடர்ந்து சமூக அறிவியல் ஆசிரியர், இன்றைய சமூகத்தில் பெண்கள் எதிர்கொள்ளும் சவால்களை எடுத்துக்கூறி, அவற்றுக்கான தீர்வுகளை முன்மொழிந்தார்.  மாணவச் செல்வங்கள் வரலாற்றில் தடம் பதிக்க வேண்டும் என வாழ்த்தி விடைபெற்றார். 

மாணவர் தலைவரின் நன்றியுரை

இந்த நாளை இனிய பொன்னாளாக மாற்றிக் கொடுத்த தலைமை ஆசிரியர், சிறப்பு விருந்தினர், ஆசிரியர்ப் பெருமக்கள், மாணவக் கண்மணிகள் மற்றும் விழா ஏற்பாட்டுக் குழு ஆகியோருக்கு மாணவர் தலைவர் நன்றி தெரிவித்துப் பேசினார்.  நாட்டுப்பண் இசைக்க, விழா இனிதே நிறைவுற்றது.

-மலர் மகேந்திரன்

8 மதிப்பெண் வினா சங்க இலக்கியத்தில் அறம் உறவினருக்கு கடிதம்

 பள்ளித் திடலில் கிடைத்த பணப்பையை உரியவரிடம் ஒப்படைத்ததையும் அதற்குப் பாராட்டும் பெற்றதையும் பற்றி வெளியூரில் இருக்கும் உறவினர் ஒருவருக்குக் கடிதம் எழுதுக.

உறவினருக்குக் கடிதம்

விருதுநகர்,

12-10-2020.

அன்புள்ள அத்தைக்கு,

வணங்குகிறேன்.  இங்கு நானும் அப்பாவும் அம்மாவும் தம்பியும் நலமாக இருக்கிறோம்.  உங்களது நலம் மற்றும் மாமாவின் நலம் அறிய ஆவல்.  சிறுவயது முதலே எனக்கு நல்ல அறநெறிக் கதைகளைக் கூறி நல்வழிப்படுத்தினீர்கள்.  நீங்கள் கூறிய நன்னெறிப்படியே இதுவரை நான் ஒழுகி வந்துள்ளேன்.  அதனால் ஏற்பட்ட நன்மையை அனுபவித்துக் கொண்டிருக்கிறேன்.  அதற்காகத் தங்களுக்கு நன்றிக்கடன் பட்டுள்ளேன்.

கடந்த திங்களன்று மதிய உணவு இடைவேளையில் உணவு அருந்துவதற்காக நானும் எனது நண்பனும் பள்ளித்திடல் அருகில் உள்ள வேப்ப மரத்தடிக்குச் சென்றோம்.  அங்கு ஒரு பணப்பையைக் கண்டேன். எடுத்துப் பார்த்தபோது அதில் சில இரண்டாயிரம் ரூபாய் நோட்டுகளும் அடையாள அட்டைகளும் இருப்பதைக் கண்டேன்.  பணப்பையை தவறவிட்டவரின் மனம் எவ்வளவு துடித்திருக்கும் என்று எண்ணிப்பார்த்தேன்.  

ஆதார் அட்டையில் உள்ள தொலைபேசி எண்ணில் உரியவரைத் தொடர்பு கொண்டேன்.  உடன் பள்ளி தலைமையாசிரியர் அறைக்குச் சென்று நடந்ததைக் கூறினேன்; பணப்பையை ஒப்படைத்தேன்.  சிறிது நேரத்தில் உரியவர் வந்தார்.  சரியான அடையாளத்தைக் கூறிப் பணத்தை பெற்றுக் கொண்டார்; என்னை வாழ்த்திச் சென்றார்; தலைமையாசிரியரும் ஆசிரியப் பெருமக்களும் என்னைப் பாராட்டினார்கள்.  இந்த வாழ்த்துக்கெல்லாம் உரியவர் நீங்கள்தான்.  எனக்கு நீங்கள் சொல்லிக்கொடுத்த, "இன்பம் இடையறா தீண்டும் அவாவென்னும் துன்பத்துள் துன்பம் கெடின்" என்ற திருக்குறள் எவ்வளவு உண்மையானது என்பதை உணர்ந்து மகிழ்ந்தேன்.  

நன்றி அத்தை!

தங்கள் அன்புள்ள,

தமிழன்

உறைமேல் முகவரி

பெறுநர்

     திருமதி. இந்துமதி,

     கம்பர் தெரு,

     இராஜபாளையம்.

5 மதிப்பெண் வினா சிலப்பதிகாரம் மருவூர்ப்பாக்க வீதிகளும் இக்கால அங்காடிகளும்- ஓர் ஒப்பீடு

 ​‎சிலப்பதிகார மருவூர்ப்பாக்க வணிக வீதிகளை இக்கால வணிக வளாகங்களோடும் அங்காடிகளோடும் ஒப்பிட்டு எழுதுக.

அட்டவணையாக்கப்பட்ட விடையினைக்(சுருங்கிய பக்க வடிவமைப்பில்) காண இங்கு தொடுக. 

Click here to download answer(இயல்பான பக்க வடிவமைப்பு)

புகார் நகர மருவூர்ப் பாக்கத்தின் வணிக வீதிகளில் வண்ணக்குழம்பு, சுண்ணப்பொடி, குளிர்ந்த மணச்சாந்து, நறுமணப் புகைப் பொருள்கள், அகில் முதலான மணப்பொருள்கள் விற்பவர்கள் வீதிகளில் வணிகம் செய்து கொண்டிருந்தனர்.  

இன்றைய சந்தை வீதிகளில் சாந்துப்பொட்டு என்ற பெயரில் மிகவும் அரிதாக வண்ணக்குழம்பு விற்கப்படுகிறது. பெரும்பாலான பெண்கள் ஒட்டும் வண்ணப் பொட்டுகளை வைத்துக் கொள்கிறார்கள்.  சுண்ணப்பொடிகள் சிறிய சிறிய பொட்டலங்களாக பல வண்ணங்களில் உள்ளூர் அங்காடிகளில் கிடைக்கின்றன.  குளிர்ந்த மணச்சாந்து பெரும்பாலும் சமய வழிபாட்டிற்கு மட்டுமே பயன்படுத்தப்படுகிறது. பெரும்பாலும் கோவில்களுக்கு அருகில் உள்ள கடைகளில் கிடைக்கிறது. மாலை நேரங்களில் பெரும்பாலான அங்காடிகளில் சாம்பிராணிப்புகை காட்டப்படுகிறது. கிராமங்களில் இன்றும் சாம்பிராணி போடும் வழக்கம் இருக்கிறது.  ஆனால், பெரும்பாலான ஆண்களும் பெண்களும் புட்டிகளில் அடைக்கப்பட்ட செயற்கை வாசனைத் திரவியங்களையே பயன்படுத்துகின்றனர். அச்சில் வார்க்கப்பட்ட சாம்பிராணி சிறிய பொட்டலங்களாக உள்ளூர்க்கடைகளிலும் செயற்கை வாசனைத் திரவியங்கள் பெரிய கடைகளிலும் கிடைக்கின்றன.

மருவூர்ப் பாக்கத்தில் பட்டு, முடி, பருத்திநூல் கொண்டு நெசவு நெய்யும் நெசவாளர் வாழும் வீதிகள் இருந்தன.  

இன்றும் பட்டு, பருத்தி நூல் கொண்டு கைத்தறி நெசவு செய்யும் ஊர்கள் மிகக்குறைவாக அளவில் உள்ளன.  அதிக அளவிலான விசைத்தறி ஆலைகள் புறநகர்ப் பகுதிகளில் அமைந்துள்ளன.

மருவூர்ப்பாக்க வணிக வீதிகளில் பட்டு, பவளம், சந்தனம், அகில், முத்து, மணி போன்றவை அளக்க முடியாத அளவிற்குக் குவிந்து கிடக்கும். ஆனால், இன்றோ துணிக்கடைகளில் பட்டு ஆடைகளுக்குத் தனிப்பிரிவே இருக்கிறது.  பெரிய அளவிலான நகைக்கடைகளில் தங்கம், பிளாட்டினம், நவரத்தினக் கற்கள் மிகுந்த காவலோடு விற்கப்படுகின்றன.

மருவூர்ப்பாக்கக் கூல வீதிகளில் எட்டு வகையான தானியங்களும் குவிந்து கிடக்கும்.  இன்றோ, பல்பொருள் அங்காடிகளில் பல வகையான தானியங்கள் பொட்டலங்களாக ஞவிற்கப்படுகின்றன; குவிந்து கிடப்பதில்லை.

மருவூர்ப்பாக்கத்தில் பிட்டு வணிகர், அப்பம் சுடுபவர், கள் விற்கும் வலைச்சியர், மீன் விற்கும் பரதவர், உப்பு விற்கும் உமணர், வெற்றிலை விற்பவர், ஏலம் முதலான ஐந்து நறுமணப் பொருட்களை விற்பவர், எண்ணெய் வணிகர் எனப் பலரும் வாழும் வீதிகளும் இருந்தன. 

இன்று, தெருவோரத் துரித உணவுப்பண்டங்கள் விற்கும் கடைகளும் குளிர்சாதன வசதி நிறைந்த உயர்தரமான நட்சத்திரத் தகுதி பெற்ற உணவகங்களும் இருக்கின்றன.  மது விற்கும் கடைகளும் மீன் விற்கும் கடைகளும் இருக்கின்றன.  உள்ளூர் அங்காடிகளில் உப்பு, வெற்றிலை, ஏலம், வெற்றிலை, எண்ணெய் ஆகியவை கிடைக்கின்றன. 

வெண்கலம் மற்றும் செப்புப்பாத்திரங்கள் செய்வோர், மரத்தச்சர், இரும்புக்கொல்லர், ஓவியர், மட்பாண்டப் பொம்மைகள் செய்பவர், சிற்பிகள், பொற்கொல்லர், இரத்தின வேலை செய்பவர், தையல்காரர், தோல்பொருள் தைப்பவர், துணியாலும் கட்டைகளாலும் பொம்மைகள் செய்பவர் ஆகியோர் வாழும் வீதிகள் இருந்தன. 

 இயந்திரமயமான இக்காலத்தில் எல்லா விதமான தொழில்களையும் செய்யும் தொழிற்சாலைகள் வந்துவிட்டன. ஓவியங்கள் அச்சில் வெளிவருகின்றன. நவீன தொழில் நுட்பத்தால், சிற்பங்கள் முப்பரிணாம வடிவில் அச்சு வார்ப்புகளாக உருவாக்கப்படுகின்றன.  விதவிதமான பொம்மைகளுக்கென்றே தனிக் கடைகள் வந்துவிட்டன. நகைக் கடைகள், துணிக்கடைகள், தையல் கடைகள், பொம்மைக் கடைகள், மரக்கடைகள், பாத்திரக் கடைகள் ஆகியவற்றுக்குத் தனித்தனியாக வீதிகள் வந்துவிட்டன.

மருவூர்ப்பாக்கத்தில் பெரும்பாணர் வசிக்கும் வீதிகளும், கைத் தொழில் செய்வோர் வாழும் வீதிகளும், பிறருக்கு ஏவல் செய்வோர் வாழும் வீதிகளும் இருந்தன.  கூத்து கலைகள் அருகி வரும் இக்காலத்தில் ஒரு சில ஊர்களில் இசைக்கலைஞர்கள் வாழ்ந்து வருகின்றனர்.  கைத் தொழில் புரிவோர் பல ஊர்களிலும் பரவலாக வாழ்கின்றனர்.  நாகரிக வளர்ச்சியின் காரணமாக ஏவல் புரிவோர், பணியாளர்களாக மாற்றம் அடைந்துள்ளனர். தொழில்நுட்ப வளர்ச்சியின் உச்சமாக மின்னணு வணிகம் வளர்ந்து கொண்டே வருகிறது.

5 மதிப்பெண் வினா மெய்க்கீர்த்தி பாநயம்

பாடப் பகுதியில் இடம் பெற்றுள்ள மெய்க்கீர்த்திப் பாடலில் நயத்தை விளக்குக.

பாடப் பகுதியில் இடம்பெற்றுள்ள மெய்க்கீர்த்திப் பாடல்

இந்திரன் முதல் திசா பாலர் எண்மரும் ஒரு வடிவாகி

வந்தபடி என நின்று மனுவாணை தனி நடாத்திய

படி யானையே பிணிப்புண்பன

வடி மணிச் சிலம்பே அரற்றுவன

செல் ஓடையே கலக்குண்பன வருபுனலே சிறைப்படுவன

மாவே வடுப்படுவன மாமலரே கடியவாயின

காவுகளே கொடிய வாயின கள்ளுண்பன வண்டுகளே

பொய் உடையன வரைவேயே போர் மலைவன எழுகழனியே

மை உடையன நெடு வரையே மருள் உடையன இள மான்களே

கயல் குலமே பிறழ்ந்து ஒழுகும் கைத்தாயாரே கடிந்து ஒறுப்பர்

இயற்புலவரே பொருள் வைப்பர் இசைப்பாணரே கூடம் செய்வார்

என்று கூறி இவன் காக்கும் திருநாட்டின் இயல் இது என

 நின்று காவல் நெறி பூண்டு நெறி அல்லது நினையாது

தந்தை இல்லோர் தந்தையாகியும் தாயர் இல்லோர் தாய ராகியும்

மைந்தர் இல்லோர் மைந்தராகியும் மன்னுயிர்கட்கு உயிராகியும்

விளி பெற்ற பயனென்னவும் மெய் பெற்ற அருளென்னவும்

மொழி பெற்ற பொருளென்னவும் முகம் பெற்ற பனுவல் என்னவும் 

எத்துறைக்கும் இறைவன் என்னவும் யாம் செய்.

பாடலில் உள்ள நயங்கள்

தலைப்பு: நாட்டு வளமும் ஆட்சிச் சிறப்பும்

திரண்ட கருத்து

இரண்டாம் இராஜராஜன் ஆட்சியில் பிணைக்கப்பட்டவை யானைகள் மட்டுமே.  கட்டுண்டு கொடுமைப்படுத்தப்பட்டவர் யாருமே இல்லை. அழகிய மணிகள் பொருந்திய சிலம்புகள் மட்டுமே ஒலி எழுப்பின. துன்பத்தால் மனம் கசந்து அழுதவர்களின் ஒலி கேட்கவே இல்லை.  நீரோடும் ஓடைகளே கலக்கப்பட்டன.  உள்ளம் கலங்கினவர் ஒருவரும் காணப்படவில்லை.  ஓடி வரும் தண்ணீரே பெரிய நீர்நிலைகளில் சிறைப்படுத்தப்பட்டது.  வேறு யாருக்கும் சிறை என்பதே கிடையாது.  மாம்பிஞ்சுகளே 'வடு' என்னும் பெயரைப் பெற்றன ஆனால் வடுவுற்றார் என்று கூறப்பட்டார் யாருமில்லை.  சோலைகளில் காணப்படும் அழகிய வண்டுகள் மொய்க்கப்பட்ட மலர்களே மணம் மிக்கு விளங்கின. கடிய தன்மை வாய்ந்தவர் எவருமே நாட்டில் இல்லை.  சோலைகளே படரும் கொடிகளை உடையனவாக இருந்தன. கொடியவை என்று கூறத்தக்க உயிர்கள் எதுவுமே இல்லை.  வண்டுகளே மலரில் மொய்த்துத் தேனாகிய கள்ளினை உண்டு திரிந்தன. வேறு 'கள்' உண்டு மயங்கி திரிந்தவர்கள் யாரும் இருந்திலர். மலைகளில் உள்ள மூங்கில்களே கணுக்கள் எனப்படும் பொய்யினைப் பெற்றிருந்தன. வேறு யாரும் பொய் கூற வேண்டிய அவசியம் இன்றி வாழ்ந்துள்ளனர். நன்கு விளைந்த கழனிகளே வைக்கோல் போர்களைக் குவித்தன.  நாட்டில் போர் என்பததே இல்லாததாயிற்று. உயர்ந்த மலைகளே கரிய நிறத்தைப் பெற்றிருந்தன. குற்றம் உடையோர் எவரும் இலர். மான்கள் மட்டுமே மருளும் தன்மை உடையனவாக இருந்தன. எதனாலும் மருளும்நிலை யாருக்கும் ஏற்படவில்லை. மீன்கள் மட்டுமே பிறழ்ந்து பிறழ்ந்து வாழும் இயல்பினைப் பெற்றிருந்தன. வாழ்க்கையில் பிறழ்ந்தவர் சோழ நாட்டில் எவரும் இல்லை. தாய்மார்கள் மட்டுமே தங்கள் குழந்தைகளைக் கடிந்து தண்டனை அளித்து வந்தனர். வேறு தண்டனை பெற்றவர் யாருமில்லை. சிறந்த புலவர்கள் தங்கள் பாடல்களில் பொருளைச் சேர்த்து வைத்தனர்.  வேறு யாருக்கும் பொருளைச் சேர்த்து வைக்கும் அவசியம் ஏற்படவில்லை. இசைப் புலமை வாய்த்துப் பாடிப் பரிசில் பெறும் பாணர்களே இசையினைக் கருவி இசையுடன் கூட்ட முயற்சி செய்துள்ளனர்.  முயற்சியால் கூட்டி வைக்கும் நிலையில் பிரிவுடையார் யாரும் இல்லை. இம்மன்னனுடைய நாட்டின் இயல்பு இதுவே என்று யாவரும் புகழ்ந்து கூறுமாறு நெறிமுறை நின்று நீதி தவறாது ஆட்சி செலுத்தியதாகக் குறிப்பிடப்பட்டுள்ளது.  மேலும், தந்தை இல்லாதவருக்குத் தந்தையாகவும் தாயார் இல்லாதவருக்குத் தாயாராகவும் மைந்தர் இல்லாதவருக்கு மைந்தராகவும் உலக உயிர்களுக்கு எல்லாம் உயிராகவும் திகழ்ந்தான்.  விழிபெற்ற பயனாகவும் மெய் பெற்ற அருளாகவும் மொழிபெற்ற பொருளாகவும் புகழ்பெற்ற நூலாகவும் எத்துறைக்கும் இறைவனாகவும் விளங்கினான்.

மையக்கருத்து

இப்பாடல், சோழநாட்டின் வளத்தையும் இரண்டாம் இராஜராஜ சோழனின் நீதிநெறி தவறாத ஆட்சிச்சிறப்பையும் மையக் கருத்தாகக் கொண்டு பாடப்பட்டுள்ளது. 

சொல் நயம்

வடிமணிச்சிலம்பு, எழுகழனி, பிறழ்ந்தொழுகும் கயற்குலம், கூடச் செய்யும் இசைப்பாணர் போன்ற சொல்நயம் மிக்க செஞ்சொற்கள் இப்பாடலின் இன்பத்தைக் கூட்டுகின்றன.

பொருள் நயம்

பொய்யுடைய வரைவேய், மையுடைய நெடுவரை, மெய் பெற்ற அருள், முகம் பெற்ற பனுவல் ஆகியவை ஆழமான பொருளுடையன. இவை, செய்யுளின் மையக் கருத்துக்கு வலிமை சேர்க்கின்றன.

சந்த நயம்

'சந்தம் செந்தமிழுக்கே சொந்தம்' என்பார்கள்.  வல்லோசையும் மெல்லோசையும் சேருமிடத்தில் சந்தநயம் பிறக்கிறது.  பாடல் முழுவதும் சந்தநயம் பயின்று வந்தாலும்

"கயற் குலமே பிறழ்ந்து ஒழுகும் கைத்தாயாரே கடிந்து ஒறுப்பர்

இயற்புலவரே பொருள் வைப்பர் இசைப்பாணரே கூடம் செய்வார்" என்ற அடிகளில் சந்த நயம் சிறப்பாக அமைந்துள்ளது.

தொடை நயம்

"தொடையற்ற பாட்டு நடையற்றுப் போகும்" என்பார்கள். இப்பாடலில் மோனை, எதுகை, முரண், இயைபு ஆகிய நான்கு தொடை நயங்களும் பயின்று வந்துள்ளன.

மோனை நயம்

முதலெழுத்து ஒன்றி வரத் தொடுப்பது மோனை நயம் ஆகும்.

"படைக்கு அழகு யானை 

பாடலுக்கு அழகு மோனை" என்பதற்கு ஏற்ப இப்பாடலில்,

மாவே 

மாமலரே

பொய்

போர் 

என்ற இடங்களில் மோனை நயம் பயின்று வந்துள்ளது.

எதுகை நயம்

முதலெழுத்து அளவொத்து, இரண்டாம் எழுத்து ஒன்றி வரத் தொடுப்பது எதுகை நயம் ஆகும்.

படி யானை

வடிமணிச்சிலம்பு

என்று

நின்று

என்ற இடங்களில் எதுகை நயம் பயின்று வந்துள்ளது.

முரண் நயம்

முரண்பட்ட சொற்களால் அமைவது முரண்நயம் ஆகும்

'செல் ஓடை × வரு புனல்' என்ற சொற்கள் முரண் சுவையைத் தருகின்றன.

இயைபு நயம்

பாடலின் இறுதி எழுத்தோ, அசையோ, சீரோ இயைந்து வருவது இயைபுநயம் ஆகும்.

வண்டுகளே

இளமான்களே

எழுகழனியே

வரைவேயே

நெடுவரையே

என்ற இடங்களில் இயைபு நயம் பயின்று வந்துள்ளது.

அணிநயம்

'அணி இல்லாத கவிதை

பணி இல்லாத வனிதை' என்பார்கள். இப்பாடலின்,

"இந்திரன் முதல் திசா பாலர் எண்மரும் ஒரு வடிவாகி" என்ற அடிகளில் 'உயர்வு நவிற்சி அணி' பயின்று வந்துள்ளது.  இந்திரன் முதலான திசைக் காவலர்கள் எட்டு பேரும் ஒரு வடிவில் தோன்றுவது போல இரண்டாம் இராஜராஜன் ஆட்சி செய்தான் என்று உயர்வாகக் கூறப்பட்டுள்ளது.

'மை உடையன நெடு வரையே மருள் உடையன இள மான்களே' என்ற அடிகளில் 'இயல்பு நவிற்சி அணி' பயின்று வந்துள்ளது.  இதுவரை பாடல் முழுவதும் நயங்கள் பயின்று வந்துள்ளதை அறிந்து மகிழ்ந்தோம்.

-மலர் மகேந்திரன்

8 மதிப்பெண் வினா மாணவப் பருவமும் நாட்டுப் பற்றும் மேடை உரை

 நாட்டு விழாக்கள் - விடுதலைப் போராட்ட வரலாறு - நாட்டின் முன்னேற்றத்தில் மாணவர் பங்கு - குறிப்புகளைக் கொண்டு ஒரு பக்க அளவில் 'மாணவப் பருவமும் நாட்டுப்பற்றும்' என்ற தலைப்பில் மேடை உரை எழுதுக.

மேடை உரை

மாணவப் பருவமும் நாட்டுப் பற்றும்

இங்கே கூடியிருக்கும் ஆன்றோர்களே! தமிழ்ச் சான்றோர்களே! உங்கள் அனைவருக்கும் என் வணக்கத்தை உரித்தாக்குகிறேன்.  இப்போது உங்களிடத்திலே 'மாணவப் பருவமும் நாட்டுப்பற்றும்' என்ற தலைப்பில் பேச வந்திருக்கிறேன்.

மாணவப் பருவம் என்பது பசுமையான நிகழ்வுகளைத் தாங்கி நிற்கும் நந்தவனம் ஆகும்.  அத்தகைய பருவத்தில் விதைக்கப்படும் கருத்துக்கள் 'பசுமரத்தாணி போல' பதியும்.  ஆதலால், இளமைப் பருவத்திலேயே ஒருமைப்பாட்டுணர்வும் நாட்டுப்பற்றும் ஊட்டப்பட வேண்டும்.

நாட்டு விழாக்கள்

உயர்ந்த இலட்சியங்களான சுதந்திரம் - சமத்துவம் - சகோதரத்துவம் பேணவும், தேசிய ஒருமைப்பாட்டுணர்வை வளர்க்கவும், வேற்றுமையில் ஒற்றுமை காணவும் நாம் நாட்டு விழாக்களைக் கொண்டாடி வருகின்றோம். சுதந்திர தினவிழா, குடியரசு தினவிழா, காந்தி ஜெயந்தி, உழைப்பாளர் தினம் ஆகியவற்றைத் தேசிய விழாக்களாக நாம் கொண்டாடி வருகின்றோம். சுதந்திரத்திற்காகத் தமது இன்னுயிரை ஈந்த தலைவர்களை நினைவு கூறவும், தேசபக்தியை வளர்த்துக் கொள்ளவும், நாட்டின் முன்னேற்றத்திற்குத் தம்மை  அர்ப்பணிக்கவும் நாட்டு விழாக்கள் துணைபுரிகின்றன.

விடுதலைப் போராட்ட வரலாறு

நமது இந்திய விடுதலைப் போராட்ட வரலாறு மிக நீண்டது.  வணிகம் செய்யும் பொருட்டு இந்தியாவிற்குள் நுழைந்த ஆங்கிலேயர் அங்காங்கே வணிகத் தளங்களை நிறுவினர்.  அவற்றை நிர்வாகம் செய்யும் பொருட்டு, தங்களுக்கென்று நிர்வாக அமைப்பையும் இராணுவத்தையும் அமைத்துக்கொண்டனர்.  ஊர் இரண்டுபட்டால் கூத்தாடிக்குக் கொண்டாட்டம் என்பதைப்போல, உள்நாட்டில் எழுந்த உட்பூசல்களில் தலையிட்டு, வரிவசூல் செய்யும் அதிகாரத்தையும், பின்னர் படிப்படியாக ஆட்சி செய்யும் அதிகாரத்தையும் பெற்றனர்.  

நீதிமுறையற்ற வரிவசூல் முறைகளால் பாதிக்கப்பட்ட பாளையக்காரர்கள் கிளர்ச்சி செய்தனர்.  வெல்லெஸ்லியின் துணைப்படைத்திட்டத்தாலும் டல்கௌசியின் வாரிசு இழப்புக் கொள்கையாலும் ஆட்சியை இழந்த மன்னர்களும், இராணுவச் சீர்திருத்தங்களால் பாதிக்கப்பட்ட இந்திய வீரர்களும் முதல் இந்திய சுதந்திரப் போரில் கலந்து கொண்டனர்.  ஆங்கிலக் கல்வியின் தாக்கத்தால் படித்த இந்தியர்கள் படிப்படியாக அரசியல் சமத்துவம் வேண்டி பல்வேறு போராட்டங்களை முன்னெடுத்தனர்.  சமூக மற்றும் சமயச் சீர்திருத்த இயக்கங்கள் இந்தியாவின் பெருமையை வெளிக்கொண்டு வந்தன. 

1885இல் உருவான இந்தியத்தேசியக் காங்கிரஸ் எனும் பேரியக்கம் ஒத்துழையாமை இயக்கம், சட்டமறுப்பு இயக்கம், உப்பு சத்தியாகிரகம், வெள்ளையனே வெளியேறு இயக்கம் ஆகிய போராட்டங்களை அமைதி வழியில்நின்று நடத்தி வெற்றி கண்டது.  கிரிப்ஸ் தூதுக்குழு இந்தியாவிற்குத் தன்னாட்சி வழங்கப் பரிந்துரை செய்தது. கேபினட் தூதுக்குழு இந்தியாவிற்குத் தனி அரசியலமைப்புக்குழு அமைக்க பரிந்துரை செய்தது.  இறுதியாக, மவுண்ட்பேட்டன் திட்டப்படி சுதந்திர இந்தியா உருவானது.

நாட்டின் முன்னேற்றத்தில் மாணவர் பங்கு

இன்றைய மாணவர்கள் எதிர்கால இந்தியாவின் தூண்கள். அவர்கள் நாட்டுப்பற்று மிக்கவர்களாகவும் சமூகத்தொண்டு புரிபவர்களாகவும் மலர வேண்டும்.  'ஐந்தில் வளையாதது ஐம்பதில் வளையாது' என்பதை உணர்ந்து  இளமைப் பருவத்திலேயே சாரணர் இயக்கம், தேசிய மாணவர்படை, பசுமைப்படை, செஞ்சிலுவைச் சங்கம், சுற்றுச்சூழல் மன்றம், சாலைப் பாதுகாப்பு இயக்கம் ஆகியவற்றில் சேர்ந்து பல்வகைத் திறன்களை வளர்த்துக் கொள்ள வேண்டும். 

 சுற்றுச்சூழலைத் தூய்மையாக வைத்திருக்க வேண்டும்.  பொதுச் சொத்துக்களைப் பாதுகாக்க வேண்டும்.  அறிவியல் மனப்பான்மையை வளர்த்துக் கொள்ள வேண்டும்.  வனவிலங்குகளைப் பாதுகாக்க வேண்டும்.  மரங்களை நட்டு வளர்க்க வேண்டும்.  நீர்நிலைகளைப் பராமரிக்க வேண்டும்.  சமூக விழிப்புணர்வு நிகழ்ச்சிகளில் பங்குபெற வேண்டும்.

எழுத்தறிவற்றவர்களுக்குக் கற்றுக் கொடுக்க வேண்டும். போக்குவரத்து நெரிசல், பேரிடர், திருவிழாக்கள் ஆகியவற்றில் காவல்துறைக்கு உதவியாக இருக்க வேண்டும்.  நலிவடைந்தோர் மற்றும் ஆதரவற்றோர்களுக்கு உதவி செய்ய வேண்டும்.

தேசியச் சின்னங்களை மதிக்க வேண்டும்.  தேசிய ஒருமைப்பாட்டைப் பேணிக் காக்க வேண்டும். மூத்தோருக்குக் கீழ்ப்படிய வேண்டும்.  சகிப்புத்தன்மை, விட்டுக்கொடுத்தல், பொறுமை, சகோதரத்துவ உணர்வு ஆகியவற்றை வளர்த்துக் கொள்ள வேண்டும்.

"பெற்றதாயும் பிறந்தபொன்னாடும் நற்றவ வானினும் நனிசிறந்தனவே" என்கிறார் பாரதியார்.  பெற்ற தாயைப்போல பிறந்த பொன்னாட்டைப் பேணிக்காப்பது நமது ஒவ்வொருவரின் கடமை என்று கூறி, பேச வாய்ப்பளித்த உங்கள் அனைவருக்கும் நன்றி கூறி விடைபெறுகிறேன். நன்றி, வணக்கம்!

- மலர் மகேந்திரன்

5 மதிப்பெண் வினா, சந்தக் கவிதையில் சிறக்கும் கம்பன், இலக்கிய உரை

'சந்தக் கவிதையில் சிறக்கும் கம்பன்' என்ற தலைப்பில் இலக்கிய உரை எழுதுக. அன்பும் பண்பும் குணச்சித்திரம் கொண்ட தலைவர் அவர்களே! தேர்ந்தெடுத்த பூக்கடை போன்று வரிசை தொடுத்து அமர்ந்திருக்கும் சான்றோர்களே! அறிஞர் பெருமக்களே! வணக்கம். இயற்கை கொலுவீற்றிருக்கும் காட்சியைப் பெரிய கலை நிகழ்வே நடப்பதான தோற்றமாகக் கம்பன் கவி காட்டுகிறது. தண்டலை மயில்கள் ஆட....

இவ்வுரையைத் தொடர்க!

இலக்கிய உரை

சந்தக் கவிதையில் சிறக்கும் கம்பன்

ஆன்றோர்களே, கல்வியில் சிறந்த சான்றோர்களே! உங்கள் அனைவருக்கும் என் முதற்கண் வணக்கத்தைத் தெரிவித்துக் கொள்கிறேன். ஓர் இலக்கியம் காலத்தை வென்று வாழ்வதற்குக் காரணம் அதன் கவிதைப் பண்பு என்று கூறுவர். இலக்கியத்தின் பாடு பொருளும் நோக்கமும் காரணங்கள்தாம். என்றாலும் இவற்றையும் தாண்டிக் கவிதைப் பண்புகள் தலைமைக் காரணங்கள் ஆகின்றன. கம்பராமாயணம் காலம் கடந்து வாழ்வதற்குக் கதை மட்டுமே காரணம் அன்று. அக்கதையைச் சொன்ன விதமும் காரணம் ஆகும். கவிதைப் பண்பு சிறக்க அமைவதற்குத் தேர்ந்த சொல்லாட்சி ஒரு காரணம். இனிய ஓசை நயம் இன்னொரு காரணம். வளமான கற்பனை பிறிதொரு காரணம். கற்பனை விரியும் வருணனைகள், உவமைகள், உணர்ச்சிகள் கவிதையைச் சிறக்கச் செய்யும். செய்யுளுக்கு உரிய அணிநலன்கள் கவிதைக்கு மெருகு சேர்க்கும். இவை யாவும் கம்பரின் கவிதையில் உண்டு. எனவே தான் கம்பர் கவித்திறன் கற்றவரால் பாராட்டப் பெறுகிறது. கம்பரின் கவிப்பண்பை விளக்குவதே இப்பகுதியின் நோக்கம். 

"தண்டலை மயில்கள் ஆட ...

தாமரை விளக்கம் தாங்க..."

கார்மேகம் கண்ட மயில்கள் ஆடுவது இயற்கை. ஆனால் தாமரை மலர்கள் விளக்காக மாறியதை நீங்கள் கேள்விப்பட்டதுண்டா? செந்தாமரை மலர்களைச் சுடர்விடும் விளக்காகக் கற்பனை செய்ததோடு மட்டுமன்றி, 'மயில்களின் ஆட்டத்தை விளக்கமாகக் காண்பதற்காகவே விளக்காக மாறின' எனக் கற்பனைசெய்து கவிபாடியுள்ளார்.

'கொண்டல்கள் முழவினேங்க'

மேகங்கள் ஒன்றோடு ஒன்று மோதினால் அச்சந்தரும் இடியோசை உண்டாகும். ஆனால், மேகங்கள் மத்தளம் வாசித்தது உண்டா? அதுவும் மயில்களின் ஆட்டத்திற்கு ஏற்ப மத்தளம் வாசித்தது உண்டா? இதுவும் கற்பனையே!

'தேம்பிழி மகரயாழின் வண்டுகள் இனிது பாட'

வண்டுகள் தம் சிறகுகளை விரைவாக அடிப்பதன் மூலம் ஒருவித ரீங்கார இரைச்சல் ஏற்படும். இது இயற்கை. ஆனால், வண்டுகள் பாடியதை நீங்கள் கேட்டதுண்டா? அதுவும் இனிமையான மகரயாழினை விடவும் இனிமையாகப் பாடியது உண்டா? உண்மையில் இல்லை. ஆனால், வண்டுகள் பாடியதாக, அதுவும் மயில்களின் ஆட்டத்திற்கு ஏற்பப் பாடியதாகக் கற்பனைசெய்து கம்பர் கவி பாடியுள்ளார்.

'குவளை கண்விழித்து நோக்க'

அத்துடன் நிற்கவில்லை கம்பர். "வண்டுகள் பாட, மயில்கள் ஆட, மேகங்கள் மத்தளம் இசைக்க" என்றவர், இந்தக் காட்சியை அங்கு மலர்ந்திருக்கும் குவளை மலர்கள் கண்விழித்துப் பார்த்து ரசிப்பதாகக் கற்பனை செய்துள்ளார்.  அதனோடும் நிறுத்திக் கொள்ளவில்லை கம்பர். மேலும் தொடர்கிறார்...

'தெண் திரை எழினி காட்ட'

தெளிந்த நீர்நிலை, அருகில் உள்ள பொருட்களைத் தன்னுள் தெளிவாகக் காட்டும். இதுவும் இயற்கை.  ஆனால், மேலே நடக்கும் காட்சிகளையெல்லாம் தெளிந்த நீரலைகள் திரைச்சீலையாய் விரிந்து காட்சிகளைக் காட்டுவதாகக் கற்பனை செய்துள்ளார்.

மற்றுமொரு பாடலில்,

'வெய்யோன் ஒளி தன் மேனியில் விரி சோதியில் மறைய'

இராமன் அழகான மேனியை உடையவன் என்பது அனைவரும் அறிந்த ஒன்று.  ஆனால், இராமனின் மேனியில் இருந்து வரும் பிரகாசமான ஒளியினால், உலகுக்கெல்லாம் ஒளியூட்டும் கதிரவனின் ஒளியே கரைந்து காணாமல் போவதாகக் கற்பனை செய்து பாடியுள்ளார். 

'பொய்யோ எனும் இடையாளொடும்'

பெண்களுக்கு அழகே இடைதான். அந்த இடை, அளவில் சிறியதாக இருக்க வேண்டும்.  சீதைக்கு, 'இடையே இல்லை' என்னும் அளவிற்கு இடை சிறுத்து இருந்ததாகக் கவி பாடியுள்ளார்.

'மையோ மரகதமோ மறிகடலோ மழை முகிலோ'

இராமனின் மேனி அழகை வருணிக்க வந்த கம்பர், முதலில் 'மை' என்றார்.  'மை' என்றால் 'நீல வண்ண மேனி' என்று பொருள். 'மை நிறம்' பார்க்கப் பார்க்க ஒரு கட்டத்தில் சலிப்பைத் தந்துவிடுமோ எனக் கருதியவர், பின்னர் மரகதம் என்றார்.  மரகதம் ஒளியை உள்வாங்கி பிரதிபலிக்கத்தான் செய்கிறது.  அது மட்டுமல்லாமல் மரகதத்தை மலையில் இருந்துதான் வெட்டி எடுக்க வேண்டும். அதனால், மரகதத்தை விட மேலான 'நீலக்கடலே' என்றார். அதிலும் திருப்தி ஏற்படாததால், உலகோர்க்கு வாழ்வளிக்கும் 'மழைமேகம்' என்றார். அதிலும் திருப்தி ஏற்படாததால், "ஐயோ, இவன் அழகு என்பது ஓர் அழியாத அழகு" என்றார்.  இவ்வாறு, கீழிருந்து வரிசைப்படுத்தி வருணித்து, மேலும் வருணிக்க வார்த்தைகளே இல்லை என்று கூறி முடிப்பதாக அமையும் கவிநயம் இன்பமூட்டுகிறது.

இன்னொரு பாடலில், "உறங்குகின்ற கும்பகன்ன உங்கள் மாய வாழ்வெலாம் இறங்குகின்றது.  இன்றுகாண். எழுந்திராய் எழுந்திராய்.  கறங்குபோல வில்பிடித்த காலதூதர் கையில் உறங்குவாய் உறங்குவாய். இனிக்கிடந்து உறங்குவாய்" என்று உறங்குகின்ற கும்பகருணனை எழுப்பும் காட்சியைக் கண்முன் கொண்டு வந்து நிறுத்துகிறார்.

மற்றுமொரு பாடலில், "கோசல நாட்டில் கொடைவள்ளல்களே இல்லை. ஏனென்றால், அங்கு வறுமை என்பதே இல்லை.  படை வீரர்களின் வலிமையை அறிய முடியவில்லை. ஏனென்றால், அவர்களுக்குப் பகைவர்களே இல்லை.  இவர் சொல்வது உண்மை என்று கூறுவதற்கு யாருமே இல்லை. ஏனென்றால், யாரும் பொய் சொல்வதே இல்லை. அங்கு அறியாமை என்பதே இல்லை. ஏனென்றால் மக்கள் யாவரும் கேள்வியறிவு பெற்றவர்களாக இருக்கின்றனர்" என்கிறார். எங்கள் நாட்டில் அது இருக்கிறது, இது இருக்கிறது என்று கூறி புலவர்கள் கவி பாடுவார்கள். ஆனால், கம்பரோ, "எங்கள் நாட்டில் அது இல்லாததால் இது இல்லை, இது இல்லாததால் அது இல்லை" என்று கூறுவதன் மூலமாக எல்லாம் இருக்கிறது என்று பொருள்படும்படி கவி பாடியமை ஈண்டு இன்புறத்தக்கது.

இயற்கையின் தோற்றத்தைக் காட்சிப்படுத்த விளைந்த கம்பன்

"தாதுகு சோலைதோறும் சண்பகக்காடு தோறும்

போதுஅவிழ் பொய்கை தோறும் புதுமணல் தடங்கள்தோறும்

மாதவிவேலிப் பூகவனந்தோறும் வயல்கள் தோறும்

ஓதிய உடம்புதோறும் உயிரென உலாயது அன்றே" 

என்று பாடுகிறார்.  சரயு ஆறானது சோலைகளிலும் சண்பக் காடுகளிலும் பொய்கைகளிலும் பாக்குத்தோப்புகளிலும் புதுமணல்தடங்களிலும் வயல்வெளிகளிலும் பாய்ந்து ஓடுவது, உடம்பில் உயிர் ஓடுவதை ஒத்திருக்கிறது என்று உணர்ச்சியுடன் பாடியிருக்கிறார்.

வனவாசம் வந்த இராமன், சீதை, இலக்குவனோடு கங்கை ஆற்றைக் கடந்து செல்லும் சூழலில் அமைந்த பாடல் இது. 

"ஆழ நெடுந்திரை ஆறு கடந்திவர் போவாரோ?

வேழ நெடும்படை கண்டு விலங்கிடும் வில்லாளோ?

தோழமை என்றவர் சொல்லிய சொல்ஒரு சொல்லன்றோ?

ஏழமை வேடன் இறந்திலன் என்றெனை ஏசாரோ?" 

என்று குகனின் மனவோட்டத்தைப் படம் பிடித்துக் காட்டுகிறார், கம்பர்.  இவ்வாறு, கம்பர் பல்வேறு பாடல்களை ஓசை நயம் தோன்றப் படைத்துள்ளதைப் படித்து மகிழ முடியும். இதுவரை எனது உரையைக் கேட்டு மகிழ்ந்த உங்கள் அனைவருக்கும் எனது நன்றியைத் தெரிவித்துக் கொள்கிறேன்.

-மலர் மகேந்திரன்

8 மதிப்பெண் வினா நிகழ்கலை தலையங்கம்

 நிகழ்கலை வடிவங்கள்- அவை நிகழும் இடங்கள் - அவற்றின் ஒப்பனைகள் - சிறப்பும் பழைமையும் - இத்தகைய மக்கள் கலைகள் அருகி வருவதற்கான காரணங்கள் - அவற்றை வளர்த்தெடுக்க நாம் செய்ய வேண்டுவன - இவை குறித்து நாளிதழுக்கான தலையங்கம் எழுதுக.

தலையங்கம்

தலைப்பு : நிகழ்த்துக் கலைகள்

மனிதனின் அழகியல் வெளிப்பாடு கலையாகும். கலை என்பது பார்ப்போர் கேட்போர் மனத்தில் அழகியல் உணர்வைத் தோற்றுவிக்கும் வகையில் அந்தந்தப் பண்பாட்டுச் சூழலோடு வெளிப்படுத்தப்படுவது என்று தற்காலத் தமிழகராதி விளக்கமளிக்கிறது. இந்த அழகியல் உணர்வு வாழ்க்கை அனுபவத்திலிருந்து பெறப்பட்டுக் கலைத் தன்மையோடு நிகழ்த்திக் காட்டப்படுகிறது.

நிகழ்கலை வடிவங்கள்

மக்களின் முன் நிகழ்த்திக் காட்டும் வகையிலான கலைகளே நிகழ்த்துக் கலைகள் ஆகும்.  அவை ஆடலாகவோ, பாடலாகவோ, ஆடலும் பாடலும் இணைந்தோ, ஆடல் பாடல் உரையாடலுடன் கலந்தோ, ஒரு கலைஞராலோ, கலைஞர்கள் பலர் இணைந்தோ, ஒரு நிகழ்ச்சியையோ, கருத்தையோ, கதையையோ பார்வையாளர்கள் முன் நிகழ்த்திக் காட்டுவதாக அமையும்.  தமிழர்களின் பண்பாட்டுக் கூறுகளின் அடிப்படையில் நிகழ்த்துக் கலைகள் தெருக்கூத்து, தோற்பாவைக் கூத்து, பொம்மலாட்டம், பகல் வேடம், சேவையாட்டம், உடுக்கைப் பாட்டு, ஒயிலாட்டம், கணியான் கூத்து, வில்லுப்பாட்டு, கரகாட்டம், காவடியாட்டம், குதிரை ஆட்டம், தேவராட்டம், கோலாட்டம், மயிலாட்டம், காளையாட்டம், குறவன் குறத்தி ஆட்டம், சிலம்பாட்டம், புலி ஆட்டம் எனப் பல வடிவங்களில் நிகழ்த்தப்படுகின்றது.

நிகழ்விடங்கள்

நாட்டுப்புற நிகழ்த்துக் கலைகளை நிகழ்த்துவதற்கென்று குறிப்பிட்ட இடமோ, களமோ, அரங்கமோ கிடையாது. எங்கு வேண்டுமானாலும் எந்த இடத்தில் வேண்டுமானாலும் (கோயில், ஊர்மந்தை, தெருக்கள்) நிகழ்த்திக் கொள்ளும் சுதந்திரப் போக்கைக் கொண்டவையாகும். சிறுதெய்வ வழிபாடுகளின் போது எங்கெல்லாம் சடங்கு நிகழ்ச்சிகள் நடைபெறுகின்றனவோ அங்கெல்லாம் கலைஞர்களும் சென்று ஆடுவார்கள். தெய்வங்களை அலங்கரித்து ஊர்வலம் வரும்போது, அதன் முன்னால் கலைஞர்கள் ஆடிச் செல்வர்.  நாட்டுப்புற நிகழ்த்துக் கலைகளுக்கான ஆடுகளம் விரிந்த பரப்பைக் கொண்டது.

ஒப்பனைகள்

நிகழ்த்துக் கலைகளில் இசையும் ஒப்பனையும் இருகண்களாக விளங்குகின்றன. கரகாட்டத்தை இசையின்றி இரசிக்க இயலாது; அதேபோல், தெருக்கூத்தை ஒப்பனையின்றிப் பார்க்க இயலாது.  'ஆள்பாதி ஆடைபாதி' என்ற பழமொழி நாட்டுப்புற நிகழ்த்துக் கலைகளுக்கே பொருத்தமானதாகும். நிகழ்த்துக் கலைகளின் வடிவங்களுக்கு ஏற்பவும், கதாபாத்திரத்திற்கு ஏற்பவும் கலைஞர்கள் தங்களைத் தாங்களே ஒப்பனை செய்து கொள்கின்றனர். ஒரு கலைஞர் தமது குழுவினருக்கு ஒப்பனை செய்வதும் உண்டு. கலைஞர்களின் உடையலங்காரமும் முகப் பூச்சுமே பார்வையாளர்களிடமிருந்து அவர்களை வேறுபடுத்திக் காட்டுகிறது. அதிகமான முகப் பூச்சு, பளபளப்பான ஜிகினா உடை, கதாநாயகர்கள் போன்ற தோற்றம் ஆகியவை நாட்டுப்புற நிகழ்த்துக் கலைஞர்களுக்கான பொது உடை ஒப்பனை முறையாகக் காணப்படுகிறது.

தெருக்கூத்து, கரகாட்டம், கணியான் கூத்து, குறவன் குறத்தி ஆட்டம், சேவையாட்டம், காளியாட்டம், பகல் வேடம் போன்ற நிகழ்த்துக் கலைகளின் உடை ஒப்பனை முறைகள் ஏனைய கலைகளிலிருந்து மாறுபட்டதாகவும் கூடுதல் தன்மை உடையவையாகவும் அமைந்துள்ளன.

நிகழ்த்துக் கலைகளின் சிறப்பு 

நிகழ்கலைகள் ஊரக மக்களின் வாழ்வில் இரண்டறக் கலந்திருக்கின்றன. இவை கற்றோராலும் மற்றோராலும் விரும்பப்படும் கலைகளாக உள்ளன; உழைப்பாளர்களின் உணர்வுகளாக உள்ளன; மக்களுக்கு மகிழ்ச்சி என்னும் கனி கொடுத்து கவலையைப் போக்குகின்றன. பழந்தமிழ் மக்களின் கலை, அழகியல், புதுமை ஆகியவற்றின் எச்சங்களை அறிவதற்குத் துணை செய்கின்றன;  எண்ண வெளிப்பாடாக, வாழ்க்கையைக் காட்டும் கண்ணாடியாக, மக்களின் சமய வழிபாட்டிலும் வாழ்வியல் நிகழ்வுகளிலும் பிரிக்கமுடியாத பண்பாட்டுக் கூறுகளாக விளங்குகின்றன.

நிகழ்த்துக் கலைகளின் பழமை

நிகழ்த்துக்கலைகள் தோன்றிய காலத்தை அறுதியிட்டுக் கூறுவது எளிதன்று.  அவை மக்களின் வாழ்க்கைச் செயல்பாடுகளின் ஒரு பகுதியாகவே இருந்து வந்துள்ளது.  மக்களின் மத வழிபாடு மற்றும் சடங்குகளின் நீட்சியாக இக்கலைகள் வளர்ச்சி பெற்றன.  தொடக்கக் கால மனிதன் தான் கண்டவற்றைப் போலச்செய்தலாய் நிகழ்த்திக் காட்டி அதனை முறைப்படுத்திக் கலைவடிவம் ஆக்கினான். அக்கலைகளில் ஆடலும் பாடலும் சிறப்பிடம் பெற்றன. பின்னாளில் கதைக் கூறுகள் சேர்க்கப்பட்டு உரையாடல் இடம் பெற்றது. இந்நிலையில் கலைகளின் தன்மைக்கேற்ப, அவை பெயர் சூட்டப்பட்டு, நிலைத்த கலை வடிவங்களாய் உலா வந்தன. ஒவ்வொரு நிகழ்த்து கலையும் தனக்குள் பல்வேறு சிறப்புக் கூறுகளைக் கொண்டமைந்தது.

மக்கள் கலைகள் அருகி வருவதற்கான காரணங்கள்

1. இன்றைய காலகட்டத்தில் தொழில்நுட்பங்கள் அசுர வளர்ச்சி அடைந்து கொண்டு இருக்கின்றன.  இதனால், தகவல் தொடர்பிற்கும், பொழுது போக்கிற்கும் பல்வேறு ஊடகங்கள் உருவாகி வருகின்றன. 
2. பொருளாதார வளர்ச்சி கோவில் சடங்குகளின் போக்கை மாற்றி இருக்கின்றது.
3. கலைஞர்கள் மதுவுக்கு அடிமையாதல், சேமிப்புப் பழக்கமின்மை, அரசுச் சலுகைகள் பற்றிய அறியாமை, கலைகளுக்கான விருதுகளில் பாரபட்சம், நிகழ்த்துக்கலைகளுக்கான கருவிகள் மற்றும் உபகரணங்களின் விலை உயர்வு, இடைத்தரகர்களின் ஆதிக்கம், சாதி இறுக்கம், சமூக முன்னேற்றம் போன்றவையும் முக்கியப்பங்கு வகிக்கின்றன.
4. போதிய அளவில் நிகழ்ச்சிகளும் வருமானமும் இல்லை என்பதால் கலைஞர்களும் வேறு தொழில்களுக்குச் செல்ல வேண்டிய கட்டாயத்துக்கு ஆளாக்கப்பட்டுவிட்டனர்.

நிகழ்த்துக் கலைகளை வளர்த்தெடுக்க நாம் செய்ய வேண்டுவன:

1. 'நிகழ்த்துக் கலைகள் - நமது பண்பாட்டின் விழுமியங்கள்' என்ற உணர்வை இளைஞர்களிடம் விதைக்க வேண்டும்.
2. நிகழ்த்துக் கலைகளுக்கு முறையான அங்கீகாரமும் திறமைக்கேற்ற ஊதியமும் கிடைப்பதை உறுதி செய்ய வேண்டும்.
3. வழிபாடுகளில் நிகழ்த்துக் கலைகளுக்கு முன்னுரிமை அளிக்க வேண்டும்.
4. நிகழ்த்துக் கலைஞர்களின் மீதான சாதிய இறுக்கத்தைத் தவிர்க்க வேண்டும்.
5. மற்ற கலைஞர்களுக்கு வழங்கப்படுவது போலவே நிகழ்த்துக் கலைஞர்களுக்கும் விருதுகளும் ஊக்கத்தொகையும் வழங்கப்பட வேண்டும்.

 தமிழரின் நீண்ட நெடிய வரலாற்றையும் பண்பாட்டுப்பெருமையையும் ஒருங்கே காட்டும் நிகழ்த்துக்கலைகளைப் பாதுகாத்து வளர்த்தெடுப்பது நமது கடமையாகும். இதனை உணர்ந்து நிகழ்த்துக் கலைகளை மீட்டெடுக்கும் பணியில் நாம் அனைவரும் கைகோர்க்க வேண்டும்.

- மலர் மகேந்திரன்

8 மதிப்பெண் வினா பொம்மலாட்டக் கலை பாராட்டுரை

 நெகிழிப் பைகளின் தீமையைக் கூறும் பொம்மலாட்டம் உங்கள் பள்ளியின் ஆண்டு விழாவில் நிகழ்த்தப்படுகிறது.  அதற்குப் பாராட்டுரை ஒன்றினை எழுதுக.

பாராட்டுரை

முன்னுரை

ஆதி கலைகளான இயல், இசை, நாடகம் ஆகிய முக்கலைகளின் சங்கமமே பொம்மலாட்டக் கலை. இவை மூன்றும் தெரிந்திருந்தால் மட்டுமே பொம்மலாட்டத்தை நிகழ்த்த முடியும்.  சினிமா உள்ளிட்ட பொழுதுபோக்கு அம்சங்கள் இல்லாத அக்காலத்தில் பல்வேறு கடவுள்களின் அருட்பெருமைகளைக் கூறவும், போரில் வெற்றி பெற்ற மன்னர்களின் புகழ் பாடவும், அரசனின் ஆணைகளை மக்களுக்குத் தெரிவிக்கவும், சிறந்த பொழுதுபோக்கு அம்சமாகப் பொம்மலாட்டக் கலை விளங்கியது. இந்திய சுதந்திரப் போராட்டத்தின்போது, விடுதலைப் போராட்டச் செய்திகளைப் பொதுமக்களுக்குக் கொண்டு செல்லவும் கூட பொம்மலாட்டம் பயன்படுத்தப்பட்டது.

பொம்மலாட்டம் என்னும் நுட்பக்கலை

  பொம்மலாட்ட நிகழ்ச்சி நடத்துவது என்பது கத்திமேல் நடப்பது போன்றது.  விரல் நுனியில் காட்சிகளை மாற்றி கண்முன்னே நிறுத்துவது வியப்பிற்குரியது.

தலை, கைகளில் கயிறுகட்டி கால்கள் இல்லாமல் துணிகளால் நீளமாக உடை கொடுத்து, பொம்மைகளைத் திரைக்குப் பின்னால் இருந்து கொண்டு ஆட்டி வைக்கும் அற்புதமான கலை. கயிற்றை நுட்பமாக ஆட்டி, அதன் அசைவுக்குத் தக்கவாறு பாடி, இசைக்கருவிகளை இசைத்து பிரமிப்பான உணர்வை ஏற்படுத்துவது இதன் சிறப்பு.  

பொம்மைகளின் முகம், கை, கால், உடல் அசைவுகளுடன் பின்னணிக் குரலும் ஒலிக்க, விழிப்புணர்வு நிகழ்ச்சிகள் நடத்துவதற்கு மிகச் சிறந்த கலையாக இது திகழ்கிறது. உயிருள்ள மனிதர்கள் பேசுவது போன்ற தோற்றத்தை ஏற்படுத்தி உள்ளுணர்வில் மாற்றத்தை ஏற்படுத்த வல்லது.  இத்தகைய பொம்மலாட்டக் கலை மூலம் நெகிழிப்பைகளின் தீமை குறித்து விழிப்புணர்வு ஏற்படுத்தியமை பாராட்டுதலுக்கு உரியது.

நாங்கள் அடைந்த விழிப்புணர்வு

எங்கள் பள்ளியின் ஆண்டுவிழாவில் நடைபெற்ற பொம்மலாட்ட நிகழ்ச்சியின் மூலம் நெகிழிப் பைகளின் தீமைகளை அறிந்து கொண்டோம். அவை,

• நெகிழிப் பொருள்கள் எளிதில் அழிவதில்லை. சராசரியாக ஒரு பாலித்தீன் பையின் பயன்பாட்டுக் காலம் 12 முதல் 20 நிமிடங்களே என்றும் அவை அழிய 1000 ஆண்டுகளுக்கும் அதிக காலம் பிடிக்கும் என்றும் ஒரு ஆய்வு கூறுகிறது. பயன்பாடற்ற ஒரு நச்சுவேதிப் பொருளின் நெடிய ஆயுட்காலம் என்பது இயற்கையின் நியதிக்கு மிகமிக ஆபத்தான முரண்பாடாகும். அதிலும் நெகிழியின் அதிகப்படியான பயன்பாட்டின் காரணமாக இவை கற்பனைக்கெட்டாத அளவில் உற்பத்தி செய்யப்படுகின்றன. எதிர்கால சந்ததிகளையும், மானுடரல்லாத பிற உயிர்களையும், இயற்கைச் சூழலையும் பற்றிய அக்கறையற்ற சுயநலமே இன்றைய நிலையாக இருக்கின்றது. மறுசுழற்சி என்பதும் பெரிதும் பயன்தரப் போவதில்லை. ஏனென்றால் நெகிழிப் பொருட்களில் 10 சதவீதப் பொருள்களே மீண்டும் பயன்படுத்தத் தக்கவையாக இருக்கின்றன. மற்ற 90 சதவீதப் பொருட்களும் வீணே எரிக்கப்பட்டுவிடுகின்றன. ‘இன்சினரேசன்’ என்னும் கருவி இப்போது நெகிழிக் குப்பைகளை எரிக்கப் பயன்படுகிறது. அவையும் டையாக்சின் என்ற நச்சுப் புகையைத்தான் கூடுதல் தீமையாகத் தருகின்றன. மறுசுழற்சி, கழிவு மேலாண்மை போன்றவை பயனற்றவையாகவே கருதப்படுகின்றன.
• தொழிற்சாலைகளில் இவை மறு சுழற்சி செய்யப்படும் போதும், எரிக்கப்படும் போதும் வெளியேறும் வாயுக்கள் நச்சுத் தன்மை உடையதாக இருப்பதால், அருகிலுள்ள மக்களின் உடல்நலனாது பெரிதும் பாதிப்புக்குள்ளாகிறது. தோல்நோய், புற்று நோய், ஒவ்வாமை, மூச்சுக் குழாய் பாதிப்பு, குடல் புண், செரிமானமின்மை, நரம்புத்தளர்ச்சி, ரத்த, சிறுநீரகச் செயல் குறைபாடு, நோய் எதிர்ப்பு ஆற்றல் குறைவு போன்றவை ஏற்படக் கூடும் என ஆய்வுகள் கூறுகின்றன.
• பாலித்தீன் பைகள் கால்வாய்களில் அடைத்துக் கொள்வதால் நீர் வழிகள் அடைபட்டு மழைக் காலங்களில் வெள்ளப் பெருக்கு போன்ற அபாயங்கள் ஏற்படுகின்றன. நீர் தேங்கி கொசுக்கள் உற்பத்தியாகி டெங்கு, சிக்குன் குனியா போன்ற நோய்கள் பரவுகின்றன. நிலத்தடி நீர் பெருகுவதைத் தடுக்கின்றன.
• மனிதர் உண்டுவிட்டு கீழே போடும் நெகிழிப் பைகளைத் தின்னும் விலங்குகளின் உணவுக் குழாய்கள் பாதிக்கப்பட்டு அவைகள் இறக்க நேரிடுகின்றன.
• மட்காத நெகிழிப் பொருள்கள் வேளாண் நிலங்களில் தங்கி அதன் வளத்தைக் குறைத்து நஞ்சாக்குகிறது. பயிர் வளர்ச்சியையும் பாதிக்கிறது.
• கடலில் எறியப்படும் நெகிழிப் பொருள்கள் கடல்வாழ் உயிரினங்களுக்கும், வனப்பகுதியில் எறியப்படுபவை வனவாழ் உயிரினங்களுக்கும் தீங்கு விளைவித்து பல்லுயிர் பெருக்கச் சூழலைப் பெரிதும்பாதிக்கின்றன.

பாராட்டுரை

நமது பள்ளி ஆண்டு விழா என்பது ஒவ்வொரு மாணவருக்கும் மிகவும் மகிழ்ச்சியைத் தரக்கூடிய ஒரு நிகழ்வாகும்.  என்றும் பசுமையான நினைவுகளாக இருக்கக்கூடிய ஆண்டுவிழாவில், ஆண்டுதோறும் புதியபுதிய சிந்தனைகளை மாணவர்கள் மனத்தில் விதைப்பீர்கள்.  அந்த வகையில் இந்த ஆண்டு நெகிழிப்பைகளின் தீமையைக் கருவாகக் கொண்டமைக்கு எனது மனமார்ந்த பாராட்டுக்களைத் தெரிவித்துக்கொள்கிறேன்.  அதை விதைப்பதற்கு நமது பாரம்பரியக் கலையான பொம்மலாட்டக் கலையைத் தேர்வு செய்த பள்ளி ஆண்டுவிழா ஏற்பாட்டாளர்களுக்குத் தலை வணங்குகிறேன்.  'ஒரே கல்லில் இரண்டு மாங்காய்' என்பது போல இந்த நிகழ்ச்சியின் மூலம் பொம்மலாட்டக் கலையின் அருமை பெருமைகளை அறிந்து கொண்டதோடு நெகிழிப் பைகளின் தீமைகளையும் அறிந்துகொண்டோம்.  நெகிழிப் பைகளைத் தவிர்த்து, துணிப்பைகளைப் பயன்படுத்த வேண்டும் என்ற மனமாற்றம் ஏற்பட இந்த நிகழ்ச்சியே காரணமாக அமைந்தது.

முடிவுரை

திரைப்படத் துறையின் அதீத வளர்ச்சியால், தமிழகத்தில் தொன்மையான பாரம்பரியக் கலையான பொம்மலாட்டம் படிப்படியாக அழிந்து வருகிறது. அழிவில் இருக்கும் பழைமை வாய்ந்த பொம்மலாட்டக் கலையைக் காக்க மத்திய, மாநில அரசுகள் பள்ளி, கல்லூரி பாடத் திட்டத்தில் செயல்முறைப்பயிற்சியாக பொம்மலாட்டத்தை வைத்து, இளைய தலைமுறையினரிடம் இக்கலையைக் கொண்டு செல்லும் சீரிய முயற்சிகளை மேற்கொள்ள வேண்டும். மேலும், இந்தக் கலைஞர்களுக்கு உலகப் பொம்மலாட்ட தினமான மார்ச் 21 அன்று விருதுகள் வழங்கி ஊக்குவிக்க வேண்டும் என்று கூறி, எனது பாராட்டு உரையை நிறைவு செய்கிறேன். நன்றி, வணக்கம்!

8 மதிப்பெண் வினா மொழிபெயர்ப்பு செம்மொழித் தமிழுக்கு வளம் சேர்க்கும் மொழிபெயர்ப்புக் கலை

 தமிழின் இலக்கிய வளம் - கல்வி மொழி - பிறமொழிகளில் உள்ள இலக்கிய வளங்கள் -அறிவியல் கருத்துகள் - பிற துறைக் கருத்துகள் - தமிழுக்குச் செழுமை.

 மேற்கண்ட குறிப்புகளைக் கொண்டு 'செம்மொழித் தமிழுக்கு வளம் சேர்க்கும் மொழிபெயர்ப்புக் கலை' என்ற தலைப்பில், வார இதழ் ஒன்றுக்கு நடுப்பக்கக் கட்டுரை எழுதுக.

நடுப்பக்கக் கட்டுரை

செம்மொழித் தமிழுக்கு வளம் சேர்க்கும் மொழிபெயர்ப்புக் கலை

முன்னுரை

ஒரு மொழியில் ஏற்படும் புதுமைகளை வேற்று மொழிக்கு கொண்டு வரும் அரிய பெரிய கலையே 'மொழிபெயர்ப்புக்கலை' ஆகும்.  மொழிபெயர்ப்புச் செய்யப்படும் பொழுது மூல மொழி சார்ந்துள்ள சமுதாயப் பின்னணியை எண்ணிப் பார்ப்பது அவசியமானது.  "பிறநாட்டு நல்லறிஞர் சாத்திரங்கள் தமிழ்மொழியிற் பெயர்த்தல் வேண்டும்... சென்றிடுவீர் எட்டுத் திக்கும் கலைச் செல்வங்கள் யாவும் கொணர்ந்திங்கு சேர்ப்பீர்" என்ற பாரதியின் கருத்துகள் மொழிபெயர்ப்பின் இலக்குக்கு வழிகாட்டுகின்றன.

தமிழின் இலக்கியவளம்

வாழ்வியலுக்கு இலக்கணம் வகுத்து நெறியோடு வாழ்ந்த தமிழரின் சங்க இலக்கியங்கள், அறக்கருத்துக்களை வலியுறுத்தும் பதினெண்-கீழ்க்கணக்கு-நூல்கள், ஐம்பெருங்காப்பியங்கள், பக்திப் பாடல்கள், சிற்றிலக்கிய வடிவங்கள், மரபுக்கவிதைகள், சந்தப் பாடல்கள், புதுக் கவிதைகள், புதினங்கள் எனத் தமிழின் இலக்கிய வளத்திற்கு சான்றுகள் பலவாகும்.

மேலும் மொழிபெயர்ப்பு இலக்கியங்களான இராமாயணம், மகாபாரதம், பெருங்கதை, கொங்குவேளிர் மாக்கதை, சீவக சிந்தாமணி, நளவெண்பா, தண்டியலங்காரம், வில்லிபாரதம் போன்றவையும் இவற்றுள் அடங்கும்.

கல்வி மொழி

மொழிபெயர்ப்பைக் கல்வியாக ஆக்குவதன் மூலம் அனைத்துலக அறிவையும் நாம் எளிதில் பெற முடியும். பல அறிவுத் துறைகளுக்கும் தொழில் துறைகளுக்கும் வெளிநாட்டவரை எதிர்பார்க்காமல் நாமே நமக்கு வேண்டிய அனைத்தையும் உருவாக்கிக்கொள்ள முடியும்; மனித வளத்தை முழுமையாகப் பயன்படுத்த முடியும்; வேலைவாய்ப்புத் தளத்தை விரிவாக்க முடியும்; நாடு, இன, மொழி எல்லைகளைக் கடந்து ஓருலகத்தன்மையைப் பெற முடியும். வெளிநாட்டு தூதரகங்கள் தங்களுடைய இலக்கியம், பண்பாடு, தொழில் வளர்ச்சி போன்றவற்றைத் தத்தம் மொழிகளில் கற்றுக் கொடுக்கின்ற முயற்சியை மேற்கொண்டு வருகின்றன. தனியார் நிறுவனங்களும் பள்ளிகளும் கல்லூரிகளும் பல்கலைக்கழகங்களும் பிற மொழிகளைக் கற்கும் வாய்ப்புகளை உருவாக்கித் தருகின்றன.

பிறமொழிகளில் உள்ள இலக்கிய வளங்கள்

பிற மொழி இலக்கியங்களை அறிந்துகொள்ளவும் அவை போன்ற புதிய படைப்புகள் உருவாகவும் மொழிபெயர்ப்பு உதவுகிறது.  ஆங்கிலேயரின் வருகைக்குப் பின் ஆங்கில நூல்களும், ஆங்கிலம் வழியாகப் பிற ஐரோப்பிய மொழி நூல்களும் அறிமுகமாயின. மொழிபெயர்ப்பு இல்லை என்றால் ஷேக்ஸ்பியரோ, கம்பரோ, தாகூரோ உருவாகியிருக்க முடியாது.  

ஷேக்ஸ்பியரின் நாடகங்கள் தமிழாக்கம் செய்யப்பட்டதன் விளைவு, பல நாடகமேடை அமைப்புகள் உருவாகின. மேலைநாட்டு இலக்கியச் சார்புதான் நமது தமிழ் இலக்கியத்தின் புதிய வரவுகளான புதினம், சிறுகதை போன்ற வடிவங்களுக்குப் படிநிலையாகும்.  வால்ட் விட்மனின் 'புல்லின் இதழ்கள்' ஏற்படுத்திய கவிதைத் தாக்கம் தமிழ்ப்புதுக்கவிதை மாளிகைக்கு அடிக்கல் நாட்டியது.  ஜப்பானிய ஹைக்கூக் கவிதைகள் நமது ஹைக்கூக்கவிதை வளர்ச்சிக்கு வித்திட்டது.  மொழிபெயர்ப்பு மூலம் இலக்கியத் திறனாய்வு முறைகளை ஆங்கிலத்திலிருந்து பெற்றுள்ளோம்.

அறிவியல் கருத்துகள்

தாமஸ் ஆல்வா எடிசன், ஐசக் நியூட்டன், ஆர்க்கிமிடிஸ், கலிலியோ போன்ற அறிஞர்பெருமக்களின் கண்டுபிடிப்புகள் தமிழில் மொழிபெயர்க்கப் பெற்றபின் அறிவியல் வளர்ச்சியில் பெரும் திருப்பம் ஏற்பட்டது.  மரத்திலிருந்து கனிந்த பழம் விழுவதையும் பழத்திற்காக எறிந்த கல் நிலத்தை சென்றடைவதையும் கண்டுகளித்த மக்கள், நியூட்டனின் இயற்பியல் விதிக்குப் பின்னர்தான் அது 'புவியீர்ப்பு சக்தி' என்பதை அறிந்தனர்.

பிறதுறைக் கருத்துகள்

இன்றைக்குப் பல்வேறு துறைகளின் வளர்ச்சிக்கு மொழிபெயர்ப்பு தேவைப்படுகிறது.  மொழிபெயர்ப்பு இல்லை எனில் உலகை எல்லாம் வலையாகப் பிடித்திருக்கின்ற ஊடகத்தின் வளர்ச்சி இல்லை. தொலைக்காட்சி, வானொலி, திரைப்படம், இதழ்கள் போன்ற ஊடகங்கள் மொழிபெயர்ப்பால்தான் வளர்ச்சி பெறுகின்றன. விளம்பர மொழிக்கு மொழிபெயர்ப்பு தேவைப்படுகிறது. திரைப்படங்கள், தொலைக்காட்சித் தொடர்கள் ஆகியன மொழிமாற்றம் செய்யப்பட்டு அனைத்து மொழி பேசும் மக்களையும் அடைகிறது. இதனால் புதுவகையான சிந்தனை மொழிக் கூறுகள் பரவுகின்றன.

தமிழுக்குச் செழுமை

மொழிபெயர்ப்பினால் புதிய சொற்கள் உருவாகி மொழிவளம் ஏற்படுகிறது. பிற இனத்தவரின் பண்பாடு, நாகரிகம், பழக்க வழக்கம் போன்றவற்றை அறியமுடிகிறது.  அதிலிருந்து நல்லனவற்றை நாம் பெற்றுக்கொள்ள முடிகிறது. அதன்மூலம் நம் இலக்கியத்தை வளப்படுத்த முடிகிறது.  உலகப் புகழ்பெற்ற அறிவியல் கண்டுபிடிப்புகளையும் இலக்கியப் படைப்புகளையும் அறிவதற்கு வாய்ப்பு ஏற்படுகிறது. நல்ல மொழிபெயர்ப்பாளன் சில விதி மீறல்களைச் செய்வான்.  இதன் மூலம் புதிய இலக்கண விதிகளின் தேவையை உருவாக்குவான். இதன் மூலம் மொழியில் புதுக்கூறுகள் உருவாகி, மொழிவளர்ச்சிக்கு வழிவகுக்கும்.

முடிவுரை

பிற மொழி இலக்கியங்களை அறிந்துகொள்ளவும், அவை போன்ற புதிய படைப்புகளை உருவாக்கவும் மொழிபெயர்ப்பு உதவுகிறது.  இலக்கியம் என்பது தன் அனுபவத்தை எழுதுவது என்றாலும் அது கலைச் சிறப்புடையதாக இருக்கும் போது அனைவரது அனுபவமாகவும் பொதுநிலை பெறுகிறது.  அத்தகைய பொதுநிலை பெற்ற இலக்கியத்தை மொழிவேலி சிறையிடுகிறது.  மொழி வேலியை அகற்றும் பணியை மொழிபெயர்ப்பு செய்கிறது. எனவே, செம்மொழித் தமிழுக்கு மொழிபெயர்ப்புகலையானது வளம் சேர்க்கும் என்பது திண்ணம்.

- மலர் மகேந்திரன்.

8 மதிப்பெண் வினா புதிய நம்பிக்கை

'கற்கை நன்றே கற்கை நன்றே

பிச்சை புகினும் கற்கை நன்றே' என்கிறது வெற்றிவேற்கை.  மேரியிடமிருந்து பறிக்கப்பட்ட புத்தகம், அச்சிறுமியின் வாழ்க்கையில் கல்விச்சுடரை ஏற்றிய கதையைப் பற்றிய உங்களின் கருத்துக்களை விவரிக்க.

புதிய நம்பிக்கை

முன்னுரை

வரலாற்றில் மனிதர்கள் வருகிறார்கள். சிலர் வரலாறாகவே மாறி விடுகின்றார்கள். இவர்கள் பாதையே இல்லாத இடத்தில் தங்கள் கால்களால் ஒற்றையடிப்பாதையை இட்டு பெரும் சாலையாக ஆக்குகிறார்கள். பலர் பயணிக்க வழி அமைக்கிறார்கள். கல்வியறிவற்ற சமூகத்திலிருந்து ஒற்றை ஒளிச் சுடராக வெளிவந்து, அந்த சமூகத்தையே ஒளிவெள்ளத்தில் நிரப்புகிறார்கள். அப்படிப்பட்டவர்களில் ஒருவர்தான் மேரி.

மேரியின் குடும்பம்

கருப்பினச் சிறுமி மேரி. வாழ்க்கையின் ஒரே ஒரு நிமிடத்தை கூட வீணடிக்கக் கூடாது என்று பகல் முழுவதும் பருத்திக் காட்டில் வேலை செய்யும் குடும்பத்தை சார்ந்தவள். அம்மா பாட்ஸியுடன் துவைத்து தேய்த்து துணிகளை அடுக்கி கொண்டு, பென் வில்சன் என்ற வெள்ளைக்கார முதலாளி வீட்டிற்குச் சென்றாள்.  

உன்னால் படிக்க முடியாது

அங்கு வெள்ளைக்காரச் சிறுமிகள் விளையாடிக் கொண்டிருப்பதைக் கண்டாள்; உள்ளே சென்றாள்; சுற்றிப் பார்த்தாள்; மேஜை மீது இருந்த புத்தகத்தை எடுத்துப் பார்த்தாள். "புத்தகத்தை என்னிடம் கொடு. நீ இதை எடுக்கக்கூடாது. உன்னால் படிக்க முடியாது. புத்தகங்கள், படிக்க முடியாதவர்களுக்கு இல்லை" என்ற வெள்ளைக்காரச் சிறுமியின் வார்த்தைகளால் மனம் கலங்கினாள்.

மேரியின் விருப்பம்

"நான் படிக்க வேண்டும். நான் படிக்கக் கற்றுக் கொள்ளப் போகிறேன். நான் எழுதப் படிக்கப் போகிறேன்" என்று சிந்தித்துக் கொண்டே இருந்தாள். தந்தை சாமிடம் தன் விருப்பத்தை வெளிப்படுத்தினாள். ஆனால், அங்குக் கருப்பினச் சிறுமிகள் படிப்பதற்கென்று பள்ளிக்கூடம் கிடையாது.

பட்டம் பெற்ற மேரி

மிஸ் வில்சன் என்ற வெள்ளைக்காரப் பெண் மேரியைப் படிக்க மேயஸ்வில்லிக்கு அழைத்தாள். அடங்காத ஆர்வத்துடன் தினமும் பத்து மைல் தூரம் நடந்து சென்று படித்தாள். அக்கம்பக்கத்தினருக்கு கணக்குச் சொல்லிக் கொடுத்தாள். சில ஆண்டுகள் முடிவில் பட்டம் பெற்றாள்.  அதில், 'இப்பட்டம் பெறுபவருக்கு எழுதப் படிக்கத் தெரியும்' என்று இருந்தது. 

மேரியின் உயர்கல்விப் பயணம்

'அடுத்து என்ன செய்யப் போகிறாய்?' என்ற மிஸ் வில்சனின் கேள்விக்கு, 'கல்லூரியில் படிக்க விரும்புகிறேன்' என்றாள்.  மேரி உயர்கல்வி கற்க, ஊரே வழியனுப்பி வைத்தது; மேற்குப் பகுதியில் வசிக்கும் வெள்ளைக்காரப் பெண் ஒருத்தி பணம் அனுப்பினாள்.

அறிதலில் ஆர்வம்

பருத்தியின் முதல் பூவைப் பார்த்ததும் பரவசப்படும் மேரி, பருத்திச் செடி வளர்வதற்கு ஏன் இவ்வளவு காலம் எடுத்துக் கொள்கிறது? என்று சிந்தித்தாள். இலக்கற்றுச் சிந்திப்பது அவளுக்கு பிடித்தமானதாக இருந்தது.  மேஜை மீது இருந்த பொருள் என்ன? என்று அறிந்து கொள்ளும் ஆர்வம் இருந்தது. "அதை நீ எடுக்கக்கூடாது" என்ற சிறுமியின் சொற்களால் மனம் கலங்கிய போதும், படிப்பைப் பற்றியே சிந்தித்தாள்.  "நான் வாசிக்கக் கற்றுக்கொள்ள போகிறேன்" என்ற ஆர்வமே மேரியின் வெற்றிக்கு அடிப்படை. பதினோரு வயதான மேரி தினமும் பத்து மைல் தூரம் நடந்து சென்று படித்தது, அவளது ஆர்வத்திற்கும் விடாமுயற்சிக்கும் எடுத்துக்காட்டு.

புதிய நம்பிக்கை

மேரி தான் கற்றதை அக்கம் பக்கத்தினருக்கும் கற்றுக்கொடுத்தாள். எழுதப்படிக்க தெரிந்ததும், 'போதும்' என்று நினைக்காமல் உயர்கல்வி கற்க விரும்பினாள். ஒடுக்கப்பட்ட சமூகத்தின் குரலாக எழுந்தாள்.

முடிவுரை 

ஒடுக்கப்பட்ட சமூகம் எழுவதற்குக் காரணமாக அமைந்தது, மேரி பெற்ற கல்வி.  பின்னாளில், மேரி கருப்பினக் குழந்தைகள் படிப்பதற்காகக் கட்டிய 'பெதுன் குக்மேன் தனியார் பள்ளி' பல்கலைக்கழகமாக வளர்ந்தது; தடைகளை எல்லாம் தகர்த்து முன்னேறி, அமெரிக்க ஜனாதிபதி ரூஸ்வெல்டின் ஆலோசகரானார்.

5 மதிப்பெண் வினா திருவிளையாடல் புராணம் இடைக்காடன் பிணக்குத் தீர்த்த படலம்

 இறைவன், புலவர் இடைக்காடன் குரலுக்கு செவிசாய்த்த நிகழ்வை நயத்துடன் எழுதுக.

திருவிளையாடல் புராணம்

இடைக்காடன் பிணக்குத் தீர்த்த படலம்

1. கபிலரின் நண்பரான புலவர் இடைக்காடனார், கல்வியறிவில் மிக்க குசேல பாண்டியனின் அவையில் கவிதை படித்தார்.
2. அக்கவிதையைச் சிறிதேனும் சுவைத்துத் தலையை அசைக்காமல் புலமையை அவமதித்ததாக, திருஆலவாய் இறைவனிடம் முறையிட்டார்.
3. இறைவனிடம், "பாண்டியன் என்னைக் இகழவில்லை.  சொல்லின் வடிவாக உன் இடப்புறம் வீற்றிருக்கும் பார்வதி தேவியையும் சொல்லின் பொருளாக விளங்கும் உன்னையுமே அவமதித்தான்" என்றான்.
4. இறைவன், இடைக்காடனாருக்கும் கபிலருக்கும் மனமகிழ்ச்சி உண்டாக்க நினைத்தார்; திருக்கோவிலை விட்டு வெளியேறி வைகை ஆற்றின் தென்புறம் கோவில் கொண்டார்.
5. "இறைவனே, எதனால் தங்களுக்கு இடையூறு ஏற்பட்டது? யானறியேன்" என்று குசேல பாண்டியன் வேண்டினான்.
6. "இடைக்காடனார் பாடலை இகழ்ந்தது குற்றம்; வேறு குற்றமில்லை.  இடைக்காடனார் மீது கொண்ட அன்பினால் இங்கு வந்தோம்" என்றார் இறைவன்.
7. இறைவனின் சொல் கேட்ட பாண்டியன், "சிறியேன், யான் செய்த குற்றம் பொறுக்க வேண்டும்" என்று வேண்டிப் போற்றினான்.
8. பாண்டியன், அழகுமிக்க அரண்மனையில் புலவர்கள் சூழ இடைக்காடனாரை மங்கலமாக ஒப்பனை செய்து பொன் இருக்கையில் விதிப்படி அமர்த்தினான்.
9. "புண்ணிய வடிவான புலவர்களே, நான் இடைக்காடனாருக்குச் செய்த குற்றத்தைப் பொறுத்துக் கொள்ள வேண்டும்" என்று பணிந்து வேண்டினான்.
10. நுண்ணிய கேள்வியறிவுடைய புலவர்கள், " மன்னா, நீ கூறிய அமிழ்தம் போன்ற குளிர்ந்த சொல்லால் எங்கள் சினமான தீ  தணிந்தது" என்றனர்.

"பாண்டியன் தமிழ்க்கவிதையை அவமதித்தான். அது தமிழின் வடிவான இறைவனை அவமதித்ததற்குச் சமம்" என்று இடைக்காடனார் கூறுவது நயமிக்கது. 

 தமிழ்ப் புலவரை மகிழ்விக்க, இறைவன் தன் இருப்பிடத்தை மாற்றியது சுவை தருகிறது. மன்னன் தன் தவறுக்கு வருந்தி, புலவர்களைப் போற்றியமை வரலாற்றுச் சிறப்புமிக்கதது. 

"இறைவனே, என்னால், என் படைகளால், என் பகைவரால், காட்டில் உள்ள விலங்குகளால் இத்தமிழ்நாட்டில் தங்களுக்கு இடையூறு ஏற்பட்டதா? மறையவர் நல்லொழுக்கத்தில் குறைந்தனரோ? தானமும் தவமும் சுருங்கியதோ? இல்லறமும் துறவறமும் தத்தம் நெறியிலிருந்து தவறினவோ? நான் அறியேன்" என்ற மன்னனின் வேண்டுதல் அவனது செங்கோல் ஆட்சியை வெளிப்படுத்துகிறது.

- மலர் மகேந்திரன்

5 மதிப்பெண் வினா சொற்பொழிவு, பரிபாடல்

 

நம் முன்னோர் அறிவியல் கருத்துகளை இயற்கையுடன் இணைத்துக் கூறுவதாகத் தொடங்குகின்ற பின்வரும் சொற்பொழிவைத் தொடர்ந்து நிறைவு செய்க.

சொற்பொழிவு

தலைப்பு: தமிழ் இலக்கியத்தில் அறிவியல்

பேரன்பிற்குரிய அவையோர் அனைவருக்கும் வணக்கம்! இன்று இயல், இசை, நாடகம் என்னும் முத்தமிழுடன் அறிவியலை நான்காம் தமிழாகக் கூறுகின்றனர்.  ஆதிகாலந்தொட்டு இயங்கி வரும் தமிழ் மொழியில், அறிவியல் என்பது தமிழர் வாழ்வியலோடு கலந்து கரைந்து வந்துள்ளதை இலக்கியங்கள் மூலம் அறிகிறோம். அண்டத்தை அளந்தும் புவியின் தோற்றத்தை ஊகித்தும் கூறும் அறிவியல் செய்திகள்,  இலக்கியங்களில் உள்ளன.  சங்க இலக்கியமான பரிபாடலில்....

தூசுத்திரட்சியால் உண்டாகும் நெபுலாக்களில் இருந்து எப்படி நட்சத்திரங்கள் தோன்றி அழிகின்றனவோ அப்படி இந்த உலகமும் தோன்றி அழிவதை கி.பி. இரண்டாம் நூற்றாண்டில் வாழ்ந்த கீராந்தையார் என்னும் சங்ககாலத் தமிழ்ப்புலவர் கூறியுள்ளார்.

தொன்றுதொட்டு வரும் இயற்கையின் நியதிப்படி சந்திரனும் ஏனையவையும் அழிந்த ஊழியின் முடிவில் மீண்டும் உலகம் தோன்றுவதை பரிபாடல் சொல்கிறது. 

(1). "விசும்பில் ஊழி ஊழ் ஊழ் செல்ல".  அதாவது, ஒன்றுமில்லாத ஊழிக்காலம் வந்தது. அந்த ஊழிக்காலம் செல்ல,

(2). "கரு வளர் வானத்து இசையில் தோன்றி, உரு அறிவாரா ஒன்றன் ஊழியும்". அதாவது, பரம அணுவிலிருந்து தோன்றிய ஓசையால் உருவம் இல்லாத ஆகாயம் தோன்றியது.

(3). "உந்து வளி கிளர்ந்த ஊழ் ஊழ் ஊழியும்". அதாவது, பரம அணுவைச் சுற்றிச் சுழல்கின்ற காற்றால் உப்பிய காற்றின் ஊழிக்காலம் வந்தது.

(4).  "செந்தீச்சுடரிய ஊழியும்". அதாவது, காற்றினால் செந்நிறத்தில் ஒளிரும் நெருப்பு ஊழிக்காலம் வந்தது.

(5). "பனியொடு தண் பெயல் தலைஇய ஊழியும்". அதாவது, காற்று மற்றும் நெருப்பின் விளைவால் பனியும் மழையும் பெய்த ஊழிக்காலம் வந்தது.

(6). "அவையிற்று உள் முறை வெள்ளம் மூழ்கி ஆர்தருபு, மீண்டும் பீடு உயர்பு ஈண்டி, அவற்றிற்கும் உள்ளீடு ஆகிய இரு நிலத்து ஊழியும்". அதாவது, வெள்ளத்தால் மூடி இருந்த நிலம் எரிமலை வெடிப்புகளால் மீண்டும் மேலெழுந்து நிலமும் கடலும் தோன்றியது.

இதேபோன்று, மற்றொரு சங்க இலக்கியமான புறநானூறு, உலகம் ஐம்பூதங்களால் ஆனது என்பதை, "மண் திணிந்த நிலனும்

நிலம் ஏந்திய விசும்பும்,

விசும்பு தைவரு வளியும்

வளித் தலைஇய தீயும்,

தீ முரணிய நீரும், என்றாங்கு

ஐம்பெரும் பூதத்து இயற்கை போல்" என்று குறிப்பிடுகிறது.

தானியங்கி விமானம் குறித்து 'வலவன் ஏவா வான ஊர்தி' என்று குறிப்பிடுகிறது.  

வானவெளியில் உள்ள வெற்றிடம் குறித்து 'வறிது நிலைஇய காயமும்' என்கிறது.

'சுழன்றும் ஏர்பின்னது உலகம்' என்ற குறள் மூலம் உலகம் உருண்டை என்பதையும், 'மாதர் முகம்போல் ஒளிவிட வல்லையேல் காதலை வாழி மதி' என்ற குறள் மூலம் திங்களுக்குத் தானாக ஒளிவிடும் தன்மை இல்லை என்பதையும், 'திங்களைப் பாம்பு கொண்டற்று' என்ற குறள் மூலம் சந்திரகிரகணம் பற்றியும் திருக்குறள் குறிப்பிடுகிறது.

"தினையளவு போதாச் சிறுபுல் நீர் நீண்ட பனையளவு காட்டும்" என்ற கபிலரின் வரிகள் ஒளியியல் குறித்த அறிவுக்குச் சான்றாகும்.

'புல்லாகிப் பூடாகி' எனத்தொடங்கும் திருவாசக வரிகள் பரிணாம வளர்ச்சி குறித்துக் கூறுகிறது.

'அணுவைத் துளைத்து ஏழ் கடலைப் புகட்டி' என்னும் அவ்வையாரின் வரிகள் அறிவியல் அறிவைப் பறைசாற்றுகின்றன.

"மருந்தென வேண்டாவாம் யாக்கைக்கு அருந்தியது அற்றது போற்றி உணின்" எனும் குறள் மருத்துவ அறிவை வெளிப்படுத்துகின்றது.

இவையெல்லாம் தமிழ் இலக்கியங்கள் காட்டும் அறிவியல் செய்திகள் என்று கூறி, வாய்ப்புக்கு நன்றி கூறி விடைபெறுகிறேன்.  

நன்றி, வணக்கம்!

8 மதிப்பெண் வினா செயற்கை நுண்ணறிவு

ஒரு குழந்தையைத் தூக்கவும் கீழே விழுந்த ஒரு தேநீர்க் கோப்பையை எடுக்கவும் மென்பொருள் அக்கறை கொள்ளுமா?  வெறும் வணிகத்துடன் நின்று விடுமா?இக்கருத்துக்களை ஒட்டிச் 'செயற்கை நுண்ணறிவின் எதிர்கால வெளிப்பாடுகள்' பற்றி ஒரு கட்டுரை எழுதுக.

செயற்கை நுண்ணறிவின் எதிர்கால வெளிப்பாடுகள்

முன்னுரை

ஒரு மனிதனைப் போன்றே உணர்வுப் பூர்வமாகவும், உணர்ச்சிகரமாகவும், தர்க்கரீதியிலும், தரவுகளின் அடிப்படையில் முடிவெடுக்கும் ஆற்றலை ஒரு இயந்திரம் பெறுவது என்ற வளர்ச்சிப் போக்கு சிக்கலான பல கேள்விகளை எழுப்புகின்றது.  செயற்கை நுண்ணறிவு வணிகத்தோடு நின்று விடுமா? அல்லது சமூக நலனில் அக்கறை கொள்ளுமா? என்பதைப் பற்றி விவாதிப்போம், வாருங்கள்.

பல்வேறு துறைகளில் செயற்கை நுண்ணறிவு

முன்னேறி வரும் தொழில்நுட்பங்கள் இந்த உலகில் மனிதனின் தேவையை வெகுவாகக் குறைத்து வருகிறது. மனிதன் கண்டுபிடித்த இயந்திரங்களில் - வேலைகளில் புகுந்து மனிதர்களை வெளியேற்றி வருகின்றன.

ஆசிரியராக...

செப்டம்பர் 2016-இல் நுழைந்துள்ள இங்கிலாந்தின் முதல் வகுப்பறை ரோபோ ஆசிரியர் பெப்பர் கல்வித் துறையில் ஆசிரியர்களுக்கு பெரும் சவாலாக இருக்கிறது.

சமையல் கலைஞராக...

மோலி ரோபாட்டிக்ஸ் நிறுவனம் 100 சதவீதம் தானாக இயங்கும் புத்திசாலித்தனமான ரோபோ சமையல்காரரை உருவாக்கியுள்ளது

அறுவை சிகிச்சை நிபுணராக...

மருத்துவத் துறையில் அறுவைச் சிகிச்சையில் ரோபோக்கள் முன்னரே இருந்தாலும், தற்போது மூட்டு மாற்று அறுவைச் சிகிச்சை, கண் அறுவைச் சிகிச்சை வரை முன்னேறியுள்ளன.

சில்லறை விற்பனையாளராக...

நெஸ்லே நிறுவனம் ஜப்பான் நாடு முழுக்க சுமார் 1000 மளிகை மற்றும் காபி கடைகளில் பெப்பர் ரோபோக்களை சில்லறை விற்பனையாளர் பணியில் பயன்படுத்தி வருகிறது.

பாதுகாவலராக...

பெரும்பாலான மேற்கத்திய நாடுகளில் பாதுகாவலர் பணியில் ரோபோக்களே பயன்படுத்தப்பட்டு வருகின்றன. 

கால்நடைப் பராமரிப்பாளராக...

ஆஸ்திரேலிய நிறுவனம் கால்நடைகளை மேய்க்கும் ரோபோவை உருவாக்கியுள்ளது. 

உலகின் முதல் ரோபோ பண்ணை ஜப்பானில் உருவாகி வருகிறது. இங்குள்ள ரோபோக்கள் பயிர் நடுவது, தண்ணீர் பாய்ச்சுவது, அறுவடை செய்வது உள்ளிட்ட அனைத்துப் பணிகளையும் செய்கின்றன.

மருந்தாளுநராக...

மருந்தாளுநர் பணியிலும் சமீபத்திய ரோபோக்கள் பயன்படுத்தப்படுகின்றன. இதனால், மனிதத் தவறுகளால் ஏற்படும் இறப்புகள் குறைந்துள்ளதாகக் கூறப்படுகிறது.

மின் வணிகத்தில்...

புதிய வணிக வாய்ப்புகளை செயற்கை நுண்ணறிவு நல்குகிறது.  பெருநிறுவனங்கள் பொருள்களை உற்பத்தி செய்யவும் சந்தைப்படுத்தவும் செயற்கை நுண்ணறிவைப் பயன்படுத்துகின்றன. வணிகத்தில் செயற்கை நுண்ணறிவின் வளர்ச்சியை இவை பறைசாற்றுகின்றன.

எதிர்கால வெளிப்பாடுகள்

உள்ளீடு செய்யப்பட்ட மற்றும் திரட்டப்பட்ட மின்தரவுகளை ஆழ்நிலைக் கற்றலுக்கு உட்படுத்துவது, இயந்திரக் கற்றல் முறையின் மூலம் ஆராய்வது போன்ற தொழில்நுட்ப உத்திகளின் மூலம் செயற்கை நுண்ணறிவு சுயேச்சையான முடிவுகளை எடுக்கும் நிலைக்கு உயர்ந்து வருகிறது. 

உயிரியல் துறையிலும் கணினித் துறையிலும் நடக்கும் ஆராய்ச்சிகள் ஒன்றை ஒன்று செழுமைப்படுத்தி முன்னேறிக் கொண்டிருக்கின்றன. இதன் மூலம் எட்டப்படும் மைல்கல்கள் ஒவ்வொன்றும் மனித மூளையைக் குறித்த புதிய புரிதல்களை ஏற்படுத்துவதோடு செயற்கை நுண்ணறிவுத் தொழில்நுட்பம் அடைய வேண்டிய புதிய இலக்கையும் நிர்ணயிக்கின்றன.

செயற்கை நுண்ணறிவு தொழில்நுட்பத்தில் ஏற்பட்டு வரும் இந்த வளர்ச்சிப் போக்குகள் அனைத்தும் மிக விரைவில் உணர்வு கொண்ட மனித இயந்திரங்களின் பயன்பாடு சாத்தியமே என்பதற்கு கட்டியம் கூறுகின்றன.

செயற்கை நுண்ணறிதிறன் தன் வளர்ச்சியின் ஊடாக உணர்வு சார்ந்த முடிவெடுக்கும் ஆற்றலை மெல்ல மெல்ல அடைந்து வருகின்றது.  அத்தகைய உணர்வு சார்ந்த முடிவெடுக்கும் ஆற்றலால், ஒரு குழந்தையைத் தூக்கவும் கீழே விழுந்த தேனீர் கோப்பையை எடுக்கவும் மென்பொருள் அக்கறை கொள்ளும் என்று நம்பலாம்.

முடிவுரை

செயற்கை நுண்ணறிவு நமது வாழ்க்கையையும் வணிகத்தையும் நம்மை அறியாமலேயே வளப்படுத்திக் கொண்டிருக்கிறது. அத்தகைய செயற்கை நுண்ணறிவுத் தொழில்நுட்பத்தை ஏற்றுக் கொள்ள நாம் அணியமாக இருக்க வேண்டும். 

8 மதிப்பெண் வினா கோபல்லபுரத்து மக்கள்

 அன்னமய்யா என்னும் பெயருக்கும் அவரின் செயலுக்கும் உள்ள பொருத்தப்பாட்டினை 'கோபல்லபுரத்து மக்கள்' கதைப் பகுதி கொண்டு விவரிக்க.

நூல் முழுவதையும் படிக்க இங்கே தொடவும்

கோபல்லபுரத்து மக்கள்

கிராமத்து வெள்ளந்தி மனிதர்கள் காட்டும் விருந்தோம்பல் எப்பவும் மனசுக்குள் பசுமையாக இருக்கும். அவர்களது இயல்பான வரவேற்பும் எளிமையான உணவும் மதிய வேக்காட்டில் நடந்துவந்த களைப்பை மறக்கச் செய்யும்.  பசித்த வேளையில் வந்தவர்களுக்குத் தம்மிடம் இருப்பதையே பகிர்ந்து கொடுக்கிற நேயம் கிராமத்து விருந்தோம்பல். அப்படி நடக்கும் ஒரு நிகழ்வு நம் முன் காட்சியாகிறது.

புதியவனின் தோற்றம்

தற்செயலாக, புளிய மரத்தில் சாய்ந்து உட்கார்ந்திருந்தவனை அன்னமய்யா கண்டான்.  தாடியும் அழுக்கு ஆடையுடனும் இருந்த அவன் வயோதிகன் போலவும் சந்நியாசி போலவும் இருந்தான். ஆனால், அவன் வாலிபன்.  நடக்க முடியாமல் உட்கார்ந்து உட்கார்ந்து உடல் வாடிக் களைத்து, நடந்து வந்தவன். அவன் கண்களில் தீட்சண்யம் தெரிந்தது.

அன்னமய்யாவின் அரவணைப்பு

வாலிபன், அன்னமைய்யாவைக் கண்டதும் சிறுபுன்னகை செய்தான்;  பேச விருப்பம் இல்லாதவன் போல் இருந்தான். 

அன்னமய்யா, அவனையே பார்த்துக் கொண்டிருந்தான்.  அலுப்புத் தீர்ந்தவுடன் அந்த வாலிபன், குடிக்கத் தண்ணீர் கேட்டான்.  அன்னமய்யா, "அருகில் அருகு எடுத்துக் கொண்டிருப்பவர்களிடம் இருந்து நீச்சுச் தண்ணீர் வாங்கி வரட்டுமா?" என்றான்.

வாலிபன் எழுந்திருக்க ஒத்தாசையாகக் கையை நீட்டினான்.  தோளைப் பிடித்து நடக்கும்படி வேண்டினான்.

அன்னமய்யா அளித்த ஜீவ ஊற்று

வேப்ப மரத்தடியில் வைக்கப்பட்டிருந்த கலயத்துக் கஞ்சியின் நீத்துப் பாகத்தை வடித்துக் கொடுத்தான்.  வாங்கி உறிஞ்சும்போது வாலிபனின் கண்கள் சொருகின. மிடறு தொண்டை வழியாக இறங்குவதன் சுகத்தை முகம் சொல்லியது. உட்கார்ந்து குடிக்கச் சொன்னான்.  சோற்றின் மகுளியை வார்த்துக் கொடுத்தான். மடக்கு மடக்காய் ஜீவ ஊற்று உள்ளே இறங்கியது. வேப்பமர நிழலே சொர்க்கமாய், படுத்ததும் தென்றல் காற்று வந்து அயரச் செய்தது.  வயிறு நிறையப் பாலைக் குடித்து மடியிலே தூங்கும் குழந்தையின் முகத்தைத் தாய் பார்ப்பது போல அன்னமய்யா அவனையே பார்த்துக் கொண்டிருந்தான்.

பெயர்ப்பொருத்தம்

வாலிபனின் சிறு தூக்கம் முடியும் வரை காத்திருந்தான்.  எழுந்த வாலிபன், நன்றி கலந்த புன்னகை காட்டினான். அன்னமய்யா வாலிபனிடம், "உங்கள் ஊர்ப்பெயர் என்ன?  எங்க இருந்து வர்றீங்க? எங்க போகணும்?" என்று அன்புடன் கேட்டான். அந்த வாலிபன், " நான் ரொம்ப தொலைவில் இருந்து வர்றேன். சொந்தப் பெயர் பரமேஸ்வரன். அதை மறந்து விடு. மணி என்று கூப்பிடு.  ஆமாம், உன் பெயர் என்ன?" என்று கேட்டான்.  

"அன்னமய்யா " 

"அன்னமிட்டவனின் பெயர் அன்னமய்யா. என்னே பெயர்ப் பொருத்தம்!" என்று எண்ணிக் கொண்டான். "உண்டி கொடுத்தோர் உயிர் கொடுத்தோரே".

வெள்ளந்தி மனிதர்கள்

வாலிபனை, அன்னமய்யாவின் நண்பன் சுப்பையாவின் நஞ்சை நிலத்துக்குக் கூட்டி சென்றான். அங்கு அருகு எடுத்து கொண்டிருந்தவர்கள், சாப்பிட வந்தார்கள். மணியின் கையில் கால் உருண்டைக் கம்மஞ்சோற்றை வைத்தார்கள். நடுவில் குழி பறித்து அதில் துவையலை இட்டார்கள்.  கம்பஞ்சோற்றை அவர்கள் சாப்பிட்ட வேகம், ஆர்வம், அனுபவிப்பே அது  எவ்வளவு சுவையாக இருக்கும் என்பதைக் காட்டியது. அரை உருண்டையைச் சாப்பிட்ட மணி மறுபடியும் அயர்ந்து தூங்கி விட்டான். 

- மலர் மகேந்திரன்

5 மதிப்பெண் வினா ஆற்றுப்படுத்துதல் பத்தாம் வகுப்பு

 ஆற்றுப்படுத்தல் என்பது அன்றைக்குப் புலவர்களையையும் கலைஞர்களையும் வள்ளல்களை நோக்கி நெறிப்படுத்துவதாக இருந்தது.  அது இன்றைய நிலையில் ஒரு வழிகாட்டுதலாக மாறியிருப்பதை விளக்குக.

ஆற்றுப்படுத்துதல் அன்றும் இன்றும்

ஆற்றுப்படுத்துதல்

ஆறு-வழி ; படுத்துதல்-காட்டுதல்

வறுமை ஒரு கொடிய நோய்; உடலை வருத்துவதோடு உள்ளத்தையும் வாட்டக்கூடியது.  அத்தகைய வறியோர்க்குத் தம்பால் உள்ளவை எல்லாம் உவந்தீயும் வள்ளல்களை நோக்கி, பரிசில் பெற்று திரும்பிய கலைவாணர் வறுமையில் வாடும் கலைவாணர்க்கு வழிகாட்டுவது ஆற்றுப்படை.

சங்க காலத்தில் ஆற்றுப்படை, தனி இலக்கிய வகையாகவே வளர்ந்தது.  புறநானூறு, பதிற்றுப்பத்து, பொருநராற்றுப்படை, சிறுபாணாற்றுப்படை, பெரும்பாணாற்றுப்படை, கூத்தராற்றுப்படை ஆகிய நூல்கள் இதற்குச் சான்று பகர்வன.

அன்றைய ஆற்றுப்படுத்துதல்

1. இந்திரனின் அமிழ்தமே கிடைத்தாலும் 'இனிது' எனத் தனித்து உண்ணமாட்டார்.  பகிர்ந்து உண்பார்.
2. மருந்தே ஆயினும் விருந்தோடு உண்பார்.
3. கதவை அடைத்துவிட்டுத் தாமே உண்பதை இழிவு எனக் கருதுவார். 
4. பொருள் இல்லாத நிலையிலும், இருப்பதைப் பகிர்ந்து உண்பார்.
5. பகைக்கு அஞ்சார்; பாணரின் வறுமைக்கு அஞ்சுவார்
6. பொருநர், பாணர், கூத்தர், விறலியர் ஆகியோருக்குத் தத்தம் கலைஞர்கள், "இன்ன வள்ளலிடம் சென்றால் இன்ன பொருளைப் பெறலாம், வருந்தாதே!" என்று கூறி ஆற்றுப்படுத்துவார்.

இன்றைய வழிகாட்டுதல்

1. உறவினர்களைக் காணும்போது உடல்நலம் பற்றி விசாரிக்கின்றனர்; ஆறுதல் கூறுகின்றனர்; "இந்த மருத்துவரிடம் செல்லுங்கள்" என்று வழிகாட்டுகின்றனர்
2. மாணவர்கள் கல்வியில் மேம்பட, "இந்தப் பயிற்சி நிலையத்துக்குச் செல்லுங்கள்; இந்தப் படிப்புகளைப் படியுங்கள்; இந்த வேலை வாய்ப்புகள் இருக்கின்றன" என்று வழிகாட்டுகின்றனர்.
3. வறுமையில் வாடும் மாணவச் செல்வங்கள் மேற்படிப்பைத் தொடர இலவசக் கல்வியை அளிக்கும் நிறுவனங்கள், தன்னார்வத் தொண்டு நிறுவனங்களை நோக்கி வழிகாட்டுகின்றனர்.
4. மனக் கவலையிலிருந்து விடுபட இறைபக்தி, யோகா, மனவளக்கலை, மனநல மருத்துவம் போன்றவற்றை நோக்கி வழிகாட்டுகின்றனர்.
5. மாற்றுத்திறனாளிகள், முதியோர்கள், அனாதைக் குழந்தைகள், கணவரை இழந்த பெண்கள், கணவரால் கைவிடப்பட்டோர் போன்றார்க்கு அரசு உதவி கிடைக்க வழி காட்டுகின்றனர்.
6. நீதி மறுக்கப்பட்ட ஏழைகள் இலவச சட்ட உதவி பெற இலவச சட்ட உதவி மையங்களை நோக்கி வழிகாட்டுகின்றனர்.
7. இன்று கல்வி, மருத்துவம், வேலை, பொழுதுபோக்கு என எல்லாத்தறைகளிலும் அரசு மற்றும் தனியார் வழிகாட்டும் நிறுவனங்கள் பெருகியுள்ளன. அதற்குக் குறிப்பிட்ட சேவைக் கட்டணம் வசூலிக்கின்றன.
8. இன்றைய வழிகாட்டலில் தன்னார்வத் தொண்டு நிறுவனங்களின் பங்கு அளப்பரியது.

- மலர் மகேந்திரன்