சிலேடை நயம்

 சிலேடை நயம்

🌹 காலை நேரம் ஒரு நிகழ்ச்சிக்காக தொடர்வண்டியில் வந்து இறங்கினார், கி வா ஜெகந்நாதன். 

அவரை மாலையிட்டு வரவேற்றனர். அப்போது அவர், " அடடே , காலையிலேயே மாலை வந்துவிட்டதே" என்றார்.

அவரது சொல்லின் சிலேடை நயத்தை அனைவரும் ரசித்தனர்

🌹 இசை விமரிசகர் சுப்புடுவின்

விமர்சனத்தில் சிலேடை நயம் காணப்படும். ஒரு முறை ஒரு பெரிய வித்துவானுடைய இசை நிகழ்ச்சியில் குறிப்பிட்டது: "அன்று கச்சேரியில் அவருடைய காதிலும்  கம்மல்  , குரலிலும் கம்மல்".

🌹 தமிழறிஞர் கி.ஆ.பெ. விஸ்வநாதம் அவர்கள்

ஒரு முறை பல் மருத்துவத்தில் சிறப்பு பட்டம் பெற்ற நண்பர் ஒருவரை அறிமுகம் செய்து வைத்தபோது, "இவர் பல்துறை வித்தகர் " என்று குறிப்பிட்டார்.

சுந்தரக் கவிராயரின் சிலேடை நயம்

மரமது(1) மரத்தில்(2) ஏறி

மரம்(3) அதைத் தோளில் வைத்து

மரமது(4) மரத்தைக்(5) கண்டு

மரத்தி(6)னால் மரத்தைக்(7) குத்தி

மரமது(8) வழியே சென்று

வள மனைக்கு ஏகும் போது

மரமது(9) கண்ட மாதர்

மரம் (10)உடன் மரம்(11) எடுத்தார்

மரங்களில் பலவகை உண்டு.

• அரசமரம் (அரசனைக் குறிக்கிறது)
• மாமரம் (மா-குதிரையைக் குறிக்கிறது)
• கருவேல மரம் (பகையை வீழ்த்த உதவும் வேலைக் குறிக்கிறது)
• வேங்கை மரம் (வேங்கைப் புலியைக் குறிக்கிறது)
• ஆலமரம் (ஆல்)
• அத்திமரம் (அத்தி)

ஆல்+அத்தி=ஆரத்தி

மரமது (அரசமரம்-அரசன்)

மரத்தில் (மாமரம் - குதிரை மீது) ஏறி

மரமதைத் (கருவேல மரம்- கூரிய வேலினைத்) தோளில் வைத்து

மரமது (அரசமரம்- அரசன்)

மரத்தைக் (வேங்கை மரம்-வேங்கை புலியைக்)கண்டு

மரத்தால் (கருவேல மரம்-கூரிய வேலினால்)

மரத்தைக் (வேங்கை மரம்-வேங்கை புலியைக்) குத்தி

மரமது (மரங்கள் நிறைந்த காட்டின்) வழியே சென்று

வளமனைக்கு (அரண்மனை நோக்கி)ஏகும்போது(செல்லும் போது)

மரமது(அரசமரம்-அரசனைக்) கண்ட மாதர்

மரம் (ஆலமரம்)உடன் மரம் (அத்திமரம்)எடுத்தார்

ஆலமரம் (ஆல்)+அத்திமரம் (அத்தி)=ஆரத்தி எடுத்தனர்.